Read ახალი აღთქმა წიგნი მათესი 12 Bible Online

წიგნი მათესი 12 - ახალი აღთქმა bible

წიგნი მათესი 12

¹იმ დროს, შაბათს, მიდიოდა იესო ნათესებში, ხოლო მის მოწაფეებს მოშივდათ და დაიწყეს თავთავების მოწყვეტა და ჭამა.

²ფარისევლებმა რომ დაინახეს, უთხრეს მას: აჰა, შენი მოწაფეები იმას აკეთებენ, რისი კეთებაც არ არის მართებული შაბათს;

³ხოლო მან უთხრა მათ: არ ამოგიკითხავთ, რა გააკეთა დავითმა, როდესაც მოშივდათ მას და მასთან მყოფებს?

⁴როგორ შევიდა ღვთის სახლში და შესაწირავი პურები შეჭამა, რომელთა ჭამა არ იყო მართებული მისთვის და არც მასთან მყოფთათვის, არამედ მხოლოდ მღვდლებისთვის?

⁵ან არ ამოგიკითხავთ სჯულში, რომ შაბათობით მღვდლები ტაძარში შაბათს უგულებელყოფენ და უდანაშაულონი არიან?

⁶ხოლო გეუბნებით თქვენ: ტაძარზე დიდი არის აქ.

⁷რომ გცოდნოდათ, რა არის: წყალობა მნებავს და არა მსხვერპლი (ოს.6,6), — მსჯავრს არ დასდებდით უდანაშაულოებს.

⁸ასე რომ, ძე კაცისა უფალი არის შაბათისაც.

⁹და წამოვიდა იქიდან იესო და მივიდა მათ შესაკრებელში;

¹⁰და აჰა, იყო იქ კაცი, რომელსაც ხელი ჰქონდა გამხმარი; ჰკითხეს მას და უთხრეს: მართებულია შაბათს განკურნება? რათა დაესმინათ იგი;

¹¹ხოლო მან უთხრა მათ: ვინ არის თქვენ შორის კაცი, რომელსაც ეყოლება ერთი ცხვარი და თუ ჩაუვარდება იგი შაბათს ორმოში, არ მოჰკიდებს ხელს მას და არ ამოიყვანს?

¹²რამდენად უმჯობესია კაცი ცხვარზე? ამიტომ მართებულია შაბათს სიკეთის კეთება.

¹³მაშინ უთხრა იმ კაცს: გაშალე შენი ხელი, — და გაშალა და აღუდგა, როგორც მეორე.

¹⁴გამოვიდნენ ფარისევლები და ბჭობა გამართეს მის წინააღმდეგ, როგორ დაეღუპათ იგი; ხოლო იესომ გაიგო და გაერიდა იქაურობას;

¹⁵და გაჰყვა მას დიდძალი ხალხი და განკურნა ისინი ყველა

¹⁶და უბრძანა მათ, რომ არ გაეცხადებინათ იგი,

¹⁷რათა აღსრულებულიყო ნათქვამი ესაია წინასწარმეტყველის მიერ, რომელიც ამბობს:

¹⁸აჰა, ყრმა ჩემი, რომელიც გამოვირჩიე, საყვარელი ჩემი, რომელიც სათნოა ჩემი სულისთვის. დავდებ ჩემს სულს მასზე და სამართალს აუწყებს წარმართებს;

¹⁹არ იკამათებს, არც იღაღადებს, არც გაიგონებს ვინმე მოედნებზე მის ხმას;

²⁰შემუსვრილ ლერწამს არ გადატეხს და მბჟუტავ პატრუქს არ ჩააქრობს, ვიდრე ძლევამდე არ მიიყვანს სამართალს.

²¹და მისი სახელის მიმართ სასოება ექნებათ წარმართებს (ეს.42,1-4).

²²მაშინ მიუყვანეს მას ეშმაკეული ბრმა და მუნჯი და განკურნა იგი, ისე რომ ბრმა და მუნჯი მეტყველებდა და ხედავდა;

²³და გაოგნებული იყო მთელი ხალხი და ამბობდა: ნუთუ ეს არის ქრისტე, ძე დავითისა?

²⁴ხოლო ფარისევლებმა, ეს რომ გაიგონეს, თქვეს: ეს ვერ განდევნის ეშმაკებს, თუ არა ბელზებულით, ეშმაკთა მთავრით.

²⁵იცოდა იესომ მათი გულისზრახვები და უთხრა მათ: ყოველი სამეფო, რომელიც თავის წინააღმდეგ გაიყო, მოოხრდება; და ყოველი ქალაქი, გინდა სახლი, რომელიც თავის წინააღმდეგ გაიყო, ვერ იდგება;

²⁶და თუ სატანა სატანას განდევნის, თავის თავში გაიყო; როგორღა იდგება მისი სამეფო?

²⁷და თუ მე ბელზებულით განვდევნი ეშმაკებს, თქვენი ძეები რითღა განდევნიან? ამიტომ ისინივე იქნებიან თქვენი მსაჯულები;

²⁸ხოლო თუ მე ღვთის სულით განვდევნი ეშმაკებს, მაშასადამე, მოიწია თქვენზე სასუფეველი ღვთისა.

²⁹ან როგორ შეძლებს ვინმე შესვლას ძლიერის სახლში და მისი ქონების გატაცებას, თუ ჯერ არ შეკრავს ძლიერს? და მაშინღა გაძარცვავს მის სახლს.

³⁰ვინც არ არის ჩემთან, ჩემ წინააღმდეგ არის; და ვინც არ შეკრებს ჩემთან, განაბნევს;

³¹ამიტომ გეუბნებით თქვენ: ყოველი ცოდვა და გმობა მიეტევებათ ადამიანებს, ხოლო სულიწმიდის გმობა არ მიეტევებათ.

³²და ვინც იტყვის სიტყვას ძისა კაცისას წინააღმდეგ, მიეტევება მას, ხოლო ვინც იტყვის სულიწმიდის წინააღმდეგ, არ მიეტევება მას არც ამ საუკუნეში და არც მომავალში.

³³ან სცანით, რომ ხე კარგია და ნაყოფი მისი კარგია; ან სცანით, რომ ხე უვარგისია და ნაყოფი მისი უვარგისია, რადგან ნაყოფით იცნობა ხე.

³⁴იქედნეთა ნაშობნო, როგორ შეძლებთ კეთილის თქმას, როდესაც უკეთურები ხართ? რადგან გულის სისავსისგან მეტყველებს პირი.

³⁵კეთილ კაცს კეთილი საუნჯიდან გამოაქვს სიკეთე და ბოროტ კაცს ბოროტი საუნჯიდან გამოაქვს ბოროტება;

³⁶ხოლო მე გეუბნებით თქვენ, რომ ყოველი უქმი სიტყვის გამო, რომელსაც იტყვიან ადამიანები, პასუხს აგებენ განკითხვის დღეს;

³⁷რადგან შენი სიტყვებით გამართლდები და შენი სიტყვებით განისჯები.

³⁸მაშინ მიუგო მას ზოგიერთმა მწიგნობარმა და ფარისეველმა და უთხრა: მოძღვარო, გვინდა შენგან სასწაულის ხილვა;

³⁹ხოლო მან მიუგო და უთხრა მათ: მოდგმა ბოროტი და მრუში სასწაულს ეძებს, და სასწაული არ მიეცემა მას, გარდა იონა წინასწარმეტყველის სასწაულისა,

⁴⁰რადგან როგორც იონა იყო ვეშაპის მუცელში სამი დღე და სამი ღამე, ასევე იქნება ძე კაცისა მიწის გულში სამი დღე და სამი ღამე.

⁴¹ნინეველი კაცები აღდგებიან სამსჯავროზე ამ მოდგმასთან ერთად და განსჯიან მას, რადგან შეინანეს იონას ქადაგებით, და აჰა, იონაზე მეტი არის აქ.

⁴²სამხრეთის დედოფალი აღდგება სამსჯავროზე ამ მოდგმასთან ერთად და განსჯის მას, რადგან მოვიდა ქვეყნის კიდიდან სოლომონის სიბრძნის მოსასმენად, და აჰა, სოლომონზე მეტი არის აქ.

⁴³და როცა არაწმინდა სული გადის კაცისგან, მოივლის უწყლო ადგილებს და ეძებს მოსვენებას და ვერ პოულობს.

⁴⁴მაშინ იტყვის: მივბრუნდები ჩემს სახლში, საიდანაც გამოვედი. და როცა მივა, იპოვის მას ცარიელს, დაგვილს და შემკულს;

⁴⁵მაშინ წავა და თან მოიყვანს სხვა შვიდ სულს, თავისზე ბოროტს, და შევლენ და დამკვიდრდებიან იქ. და იქნება იმ კაცისთვის უკანასკნელი პირველზე უარესი. ასე იქნება ამ უკეთური მოდგმისთვისაც.

⁴⁶როცა იგი ჯერ კიდევ ესაუბრებოდა ხალხს, აჰა, დედა მისი და მისი ძმები იდგნენ გარეთ და ეძებდნენ მას სასაუბროდ.

⁴⁷მაშინ უთხრა მას ვიღაცამ: აჰა, დედაშენი და შენი ძმები დგანან გარეთ და გეძებენ შენ სასაუბროდ;

⁴⁸ხოლო მან მიუგო და უთხრა ამის მთქმელს: ვინ არის დედა ჩემი და ვინ არიან ჩემი ძმები?

⁴⁹და გაიწოდა თავისი ხელი მოწაფეებისკენ და თქვა: აჰა, დედა ჩემი და ჩემი ძმები,

⁵⁰რადგან ვინც აღასრულებს ჩემი ზეცათა მამის ნებას, ის არის ძმა და და, და დედაჩემი.