Read ახალი აღთქმა წიგნი მათესი 13 Bible Online

წიგნი მათესი 13 - ახალი აღთქმა bible

წიგნი მათესი 13

¹იმ დღეს გამოვიდა იესო სახლიდან და დაჯდა ზღვის პირას.

²და შეიკრიბა მასთან დიდძალი ხალხი, ისე რომ იგი ნავზე ავიდა და დაჯდა, და მთელი ხალხი ზღვის პირას იდგა.

³და ეუბნებოდა მათ ბევრს იგავებით და უთხრა: აჰა, გამოვიდა მთესველი დასათესად

⁴და როცა თესავდა იგი, ზოგი დავარდა გზასთან და მივიდნენ ცის ფრინველები და შეჭამეს იგი;

⁵და სხვა დავარდა კლდოვანზე, სადაც არ იყო ბევრი მიწა, და მყისვე აღმოცენდა, რადგან არ ჰქონდა მიწას სიღრმე;

⁶და მზე რომ ამოვიდა, დაჭკნა და, რადგან არ ჰქონდა ფესვი, გახმა;

⁷და სხვა ჩავარდა ეკლებში და ამოვიდა ეკლები და მოაშთო იგი;

⁸და სხვა დავარდა კარგ მიწაზე და გამოიღო ნაყოფი: ზოგმა — ასი, ზოგმა — სამოცი და ზოგმა — ოცდაათი.

⁹ვისაც აქვს ყურები სასმენად, ისმინოს!

¹⁰და მივიდნენ მოწაფეები და უთხრეს მას: რატომ ესაუბრები მათ იგავებით?

¹¹ხოლო მან მიუგო და უთხრა მათ: თქვენთვის მოცემულია ღვთის სასუფევლის საიდუმლოს შეცნობა, ხოლო იმათთვის არ არის მიცემული;

¹²რადგან ვისაც აქვს, მიეცემა მას და მიემატება; და ვისაც არა აქვს, რაც აქვს, ისიც წაერთმევა მას.

¹³ამიტომ იგავებით ვესაუბრები მათ, რადგან ხედავენ და არ ხედავენ, ესმით და არ ესმით, ვერც იგებენ.

¹⁴და სრულდება მათზე წინასწარმეტყველება ესაიასი, რომელიც ამბობს: სმენით გესმოდეთ და ვერ გაიგოთ, ხედვით ხედავდეთ და ვერ იხილოთ;

¹⁵რადგან გაქვავდა ამ ხალხის გული და ყურით ძნელად ისმინეს და თვალები დახუჭეს, რომ არ იხილონ თვალით და არ ისმინონ ყურით და არ გაიგონ გულით და არ მოიქცნენ და არ განვკურნო ისინი (ეს.6,9-10);

¹⁶ხოლო ნეტარია თქვენი თვალები, რადგან ხედავენ, და თქვენი ყურები, რადგან ესმით.

¹⁷ამინ გეუბნებით თქვენ, რომ მრავალ წინასწარმეტყველს და მართალს ეწადა, ეხილა, რასაც ხედავთ, და ვერ იხილა და ესმინა, რასაც ისმენთ, და ვერ ისმინა.

¹⁸ამიტომ თქვენ ისმინეთ იგავი მთესველისა:

¹⁹ყველასთან, ვინც ისმენს სასუფევლის სიტყვას და არ გაიგებს, მიდის უკეთური და იტაცებს დათესილს მისი გულიდან. ეს არის, რომელიც გზასთან დაითესა,

²⁰ხოლო კლდოვანზე დათესილი ეს არის: ვინც ისმენს სიტყვას და მყისვე სიხარულით იღებს მას;

²¹და რადგან ფესვი არა აქვს თავის თავში, არამედ დროებითია, როდესაც იქნება გაჭირვება ან დევნა ამ სიტყვის გამო, მყისვე დაბრკოლდება;

²²ხოლო ეკლებში დათესილი ეს არის: ვინც სიტყვას ისმენს და ამ სოფლის საზრუნავი და სიმდიდრის საცდური აშთობს სიტყვას და უნაყოფო ხდება;

²³ხოლო კარგ მიწაზე დათესილი ეს არის: ვინც სიტყვას ისმენს და იგებს; ვისაც გამოაქვს ნაყოფი და აქცევს ზოგი ასად, ზოგი სამოცად, ზოგი ოცდაათად.

²⁴სხვა იგავი შესთავაზა მათ და უთხრა: ემსგავსა სასუფეველი ცათა კაცს, რომელმაც დათესა კარგი თესლი თავის ყანაში;

²⁵და როცა ადამიანებს ეძინათ, მოვიდა მისი მტერი და ჩათესა ღვარძლი ხორბალს შორის და წავიდა;

²⁶ხოლო როდესაც აღმოცენდა ჯეჯილი და ნაყოფი გამოიღო, მაშინ გამოჩნდა ღვარძლიც.

²⁷და როცა მივიდნენ სახლის პატრონის მონები, უთხრეს მას: ბატონო, განა კარგი თესლი არ დათესე შენს ყანაში? საიდან არის ღვარძლი?

²⁸ხოლო მან უთხრა მათ: მტერმა კაცმა გააკეთა ეს. მონებმა უთხრეს მას: გნებავს, რომ მივიდეთ და გამოვარჩიოთ იგი?

²⁹ხოლო მან უთხრა: არა, ვაითუ ღვარძლის გამორჩევისას ამოგლიჯოთ მასთან ერთად ხორბალიც.

³⁰აცალეთ, გაიზარდოს ორივე ერთად მკამდე და მკის დროს ვეტყვი მომკელებს: გამოარჩიეთ ჯერ ღვარძლი და შეკარით ძნებად, რომ დაიწვას იგი, ხოლო ხორბალი შეკრიბეთ ჩემს ბეღელში.

³¹სხვა იგავი შესთავაზა მათ და უთხრა: მსგავსია სასუფეველი ცათა მდოგვის მარცვლისა, რომელიც აიღო კაცმა და დათესა თავის ყანაში;

³²მცირეა ყველა თესლზე, ხოლო როცა გაიზრდება, ყველა მხალზე დიდი იქნება და იქცევა ხედ, ისე რომ მოვლენ ცის ფრინველები და მის რტოებში დაიბუდებენ.

³³სხვა იგავიც უთხრა მათ: მსგავსია სასუფეველი ცათა საფუვრისა, რომელიც აიღო დედაკაცმა და შეურია სამ საწყაო ფქვილს, ვიდრე არ აფუვდა მთლიანად.

³⁴ყოველივე ეს იესომ იგავებით უთხრა ხალხს და იგავის გარეშე არაფერს ეუბნებოდა მათ,

³⁵რათა აღსრულებულიყო ნათქვამი წინასწარმეტყველის მიერ, რომელიც ამბობს: გავხსნი იგავით ჩემს პირს და ვიტყვი დაფარულს ქვეყნის დასაბამიდან (ფს.77,2).

³⁶მაშინ გაუშვა იესომ ხალხი და შევიდა სახლში; მივიდნენ მასთან მისი მოწაფეები და უთხრეს: განგვიმარტე ჩვენ იგავი ყანის ღვარძლისა.

³⁷და მან მიუგო და უთხრა მათ: ვინც თესავს კარგ თესლს, არის ძე კაცისა;

³⁸ხოლო ყანა არის ეს სოფელი; კარგი თესლი — ეს არის სასუფევლის ძეები, ღვარძლი კი არის უკეთურის ძეები;

³⁹ხოლო მტერი, რომელმაც დათესა იგი, არის ეშმაკი; მკა არის დასასრული საუკუნეთა, ხოლო მომკელნი არიან ანგელოზები;

⁴⁰ამიტომ, როგორც გამოარჩევენ ღვარძლს და ცეცხლში დაწვავენ, ასევე იქნება საუკუნეთა დასასრულს:

⁴¹მოავლენს ძე კაცისა თავის ანგელოზებს და გამოარჩევენ მისი სამეფოდან ყველა საცდურსა და უსჯულოების მოქმედს

⁴²და შეყრიან მათ ცეცხლიან ღუმელში. იქ იქნება ტირილი და კბილთა ღრჭენა.

⁴³მაშინ მართლები მზესავით გაბრწყინდებიან თავისი მამის სასუფეველში. ვისაც აქვს ყურები სასმენად, ისმინოს!

⁴⁴კიდევ მსგავსია სასუფეველი ცათა საუნჯისა, რომელიც ყანაშია დაფლული და რომელიც იპოვა კაცმა, დამალა და სიხარულით მიდის, ყიდის ყველაფერს, რაც აქვს, და ყიდულობს იმ ყანას;

⁴⁵კიდევ მსგავსია სასუფეველი ცათა ვაჭარი კაცისა, რომელიც ეძებს კარგ მარგალიტებს;

⁴⁶და რომელმაც იპოვა ერთი ძვირფასი მარგალიტი, წავიდა და გაყიდა ყოველივე, რაც ჰქონდა, და იყიდა იგი;

⁴⁷კიდევ მსგავსია სასუფეველი ცათა მოსასმელი ბადისა, რომელიც ზღვაშია ჩაგდებული და რომელმაც თევზის ყველა სახეობიდან შეკრიბა;

⁴⁸და როდესაც აივსო, ამოიტანეს იგი ნაპირზე და, როცა დასხდნენ, შეაგროვეს კარგები ჭურჭელში, ხოლო უვარგისები გარეთ გადაყარეს.

⁴⁹ასე იქნება საუკუნეთა დასასრულს: მოვლენ ანგელოზები და გამოარჩევენ უკეთურებს მართლებისგან

⁵⁰და ჩაყრიან მათ ცეცხლიან ღუმელში. იქ იქნება ტირილი და კბილთა ღრჭენა.

⁵¹უთხრა მათ იესომ: გაიგეთ ეს ყოველივე? უთხრეს მას: ჰო, უფალო.

⁵²და უთხრა მათ: ამიტომ ყველა მწიგნობარი, ცათა სასუფეველს დამოწაფებული, მსგავსია კაცისა, სახლის პატრონისა, რომელსაც გამოაქვს თავისი საუნჯიდან ახალი და ძველი.

⁵³და იყო, როდესაც დაასრულა იესომ ეს იგავები, წავიდა იქიდან.

⁵⁴და მივიდა თავის მამულში და ასწავლიდა მათ შესაკრებელში, ისე რომ განცვიფრებულნი იყვნენ ისინი და ამბობდნენ: საიდან აქვს ამას ეს სიბრძნე და ძალები?

⁵⁵განა ეს არ არის ძე ხუროსი? განა მის დედას არ ჰქვია მარიამი? და მისი ძმები არ არიან იაკობი, იოსები, სიმონი და იუდა?

⁵⁶და მისი დები, ყველანი ჩვენთან არ არიან? საიდან აქვს ამას ეს ყველაფერი?

⁵⁷და ბრკოლდებოდნენ მის მიმართ. ხოლო იესომ უთხრა მათ: არ არის წინასწარმეტყველი უპატიოდ, გარდა თავისი მამულისა და სახლისა.

⁵⁸და არ აღასრულა იქ მრავალი სასწაული მათი ურწმუნოების გამო.