Read ახალი აღთქმა წიგნი მათესი 14 Bible Online

წიგნი მათესი 14 - ახალი აღთქმა bible

წიგნი მათესი 14

¹იმ დროს გაიგო ჰეროდე ტეტრარქმა იესოს ამბავი

²და უთხრა თავის მსახურებს: ეს არის იოანე ნათლისმცემელი. იგი აღმდგარა მკვდრეთით და ამის გამო ძალები მოქმედებენ მის მიერ,

³რადგან ჰეროდემ შეიპყრო იოანე, შებორკა იგი და საპყრობილეში ჩასვა ჰეროდიას, თავისი ძმის, ფილიპეს, ცოლის გამო;

⁴რადგან ეუბნებოდა მას იოანე: არ არის მართებული, რომ გყავდეს შენ იგი ცოლად.

⁵და უნდოდა მისი მოკვლა, მაგრამ ეშინოდა ხალხისა, რადგან როგორც წინასწარმეტყველს აღიარებდნენ მას.

⁶ხოლო როცა ჰეროდეს დაბადების დღე იყო, როკავდა ჰეროდიას ასული წვეულთა შორის და მოეწონა ჰეროდეს,

⁷რის გამოც ფიცით აღუთქვა მას, რომ მისცემდა, რასაც ითხოვდა.

⁸ხოლო იგი წინასწარ იყო დარიგებული თავისი დედისგან და უთხრა: მომეცი მე აქ ლანგრით თავი იოანე ნათლისმცემლისა.

⁹და შეწუხდა მეფე, მაგრამ ფიცისა და თანამეინახეთა გამო ბრძანა, მიეცათ მისთვის.

¹⁰და გაგზავნა და თავი მოჰკვეთა იოანეს საპყრობილეში.

¹¹და მოიტანეს მისი თავი ლანგრით და მისცეს ქალს და მიუტანა თავის დედას.

¹²და მივიდნენ მისი მოწაფეები, აიღეს გვამი და დამარხეს იგი და მოვიდნენ და უთხრეს იესოს.

¹³ეს რომ გაიგო იესომ, გაერიდა და წავიდა იქიდან ნავით უდაბურ ადგილას მარტო; და როცა გაიგო ხალხმა, გაჰყვა მას ფეხით ქალაქებიდან.

¹⁴და გამოვიდა რა იესო, იხილა დიდძალი ხალხი და შეებრალა ისინი და განკურნა მათი სნეულები.

¹⁵როცა მოსაღამოვდა, მივიდნენ მასთან მისი მოწაფეები და უთხრეს: უდაბურია ეს ადგილი და დრო უკვე გასულია; გაუშვი ხალხი, რომ წავიდეს გარშემო დაბებში და იყიდოს თავისთვის საჭმელი;

¹⁶ხოლო იესომ უთხრა მათ: არ სჭირდებათ წასვლა; თქვენ მიეცით მათ საჭმელი;

¹⁷და მათ უთხრეს მას: არაფერი გვაქვს აქ, გარდა ხუთი პურისა და ორი თევზისა.

¹⁸და უთხრა მათ: მომიტანეთ მე ისინი აქ.

¹⁹და უბრძანა ხალხს დასხდომა ბალახზე, აიღო ხუთი პური და ორი თევზი, აიხედა ცისკენ და აკურთხა და გატეხა და მისცა მოწაფეებს პურები, ხოლო მოწაფეებმა — ხალხს.

²⁰და ჭამა ყველამ და გაძღა; და აიღეს დარჩენილი ნატეხები თორმეტი გოდორი სავსე.

²¹ხოლო ვინც ჭამა, იყო ხუთი ათასამდე მამაკაცი, გარდა დედაკაცებისა და ყრმებისა.

²²და მაშინვე აიძულა იესომ თავისი მოწაფეები, ასულიყვნენ ნავზე და გასულიყვნენ მასზე ადრე გაღმა, ვიდრე გაუშვებდა ხალხს.

²³და როცა გაუშვა ხალხი, ავიდა მთაზე სალოცავად განმარტოებით. და როდესაც მოსაღამოვდა, მარტო იყო იქ.

²⁴ხოლო ნავი უკვე გაშორებული იყო ხმელეთს მრავალ უტევანზე და ირყეოდა ტალღებისგან, რადგან იყო საპირისპირო ქარი.

²⁵და ღამის მეოთხე სახმილავზე მივიდა მათთან იესო ზღვაზე სვლით;

²⁶ხოლო როდესაც მოწაფეებმა დაინახეს იგი ზღვაზე მავალი, შეძრწუნდნენ და თქვეს: მოჩვენებაა. და შიშისაგან შეჰყვირეს.

²⁷მაშინვე დაელაპარაკა მათ იესო და უთხრა: გამხნევდით, მე ვარ, ნუ გეშინიათ.

²⁸მიუგო მას პეტრემ და უთხრა: უფალო, თუ შენ ხარ, მიბრძანე მე, მოვიდე შენთან წყალზე სვლით;

²⁹ხოლო მან უთხრა: მოდი! და გადავიდა ნავიდან პეტრე და წყალზე სვლით წავიდა იესოსკენ,

³⁰მაგრამ როდესაც იხილა ძლიერი ქარი, შეშინდა და დაიწყო ჩაძირვა, შეჰყვირა და თქვა: უფალო, მიხსენი მე!

³¹და მყისვე გაუწოდა იესომ ხელი, მოჰკიდა მას და უთხრა: მცირედმორწმუნევ, რად დაეჭვდი?

³²და როდესაც ავიდნენ ისინი ნავზე, დაცხრა ქარი.

³³ხოლო ვინც ნავში იყვნენ, მივიდნენ, თაყვანი სცეს მას და უთხრეს: ჭეშმარიტად ძე ღვთისა ხარ შენ.

³⁴და გავიდნენ გაღმა და მივიდნენ გენესარეთის ქვეყანაში.

³⁵და იცნეს იგი იმ მხარის კაცებმა, გაგზავნეს მთელ იმ შემოგარენში და მიუყვანეს მას ყველა ავადმყოფი

³⁶და ევედრებოდნენ მას, რომ მხოლოდ შეხებოდნენ მისი სამოსის კიდეს; და რამდენიც შეეხო, განიკურნა.