Read ახალი აღთქმა წიგნი მათესი 15 Bible Online

წიგნი მათესი 15 - ახალი აღთქმა bible

წიგნი მათესი 15

¹მაშინ მივიდნენ იესოსთან იერუსალიმიდან ფარისევლები: და მწიგნობრები და უთხრეს:

²რატომ არღვევენ შენი მოწაფეები ხუცესთა გადმოცემას, რადგან არ იბანენ ხელებს, როცა პურს ჭამენ?

³ხოლო მან მიუგო და უთხრა მათ: თქვენ რატომღა არღვევთ ღვთის მცნებას თქვენი გადმოცემით?

⁴რადგან ღმერთმა თქვა: პატივი ეცი მამას და დედას; და ვინც ბოროტს იტყვის მამაზე ან დედაზე, სიკვდილით აღესრულოს (გამ.20,12;21,17);

⁵ხოლო თქვენ ამბობთ: ვინც ეტყვის მამას ან დედას: ძღვენია, რითაც ჩემგან უნდა გესარგებლა,

⁶და პატივს არ სცემს თავის მამას და თავის დედას, — ამით აუქმებთ ღვთის სიტყვას თქვენი გადმოცემით.

⁷თვალთმაქცნო, კარგად იწინასწარმეტყველა თქვენზე ესაიამ, რომელიც ამბობდა:

⁸მიახლოვდება მე ეს ერი თავისი პირით და ბაგით პატივს მცემს მე, ხოლო გული მათი შორს არის განშორებული ჩემგან.

⁹ამაოდ მემსახურებიან მე, რადგან ასწავლიან კაცთა მოძღვრებასა და მცნებას (ეს.29,13).

¹⁰და მოუხმო ხალხს და უთხრა მათ: ისმინეთ და გაიგეთ:

¹¹არა პირიდან შემავალი ბილწავს კაცს, არამედ პირიდან გამომავალი ბილწავს კაცს.

¹²მაშინ მივიდნენ მოწაფეები და უთხრეს მას: იცი, რომ ფარისევლები დაბრკოლდნენ, როცა მოისმინეს ეს სიტყვა?

¹³ხოლო მან მიუგო და უთხრა: ყოველი ნერგი, რომელიც არ დანერგა ჩემმა ზეციერმა მამამ, აღმოიფხვრება.

¹⁴აცალეთ მათ, ბრმები არიან ბრმათა წინამძღვრები; ხოლო თუ ბრმა ბრმას წინ უძღვის, ორივე ორმოში ჩავარდება.

¹⁵მიუგო პეტრემ და უთხრა მას: განგვიმარტე ჩვენ ეს იგავი.

¹⁶ხოლო იესომ უთხრა: თქვენც ჯერ კიდევ უგულისხმონი ხართ?

¹⁷არ იცით, რომ ყველაფერი, რაც პირში შედის, მუცელში ჩადის და გასავალში გადის?

¹⁸ხოლო პირიდან გამომავალი გულიდან გამოდის და ის ბილწავს კაცს;

¹⁹რადგან გულიდან გამოდის ბოროტი გულისზრახვა, მკვლელობა, მრუშობა, სიძვა, პარვა, ცილისწამება, გმობა.

²⁰ეს არის, რაც ბილწავს კაცს, ხოლო დაუბანელი ხელით ჭამა არ ბილწავს კაცს.

²¹და გამოვიდა იქიდან იესო, გაშორდა და წავიდა ტვიროსისა და სიდონის მხარეს.

²²და აჰა, ქანანელი დედაკაცი გამოვიდა იმ საზღვრებიდან, ღაღადებდა და ამბობდა: შემიწყალე მე, უფალო, ძეო დავითისაო, ასული ჩემი ბოროტად ეშმაკეულია.

²³ხოლო მან სიტყვა არ მიუგო მას; და მივიდნენ მასთან მოწაფეები, სთხოვეს მას და უთხრეს: გაუშვი იგი, რადგან ღაღადებს და მოგვდევს ჩვენ.

²⁴მან მიუგო და უთხრა: არა ვარ მოვლინებული სხვებისთვის, არამედ მხოლოდ ისრაელის სახლის წარწყმედილი ცხვრებისთვის.

²⁵ხოლო იგი მივიდა, თაყვანს სცემდა მას და ეუბნებოდა: უფალო, შემეწიე მე.

²⁶და მან მიუგო და უთხრა: არ არის კარგი პურის აღება შვილებისგან და ძაღლებისთვის დაგდება.

²⁷ხოლო მან უთხრა: ჰო, უფალო, მაგრამ ძაღლებიც ჭამენ ნამცეცებს, გადმოცვენილს მათი ბატონების ტაბლიდან.

²⁸მაშინ მიუგო იესომ და უთხრა მას: ო, დედაკაცო, დიდია შენი რწმენა, მოგეგოს შენ, როგორც გინდა. — და განიკურნა მისი ასული იმ დროიდან.

²⁹და წამოვიდა იქიდან იესო, მივიდა გალილეის ზღვის პირას და ავიდა მთაზე და დაჯდა იქ.

³⁰და მივიდა მასთან დიდძალი ხალხი, რომლებსაც თან ჰყავდათ კოჭლები, ბრმები, მუნჯები, საპყრები და სხვა მრავალი და დასხეს ისინი მის ფეხთით და განკურნა ისინი;

³¹ისე რომ უკვირდა ხალხს, როცა ხედავდნენ, რომ მუნჯები მეტყველებდნენ, კოჭლები დადიოდნენ, საპყრები იკურნებოდნენ, ბრმები ხედავდნენ და ადიდებდნენ ისრაელის ღმერთს.

³²ხოლო იესომ მოუხმო თავის მოწაფეებს და უთხრა: მებრალება ეს ხალხი, რადგან უკვე სამი დღეა, მელოდება მე და არაფერი აქვთ, რომ ჭამონ; და მათი გაშვება უჭმელად არ მინდა, ვაითუ დაუძლურდნენ გზაში.

³³და უთხრეს მას მისმა მოწაფეებმა: საიდან გვაქვს ჩვენ უდაბნოში იმდენი პური, რომ გავაძღოთ ამდენი ხალხი?

³⁴უთხრა მათ იესომ: რამდენი პური გაქვთ? ხოლო მათ უთხრეს: შვიდი, და ცოტა თევზი.

³⁵და უბრძანა ხალხს დასხდომა მიწაზე

³⁶და აიღო შვიდი პური და თევზები და მადლობდა, გატეხა და მისცა მოწაფეებს, ხოლო მოწაფეებმა ხალხს.

³⁷ჭამა ყველამ და გაძღა; და აიღეს დარჩენილი ნატეხები შვიდი კალათი სავსე;

³⁸ხოლო ვინც ჭამა, იყო ოთხი ათასი მამაკაცი, გარდა დედაკაცებისა და ყრმებისა.

³⁹და გაუშვა ხალხი, ავიდა ნავზე და მივიდა მაგდალას საზღვრებთან.