Read ახალი აღთქმა წიგნი მათესი 16 Bible Online

წიგნი მათესი 16 - ახალი აღთქმა bible

წიგნი მათესი 16

¹და მივიდნენ ფარისევლები და სადუკევლები, სცდიდნენ მას და მოითხოვდნენ, ზეციდან ნიშანი ეჩვენებინა მათთვის;

²ხოლო მან მიუგო და უთხრა მათ: როცა მოსაღამოვდება, ამბობთ: დარი იქნება, რადგან წითელია ცა;

³და განთიადისას — დღეს ავდარი იქნება, რადგან წითელია მოქუფრული ცა. თვალთმაქცნო, ცის სახის ცნობა იცით, ხოლო ჟამთა ნიშნების გამოცნობა არ შეგიძლიათ.

⁴მოდგმა ბოროტი და მრუში სასწაულს ეძებს და სასწაული არ მიეცემა მას, გარდა იონა წინასწარმეტყველის სასწაულისა. და დატოვა ისინი და წავიდა.

⁵და როცა გავიდნენ მისი მოწაფეები გაღმა, დაავიწყდათ პურის წაღება.

⁶იესომ უთხრა მათ: იხილეთ, ერიდეთ ფარისეველთა და სადუკეველთა საფუარს;

⁷ხოლო ისინი ფიქრობდნენ თავის გულში და ამბობდნენ: იმიტომ რომ პური არ წამოვიღეთ;

⁸გულისხმაყო იესომ და უთხრა მათ: რატომ ფიქრობთ თქვენს გულში, მცირედმორწმუნენო, რომ პური არ წამოიღეთ?

⁹ვერ ხვდებით, არც გახსოვთ ხუთი პური ხუთი ათასისა, და რამდენი გოდორი აიღეთ?

¹⁰არც შვიდი პური ოთხი ათასისა, და რამდენი კალათი აიღეთ?

¹¹როგორ ვერ ხვდებით, რომ პურის გამო არ გითხარით თქვენ: ერიდეთ ფარისეველთა და სადუკეველთა საფუარს?

¹²მაშინ მიხვდნენ, რომ არ უთხრა მათ, მორიდებოდნენ პურის საფუარს, არამედ ფარისეველთა და სადუკეველთა მოძღვრებას.

¹³და როცა მივიდა იესო ფილიპეს კესარიის მხარეში, ეკითხებოდა თავის მოწაფეებს და ეუბნებოდა: რას ამბობენ ჩემზე ადამიანები, ვინ არის ძე კაცისა?

¹⁴ხოლო მათ უთხრეს: ზოგი ამბობს — იოანე ნათლისმცემელი, ხოლო სხვები — ელია და სხვები — იერემია ან ერთი წინასწარმეტყველთაგანი.

¹⁵უთხრა მათ: ხოლო თქვენ რას ამბობთ ჩემზე, ვინ ვარ მე?

¹⁶და მიუგო სიმონ-პეტრემ და უთხრა: შენ ხარ ქრისტე, ძე ცოცხალი ღმერთისა.

¹⁷ხოლო იესომ მიუგო და უთხრა მას: ნეტარი ხარ შენ, სიმონ, ბარ იონა, რადგან ხორცმა და სისხლმა არ გამოგიცხადა შენ, არამედ ჩემმა ზეცათა მამამ.

¹⁸და მე გეუბნები შენ: შენ ხარ პეტრე, და ამ კლდეზე ავაშენებ ჩემს ეკლესიას და ჯოჯოხეთის ბჭენი ვერ მოერევიან მას.

¹⁹და მოგცემ შენ ცათა სასუფევლის კლიტეებს და რასაც შეკრავ ქვეყანაზე, შეკრული იქნება ცაში; და რასაც გახსნი ქვეყანაზე, გახსნილი იქნება ცაში.

²⁰მაშინ უბრძანა თავის მოწაფეებს, არავისთვის ეთქვათ, რომ ის არის ქრისტე.

²¹ამიერიდან დაიწყო იესომ გამხელა თავისი მოწაფეებისთვის, რომ მართებს მას იერუსალიმში ასვლა და მრავალი ვნება უხუცესებისგან, მღვდელმთავრებისა და მწიგნობრებისგან და მოკლავენ და მესამე დღეს აღდგება.

²²და გაიყვანა იგი პეტრემ, დაუწყო მას შეპასუხება და უთხრა: შეიწყალე შენი თავი, უფალო, ნუ იქნება ეს შენთვის;

²³ხოლო იგი მიუბრუნდა და უთხრა პეტრეს: გამშორდი, სატანა, საცდური ხარ ჩემთვის, რადგან არ ფიქრობ ღვთისას, არამედ კაცისას.

²⁴მაშინ უთხრა იესომ თავის მოწაფეებს: ვისაც უნდა, შემომიდგეს მე, უარყოს თავისი თავი, აიღოს თავისი ჯვარი და გამომყვეს მე;

²⁵რადგან ვისაც უნდა თავისი სულის გადარჩენა, წარწყმედს მას; ხოლო ვინც წარწყმედს თავის სულს ჩემთვის, ის მოიპოვებს მას.

²⁶ან რა სარგებელი ექნება კაცს, თუ მთელ ქვეყანას შეიძენს, ხოლო თავის სულს ავნებს? ან რას მისცემს კაცი თავისი სულის სანაცვლოდ?

²⁷რადგან უნდა მოვიდეს ძე კაცისა თავისი მამის დიდებით თავის ანგელოზებთან ერთად და მაშინ მიაგებს თითოეულს მისი საქმისამებრ.

²⁸ამინ გეუბნებით თქვენ: არიან ზოგიერთები აქ მდგომთაგან, რომლებიც არ იგემებენ სიკვდილს, ვიდრე არ იხილავენ ძეს კაცისას, მომავალს თავისი სუფევით.