Read ახალი აღთქმა წიგნი მათესი 17 Bible Online

წიგნი მათესი 17 - ახალი აღთქმა bible

წიგნი მათესი 17

¹და ექვსი დღის შემდეგ წაიყვანა იესომ პეტრე, იაკობი და იოანე, ძმა მისი, და აიყვანა ისინი მაღალ მთაზე განმარტოებით.

²და ფერი იცვალა მათ წინაშე და გაბრწყინდა მისი სახე, როგორც მზე; ხოლო მისი სამოსი გახდა თეთრი, როგორც ნათელი.

³და აჰა, ეჩვენათ მათ მოსე და ელია, რომლებიც საუბრობდნენ მასთან.

⁴მიუგო პეტრემ და უთხრა იესოს: უფალო, კარგია ჩვენთვის აქ ყოფნა; თუ გნებავს, გავაკეთოთ აქ სამი კარავი: შენთვის — ერთი და მოსესთვის — ერთი და ელიასთვის — ერთი.

⁵და ვიდრე იგი ამას ამბობდა, აჰა, ნათელმა ღრუბელმა დაჩრდილა ისინი და აჰა, ხმა იყო ღრუბლიდან მეტყველი: ეს არის ძე ჩემი საყვარელი, რომელიც სათნოა ჩემთვის, მაგისი ისმინეთ.

⁶და როცა გაიგონეს მოწაფეებმა, პირქვე დაემხნენ და შეშინდნენ ძლიერ.

⁷და მივიდა იესო და შეეხო მათ და უთხრა: ადექით და ნუ გეშინიათ.

⁸და თვალები რომ გაახილეს, ვერავინ ნახეს, არამედ მხოლოდ იესო.

⁹და როდესაც ჩამოდიოდნენ მთიდან, უბრძანა მათ იესომ და უთხრა: ნურავის ეტყვით ხილვის შესახებ, ვიდრე ძე კაცისა მკვდრეთით არ აღდგება.

¹⁰და ჰკითხეს მას მისმა მოწაფეებმა და უთხრეს: რატომ ამბობენ მწიგნობრები, რომ პირველად ელიას მართებს მოსვლა?

¹¹ხოლო იესომ მიუგო და უთხრა მათ: პირველად ელია მოვა და აღადგენს ყოველივეს.

¹²ხოლო გეუბნებით თქვენ, რომ ელია უკვე მოვიდა და ვერ იცნეს იგი, არამედ მოექცნენ მას, როგორც უნდოდათ; და ასევე ძეს კაცისასაც მოელის ვნება მათგან.

¹³მაშინ მიხვდნენ მოწაფეები, რომ იოანე ნათლისმცემელზე უთხრა მათ.

¹⁴და როდესაც მივიდნენ ისინი ხალხთან, მოვიდა მასთან ერთი კაცი, მუხლი მოუდრიკა მას და უთხრა:

¹⁵უფალო, შეიწყალე ჩემი ძე, რადგან მთვარეულია და საშინლად იტანჯება; ხშირად ვარდება ცეცხლში და ხშირად — წყალში.

¹⁶და მოვუყვანე იგი შენს მოწაფეებს და ვერ შეძლეს მისი განკურნება.

¹⁷ხოლო იესომ მიუგო და უთხრა: ო, მოდგმავ ურწმუნო და უკუღმართო, როდემდე ვიქნები თქვენთან? როდემდე გიტვირთავთ თქვენ? მომიყვანეთ მე იგი აქ.

¹⁸და შერისხა იგი იესომ და გავიდა მისგან ეშმაკი და განიკურნა ყრმა იმ დროიდან.

¹⁹მაშინ მივიდნენ მოწაფეები იესოსთან და განმარტოებით უთხრეს: რატომ ვერ შევძელით ჩვენ მისი განდევნა?

²⁰ხოლო იესომ უთხრა მათ: თქვენი მცირედმორწმუნეობის გამო; რადგან ამინ გეუბნებით თქვენ: თუ გექნებათ რწმენა მდოგვის მარცვლისოდენა და ეტყვით ამ მთას: გადადექი აქედან იქით, — გადადგება, და არაფერი იქნება შეუძლებელი თქვენთვის;

²¹ხოლო ეს მოდგმა არ განიდევნება, თუ არა ლოცვითა და მარხვით.

²²და როცა იმყოფებოდნენ ისინი გალილეაში, უთხრა მათ იესომ: მოელის ძეს კაცისას გადაცემა კაცთა ხელში

²³და მოკლავენ მას და მესამე დღეს აღდგება. ხოლო ისინი შეწუხდნენ ძლიერ.

²⁴და როდესაც მივიდნენ ისინი კაპერნაუმში, მოვიდნენ დიდრაქმის ამკრეფნი პეტრესთან და უთხრეს: თქვენი მოძღვარი არ გადაიხდის დიდრაქმას?

²⁵ხოლო მან უთხრა: ჰო. და როცა შევიდა სახლში, დაასწრო მას იესომ და უთხრა: რას ფიქრობ შენ, სიმონ, ამ ქვეყნის მეფენი ვისგან იღებენ ხარკს ან გადასახადს, თავისი შვილებისგან თუ უცხოებისგან?

²⁶უთხრა მას პეტრემ: უცხოებისგან. მიუგო მას იესომ: ამიტომ თავისუფლები არიან შვილები;

²⁷ხოლო რომ არ დავაბრკოლოთ ისინი, მიდი ზღვასთან, ჩააგდე ანკესი და თევზი, რომელიც პირველად ამოჰყვება, აიღე და გაუღე მას პირი და იპოვი სტატირს, მოიტანე ის და მიეცი მათ შენთვის და ჩემთვის.