Read ახალი აღთქმა წიგნი მათესი 18 Bible Online

წიგნი მათესი 18 - ახალი აღთქმა bible

წიგნი მათესი 18

¹იმ დროს მივიდნენ მოწაფეები იესოსთან და უთხრეს: ვინ არის უფრო დიდი ცათა სასუფეველში?

²და მოუხმო იესომ ყრმას და დააყენა იგი მათ შორის

³და უთხრა: ამინ გეუბნებით თქვენ: თუ არ მოიქცევით და არ იქნებით, როგორც ყრმები, ვერ შეხვალთ ცათა სასუფეველში;

⁴რადგან ვინც დაიმდაბლებს თავს, როგორც ეს ყრმა, იგი უფრო დიდი იქნება ცათა სასუფეველში;

⁵და ვინც შეიწყნარებს ერთ ასეთ ყრმას ჩემი სახელით, მე შემიწყნარებს;

⁶ხოლო ვინც დააბრკოლებს ერთ ამ მცირეთაგანს, რომელსაც სწამს ჩემი, უმჯობესია მისთვის, რომ დაეკიდოს წისქვილის დოლაბი მას ქედზე და დაინთქას ზღვის უფსკრულში.

⁷ვაი ამ სოფელს საცდურთაგან, რადგან გარდაუვალია საცდურთა მოსვლა; მაგრამ ვაი იმ კაცს, ვისგანაც მოდის საცდური.

⁸თუ ხელი შენი ან ფეხი შენი გაცდუნებს შენ, მოიკვეთე იგი და განაგდე შენგან: უმჯობესია შენთვის, შეხვიდე საუკუნო ცხოვრებაში ხეიბარი ან კოჭლი, ვიდრე ორი ხელი და ორი ფეხი გქონდეს და ჩავარდე საუკუნო ცეცხლში.

⁹და თუ თვალი შენი გაცდუნებს შენ, ამოიღე იგი და განაგდე შენგან: უმჯობესია შენთვის, ერთი თვალით შეხვიდე საუკუნო ცხოვრებაში, ვიდრე ორი თვალი გქონდეს და ჩავარდე ცეცხლის გეენაში.

¹⁰იცოდეთ, არ შეურაცხყოთ ერთი ამ მცირეთაგანი, რადგან გეუბნებით თქვენ, რომ მათი ანგელოზები ცაში მარად ხედავენ ჩემი ზეცათა მამის პირს;

¹¹რადგან მოვიდა ძე კაცისა გამოსახსნელად წარწყმედილისა.

¹²რას ფიქრობთ თქვენ: რომ ჰყავდეს ერთ კაცს ასი ცხვარი და გზას ასცდეს ერთი მათგანი, არ დატოვებს ოთხმოცდაცხრამეტს მთაში, არ წავა და არ მოძებნის გზასაცდენილს?

¹³და როცა იპოვის მას, ამინ გეუბნებით თქვენ, რომ უფრო გაიხარებს იმის გამო, ვიდრე იმ ოთხმოცდაცხრამეტისა, რომლებიც გზას არ აცდენილან.

¹⁴ასევე არ არის ნება თქვენი ზეცათა მამისა, რომ წარწყმდეს ერთი ამ მცირეთაგანი.

¹⁵და თუ შეგცოდებს შენ შენი ძმა, მიდი და ამხილე იგი, როცა შენ და ის იქნებით მარტო. თუ ისმინა შენი, შეიძინე შენ ძმა,

¹⁶ხოლო თუ არ ისმინა, მიიყვანე შენთან ერთად კიდევ ერთი ან ორი, რომ ორი ან სამი მოწმის პირით დამტკიცდეს ყოველი სიტყვა (2სჯ.19,15);

¹⁷ხოლო თუ მათიც არ ისმინა, უთხარი ეკლესიას; ხოლო თუ ეკლესიისაც არ ისმინა, იყოს შენთვის, როგორც წარმართი და მეზვერე.

¹⁸ამინ გეუბნებით თქვენ: რამდენსაც შეკრავთ ქვეყანაზე, შეკრული იქნება ცაში და რამდენსაც გახსნით ქვეყანაზე, გახსნილი იქნება ცაში.

¹⁹კვლავ ამინ გეუბნებით თქვენ: თუ ორი თქვენგანი შეთანხმდება ქვეყანაზე ყველა საქმეში, რასაც ითხოვენ, ექნებათ მათ ჩემი ზეცათა მამისგან;

²⁰რადგან სადაც არის ორი ან სამი შეკრებილი ჩემი სახელით, იქ ვარ, მათ შორის.

²¹მაშინ მივიდა მასთან პეტრე და უთხრა: უფალო, რამდენგზის შემცოდოს მე ჩემმა ძმამ და მივუტევო მას? შვიდგზის?

²²უთხრა მას იესომ: არ გეუბნები შენ — შვიდგზის, არამედ სამოცდაათჯერ შვიდგზის.

²³ამიტომ ემსგავსა სასუფეველი ცათა კაცს, მეფეს, რომელმაც ინება ანგარიშის გასწორება თავის მსახურებთან.

²⁴და როდესაც დაიწყო მან ანგარიშის გასწორება, მიუყვანეს მას ერთი მოვალე ათი ათასი ტალანტისა.

²⁵და რადგან არ ჰქონდა მას, რომ დაებრუნებინა, ბრძანა ბატონმა გაყიდვა მისი ცოლისა, შვილებისა და ყველაფრისა, რაც ჰქონდა, და დაბრუნება.

²⁶დავარდა მსახური, თაყვანს სცემდა მას და ეუბნებოდა: სულგრძელი იყავი ჩემ მომართ, ბატონო, და ყველაფერს დაგიბრუნებ შენ.

²⁷შეებრალა ბატონს ის მსახური, გაუშვა იგი და ვალიც აპატია მას.

²⁸და როცა გავიდა ის მსახური, ნახა ერთი თანამსახური, რომელსაც ემართა მისი ასი დინარი; შეიპყრო იგი, ახრჩობდა და ეუბნებოდა: დამიბრუნე, რაც გმართებს.

²⁹ფეხებში ჩაუვარდა მას თანამსახური, ევედრებოდა მას და ეუბნებოდა: სულგრძელი იყავი ჩემ მომართ და ყველაფერს დაგიბრუნებ შენ;

³⁰ხოლო მან არ ისურვა, არამედ წავიდა და ჩააგდო იგი საპყრობილეში, ვიდრე არ დაუბრუნებდა ვალს.

³¹და როცა ნახეს მისმა თანამსახურებმა, რაც მოხდა, ძლიერ შეწუხდნენ, მივიდნენ და აუწყეს თავის ბატონს ყველაფერი, რაც მოხდა.

³²მაშინ უხმო მას მისმა ბატონმა და უთხრა მას: ბოროტო მსახურო, მთელი ის ვალი გაპატიე შენ, რადგან მევედრებოდი მე;

³³განა არ გმართებდა, შენც შეგეწყალებინა შენი თანამსახური, როგორც მე შენ შეგიწყალე?

³⁴და განრისხდა მისი ბატონი და გადასცა იგი მტანჯველებს, ვიდრე არ დაუბრუნებდა მთელ ვალს.

³⁵ასევე მოგექცევათ თქვენ ჩემი ზეცათა მამა, თუ არ მიუტევებთ თითოეული მთელი თქვენი გულით თქვენს ძმას მის შეცოდებებს.