Read ახალი აღთქმა წიგნი მათესი 19 Bible Online

წიგნი მათესი 19 - ახალი აღთქმა bible

წიგნი მათესი 19

¹და იყო, როცა დაასრულა იესომ ეს სიტყვები, წავიდა გალილეიდან და მივიდა ჰურიასტანის საზღვრებთან იორდანის გაღმა.

²და გაჰყვა მას დიდძალი ხალხი და განკურნა ისინი იქ.

³და მივიდნენ მასთან ფარისევლები და სცდიდნენ რა მას, ეუბნებოდნენ: მართებულია კაცისთვის, რომ გაუშვას თავისი ცოლი ნებისმიერი მიზეზით?

⁴ხოლო მან მიუგო და უთხრა მათ: არ ამოგიკითხავთ, რომ ვინც დაბადა, დასაბამიდან მამაკაცად და დედაკაცად შექმნა ისინი (დაბ.1,27)?

⁵და თქვა: ამის გამო დატოვებს კაცი მამას და დედას და შეუერთდება თავის ცოლს; და იქნებიან ორნი ერთხორცი (დაბ.2,24).

⁶ასე რომ, აღარ არიან ორნი, არამედ ერთხორცი. ამიტომ ვინც ღმერთმა შეაუღლა, კაცი ნუ განაშორებს.

⁷უთხრეს მას: რატომღა ბრძანა მოსემ განტევების წერილის მიცემა და გაშვება?

⁸უთხრა მათ იესომ: მოსემ თქვენი გულქვაობის გამო დაგრთოთ თქვენ ნება, გაგეშვათ თქვენი ცოლები, ხოლო დასაბამიდან არ იყო ეგრე.

⁹და გეუბნებით თქვენ: ვინც გაუშვებს თავის ცოლს სიძვის მიზეზის გარეშე და სხვას შეირთავს, მრუშობს; და ვინც გაშვებულს შეირთავს, ისიც მრუშობს.

¹⁰უთხრეს მას მისმა მოწაფეებმა: თუ ასეთია მამაკაცის ვალი დედაკაცის მიმართ, უმჯობესია, არ დაქორწინდეს;

¹¹ხოლო მან უთხრა მათ: ყველა ვერ იტევს ამ სიტყვას, არამედ რომელთაც მიცემული აქვთ;

¹²რადგან არიან საჭურისები, რომლებიც დედის მუცლიდან იშვნენ ასე; და არიან საჭურისები, რომლებიც დასაჭურისდნენ კაცთაგან; და არიან საჭურისები, რომლებმაც დაისაჭურისეს თავი ცათა სასუფევლისთვის. ვისაც შეუძლია დატევა, დაიტიოს.

¹³მაშინ მიუყვანეს მას ყრმები, რომ ხელი დაედო მათთვის და ეკურთხებინა, ხოლო მოწაფეები კიცხავდნენ მათ.

¹⁴ხოლო იესომ უთხრა მათ: აცადეთ ყრმებს და ნუ აბრკოლებთ მათ, რომ მოვიდნენ ჩემთან, რადგან ასეთების არის სასუფეველი ცათა.

¹⁵და დაადო მათ ხელი და წავიდა იქიდან.

¹⁶და აჰა, მივიდა ვიღაც და უთხრა: მოძღვარო სახიერო, რა სიკეთე გავაკეთო, რომ მქონდეს საუკუნო ცხოვრება?

¹⁷ხოლო მან უთხრა მას: რად მეძახი მე სახიერს? არავინ არის სახიერი, არამედ მხოლოდ ღმერთი, ხოლო თუ გსურს შესვლა საუკუნო ცხოვრებაში, დაიცავი მცნებები.

¹⁸უთხრა მას: რომლები? ხოლო იესომ უთხრა: არ მოკლა, არ იმრუშო, არ მოიპარო, ცილი არ დასწამო,

¹⁹პატივი ეცი მამას და დედას და შეიყვარე მოყვასი შენი, როგორც თავი შენი (გამ.20,12-16; ლევ.19,18).

²⁰უთხრა მას ჭაბუკმა: ამ ყველაფერს ვიცავდი ჩემი სიყრმიდან; რაღა მაკლია?

²¹უთხრა მას იესომ: თუ გინდა, სრულყოფილი იყო, წადი, გაყიდე შენი ქონება და მიეცი გლახაკებს და გექნება საუნჯე ცაში; და მოდი და გამომყევი მე.

²²და როცა გაიგონა ჭაბუკმა ეს სიტყვა, წავიდა დამწუხრებული, რადგან დიდი ქონება ჰქონდა.

²³ხოლო იესომ უთხრა თავის მოწაფეებს: ამინ გეუბნებით თქვენ, რომ მდიდარი ძნელად შევა ცათა სასუფეველში;

²⁴და კვლავ გეუბნებით თქვენ: უფრო ადვილია აქლემის ნემსის ყუნწში გასვლა, ვიდრე მდიდრის შესვლა ღვთის სასუფეველში.

²⁵როდესაც გაიგონეს ეს მისმა მოწაფეებმა, განცვიფრდნენ ძლიერ და ამბობდნენ: ვიღას შეუძლია ცხონება?

²⁶შეხედა იესომ და უთხრა მათ: კაცთათვის ეს შეუძლებელია, ხოლო ღვთისათვის ყოველივე შესაძლებელია.

²⁷მაშინ მიუგო პეტრემ და უთხრა მას: აჰა, ჩვენ დავტოვეთ ყველაფერი და გამოგყევით შენ; რა იქნება ჩვენთვის?

²⁸ხოლო იესომ უთხრა მათ: ამინ გეუბნებით თქვენ, რომ, რომლებიც გამომყევით მე, მომავალი შობისას, როცა დაჯდება ძე კაცისა თავისი დიდების ტახტზე, დასხდებით თქვენც თორმეტ ტახტზე და განსჯით ისრაელის თორმეტ ტომს;

²⁹და ყველა, ვინც დატოვა სახლი ან ძმები, ან დები, ან მამა, ან დედა, ან ცოლი, ან შვილები, ან მამულები ჩემი სახელისათვის, ასწილად მიიღებს და საუკუნო ცხოვრებას დაიმკვიდრებს;

³⁰ხოლო მრავალი პირველი იქნება უკანასკნელი და უკანასკნელი პირველი.