Read ახალი აღთქმა წიგნი მათესი 2 Bible Online

წიგნი მათესი 2 - ახალი აღთქმა bible

წიგნი მათესი 2

¹ხოლო იესოს შობისას ჰურიასტანის ბეთლემში, ჰეროდე მეფის დროს, აჰა, მოგვები აღმოსავლეთიდან მოვიდნენ იერუსალიმში და ამბობდნენ:

²სად არის ახლადშობილი მეფე იუდეველთა? რადგან ვიხილეთ მისი ვარსკვლავი აღმოსავლეთში და მოვედით, რომ თაყვანი ვცეთ მას.

³ეს რომ გაიგო ჰეროდე მეფემ, შეძრწუნდა და მთელი იერუსალიმი მასთან ერთად;

⁴და შეკრიბა ყველა მღვდელმთავარი და ერის მწიგნობარი და გამოიკითხა მათგან, სად უნდა შობილიყო ქრისტე;

⁵ხოლო მათ უთხრეს მას: ჰურიასტანის ბეთლემში, — რადგან ასეა დაწერილი წინასწარმეტყველის მიერ:

⁶და შენ, ბეთლემო, იუდას ქვეყანავ, არაფრით ხარ უმცირესი იუდას მთავართა შორის, რადგან შენგან გამოვა წინამძღვარი, რომელიც დამწყემსავს ჩემს ერს, ისრაელს (მიქ.5,2).

⁷მაშინ ჰეროდემ ფარულად მოუხმო მოგვებს და გამოიკითხა მათგან დრო ვარსკვლავის გამოჩენისა.

⁸და გაგზავნა ისინი ბეთლემში და უთხრა: მიდით და ზედმიწევნით გამოიკითხეთ ყრმის შესახებ და, როცა იპოვით, მაცნობეთ მე, რომ მეც მივიდე და თაყვანი ვცე მას.

⁹ხოლო მათ მოუსმინეს რა მეფეს, წავიდნენ. და აჰა, ვარსკვლავი, რომელიც იხილეს აღმოსავლეთში, წინ უძღოდა მათ, ვიდრე არ მივიდა და დაადგა იმ ადგილს, სადაც იყო ყრმა

¹⁰ხოლო მათ, როდესაც იხილეს ვარსკვლავი, ფრიად გაიხარეს დიდი სიხარულით.

¹¹და შევიდნენ რა სახლში, იხილეს ყრმა მარიამთან, მის დედასთან, დაეცნენ და თაყვანი სცეს მას; და გახსნეს თავისი საგანძურები და მიართვეს მას ძღვენი: ოქრო, გუნდრუკი და მური.

¹²და მიიღეს ბრძანება ჩვენებით, რომ არ მიბრუნებულიყვნენ ჰეროდესთან, და სხვა გზით წავიდნენ თავის ქვეყანაში.

¹³ხოლო როდესაც გაშორდნენ ისინი, აჰა, ანგელოზი უფლისა გამოეცხადა ჩვენებით იოსებს და უთხრა: ადექი და წაიყვანე ყრმა და დედა მაგისი და გაიქეცი ეგვიპტეში და იყავი იქ, ვიდრე არ გეტყვი შენ, რადგან სურს ჰეროდეს მოძებნა ყრმისა და დაღუპვა მისი;

¹⁴ხოლო იგი ადგა და წაიყვანა ყრმა და დედა მისი ღამით და წავიდა ეგვიპტეში.

¹⁵და იყო იქ ჰეროდეს აღსასრულამდე, რათა აღსრულებულიყო ნათქვამი უფლისა წინასწარმეტყველის მიერ, რომელიც ამბობს: ეგვიპტიდან მოვუწოდე ჩემს ძეს (ოს.11,1).

¹⁶მაშინ ჰეროდემ ნახა, რომ შერცხვენილი აღმოჩნდა მოგვებისგან, და განრისხდა ძლიერ, გაგზავნა და ამოწყვიტა ყველა ყრმა ბეთლემსა და მთელ მის საზღვრებში, ორი წლისა და უმცროსი, იმ დროის მიხედვით, როგორც გამოიკითხა მოგვებისგან.

¹⁷მაშინ აღსრულდა ნათქვამი იერემია წინასწარმეტყველის მიერ, რომელიც ამბობს:

¹⁸ხმა გაისმა რამაში, გოდება, ტირილი და გლოვა დიდი; რაქელი დასტირის თავის შვილებს და არ უნდა ნუგეშისცემა, რადგან აღარ არიან (იერ.31,15).

¹⁹ხოლო როდესაც აღესრულა ჰეროდე, აჰა, ანგელოზი უფლისა ჩვენებით გამოეცხადა იოსებს ეგვიპტეში

²⁰და უთხრა: ადექი და წაიყვანე ყრმა და დედა მაგისი და წადი ისრაელის ქვეყანაში, რადგან დაიხოცნენ, ვინც ეძებდა ყრმის სულს.

²¹ხოლო იგი ადგა და წაიყვანა ყრმა და დედა მისი და მივიდა ისრაელის ქვეყანაში

²²და როდესაც გაიგო, რომ არქელაოსი მეფობდა ჰურიასტანში, თავისი მამის, ჰეროდეს, ნაცვლად, შეეშინდა იქ მისვლისა და ბრძანება მიიღო ჩვენებით, გაშორდა და წავიდა გალილეის მხარეში.

²³და მივიდა და დამკვიდრდა ქალაქში, რომელსაც ჰქვია ნაზარეთი, რათა აღსრულებულიყო თქმული წინასწარმეტყველთა მიერ, რომ ნაზორეველი ეწოდება (მსჯ.13,5).