Read ახალი აღთქმა წიგნი მათესი 20 Bible Online

წიგნი მათესი 20 - ახალი აღთქმა bible

წიგნი მათესი 20

¹რადგან მსგავსია სასუფეველი ცათა კაცისა, სახლის პატრონისა, რომელიც გამოვიდა განთიადისას მუშაკების დასაქირავებლად თავის ვენახში.

²და შეუთანხმდა მუშაკებს დინარზე დღეში და გაგზავნა ისინი თავის ვენახში.

³და გავიდა მესამე ჟამზე და ნახა სხვები, უქმად მდგარნი მოედანზე,

⁴და უთხრა მათ: წადით თქვენც ჩემს ვენახში და სამართლიანად მოგცემთ თქვენ; ხოლო ისინი წავიდნენ.

⁵შემდეგ გავიდა მეექვსე და მეცხრე ჟამზე და ასევე მოიქცა.

⁶ხოლო მეთერთმეტე ჟამზე გავიდა და იპოვა სხვები, უქმად მდგარნი, და უთხრა მათ: რას დგახართ აქ მთელი დღე უქმად?

⁷უთხრეს მას: არავინ დაგვიქირავა ჩვენ. უთხრა მათ: წადით თქვენც ჩემს ვენახში და სამართლიანად მიიღებთ.

⁸და როდესაც მოსაღამოვდა, უთხრა ვენახის პატრონმა თავის მოურავს: დაუძახე მუშაკებს და მიეცი მათ საზღაური; დაიწყე უკანასკნელიდან პირველამდე.

⁹და მივიდნენ მეთერთმეტე ჟამისანი და მიიღეს თითო დინარი;

¹⁰მივიდნენ პირველებიც და ეგონათ, რომ მეტს მიიღებდნენ, და მიიღეს მათაც თითო დინარი.

¹¹და როცა მიიღეს, დრტვინავდნენ სახლის პატრონზე

¹²და ამბობდნენ: ამ უკანასკნელებმა ერთი ჟამი იღვაწეს და გაგვითანაბრე ისინი ჩვენ, რომლებმაც ვიტვირთეთ დღის სიმძიმე და სიცხე.

¹³ხოლო მან მიუგო ერთ მათგანს და უთხრა: მოყვასო, უსამართლოდ არ გექცევი შენ; განა დინარზე არ შემითანხმდი მე?

¹⁴აიღე შენი და წადი; ხოლო მე მინდა, ამ უკანასკნელსაც მივცე, როგორც შენ.

¹⁵ნუთუ არ შემიძლია, როგორც მინდა, ისე მოვექცე ჩემსას? თუ თვალი შენი ბოროტია იმის გამო, რომ მე კეთილი ვარ?

¹⁶ასე იქნებიან უკანასკნელები პირველები და პირველები — უკანასკნელები, რადგან ბევრია მოწვეული და ცოტა — რჩეული.

¹⁷და როდესაც ადიოდა იესო იერუსალიმში, წაიყვანა თორმეტი მოწაფე განმარტოებით და გზაში უთხრა მათ:

¹⁸აჰა, ავდივართ იერუსალიმში და ძე კაცისა გადაეცემა მღვდელმთავრებსა და მწიგნობრებს და მიუსჯიან მას სიკვდილს

¹⁹და გადასცემენ მას წარმართებს, რათა დასცინონ, გვემონ და ჯვარს აცვან, და მესამე დღეს აღდგება.

²⁰მაშინ მივიდა მასთან დედა ზებედეს ძეებისა თავის ძეებთან ერთად, თაყვანი სცა და ითხოვა რაღაცა მისგან;

²¹ხოლო მან უთხრა მას: რა გინდა? უთხრა მას: თქვი, რომ დაჯდეს ეს ჩემი ორი ძე ერთი შენ მარჯვნივ და ერთი შენ მარცხნივ შენს სასუფეველში.

²²მიუგო იესომ და უთხრა: არ იცით, რას ითხოვთ. შეგიძლიათ, შესვათ სასმისი, რომელიც მე უნდა შევსვა, ან ნათლისღებით, რომლითაც მე ნათელს ვიღებ, ნათელი მიიღოთ? უთხრეს მათ: შეგვიძლია.

²³და უთხრა მათ იესომ: ჩემს სასმისს შესვამთ და ნათლისღებით, რომლითაც მე ნათელს ვიღებ, ნათელს მიიღებთ, ხოლო დაჯდომა ჩემ მარჯვნივ და მარცხნივ არ არის ჩემი მისაცემი, არამედ ვისთვისაც გამზადებულია ჩემი მამის მიერ.

²⁴და როცა გაიგონა იმ ათმა, კიცხავდა ორ ძმას;

²⁵ხოლო იესომ მოუხმო მათ და უთხრა: იცით, რომ წარმართთა მთავრები ბატონობენ მათზე და დიდებულები ხელმწიფობენ მათზე;

²⁶ხოლო ასე ნუ იქნება თქვენ შორის, არამედ რომელსაც უნდა თქვენ შორის, იყოს დიდი, იყოს თქვენი მსახური;

²⁷და რომელსაც უნდა თქვენ შორის, იყოს პირველი, იყოს თქვენი მონა,

²⁸როგორც ძე კაცისა არ მოვიდა, რომ ემსახურონ, არამედ ემსახუროს და მისცეს თავისი სული მრავალთა გამოსასყიდად.

²⁹და როცა გამოვიდნენ ისინი იერიქოდან, გამოჰყვა მას დიდძალი ხალხი.

³⁰და აჰა, ორი ბრმა იჯდა გზის პირას და, როდესაც გაიგონეს, რომ იესო მოდის, შეღაღადეს და თქვეს: შეგვიწყალე ჩვენ, უფალო, ძეო დავითისაო;

³¹ხოლო ხალხი კიცხავდა მათ, რათა დადუმებულიყვნენ; მაგრამ ისინი უფრო მეტად ღაღადებდნენ და ამბობდნენ: შეგვიწყალე ჩვენ, უფალო, ძეო დავითისაო.

³²და შეჩერდა იესო, მოუხმო მათ და უთხრა: რა გინდათ, რომ გაგიკეთოთ თქვენ?

³³უთხრეს მას: უფალო, რომ აგვეხილოს ჩვენ თვალები.

³⁴და შეებრალა იესოს, შეეხო მათ თვალებს და მაშინვე აეხილათ და გაჰყვნენ მას.