Read ახალი აღთქმა წიგნი მათესი 21 Bible Online

წიგნი მათესი 21 - ახალი აღთქმა bible

წიგნი მათესი 21

¹და როდესაც მიუახლოვდნენ იერუსალიმს და მივიდნენ ბეთბაგეში, ზეთისხილის მთასთან, მაშინ იესომ გაგზავნა ორი მოწაფე

²და უთხრა მათ: წადით დაბაში, რომელიც არის თქვენ პირდაპირ, და მაშინვე იპოვით დაბმულ ვირს და კვიცს მასთან ერთად; ახსენით და მომიყვანეთ მე.

³და თუ ვინმე გეტყვით თქვენ რამეს, უთხარით, რომ უფალს სჭირდება ისინი, და მაშინვე გამოგზავნის მათ;

⁴ხოლო ეს ყოველივე მოხდა, რათა აღსრულებულიყო ნათქვამი წინასწარმეტყველის მიერ, რომელიც ამბობს:

⁵უთხარით სიონის ასულს: აჰა, მეუფე შენი მოდის შენთან, მშვიდი, და ზის ვირზე და კვიცზე, სახედრის ნაშობზე (ეს.62,11; ზაქ.9,9).

⁶ხოლო მოწაფეები წავიდნენ და მოიქცნენ ისე, როგორც უბრძანა მათ იესომ —

⁷მიუყვანეს ვირი და კვიცი და დადეს მათზე თავისი სამოსი და დაჯდა მასზე.

⁸და დიდძალი ხალხი უფენდა თავის სამოსს გზაზე, ხოლო სხვები ჭრიდნენ რტოებს ხეებიდან და უფენდნენ გზაზე;

⁹და ხალხი, რომელიც წინ უძღოდა და რომელიც უკან მიჰყვებოდა, ღაღადებდა და ამბობდა: ოსანა დავითის ძეს! კურთხეულია, მომავალი უფლის სახელით (ფს.117,26)! ოსანა მაღალთა შინა!

¹⁰და როდესაც შევიდა იგი იერუსალიმში, შეიძრა მთელი ქალაქი და ამბობდნენ: ვინ არის ეს?

¹¹ხოლო ხალხი ამბობდა: ეს არის იესო წინასწარმეტყველი გალილეის ნაზარეთიდან.

¹²და შევიდა იესო ღვთის ტაძარში და გამოყარა ყველა, ვინც ყიდდა და ყიდულობდა ტაძარში; და მეკერმეთა მაგიდები და მტრედის გამყიდველთა დასასხდომები დაამხო

¹³და უთხრა მათ: წერია: ჩემს სახლს სალოცავი სახლი ეწოდოს, ხოლო თქვენ გიქცევიათ იგი ავაზაკთა გამოქვაბულად (ეს.56,7; იერ.7,11)

¹⁴და მივიდნენ მასთან ბრმები და კოჭლები ტაძარში და განკურნა ისინი.

¹⁵და როცა ნახეს მღვდელმთავრებმა და მწიგნობრებმა სასწაულები, რომლებიც აღასრულა, და ყრმები, რომლებიც ღაღადებდნენ ტაძარში და ამბობდნენ: ოსანა დავითის ძეს, კიცხავდნენ

¹⁶და ეუბნებოდნენ მას: გესმის, ესენი რას ამბობენ? ხოლო იესომ უთხრა მათ: ჰო, არასოდეს ამოგიკითხავთ: ჩვილთა და მეძუძურ ყრმათა პირით დაამტკიცე ქება (ფს.8,3)?

¹⁷და დატოვა ისინი და გავიდა ქალაქის გარეთ, ბეთანიაში, და დარჩა იქ.

¹⁸და განთიადისას, როცა ბრუნდებოდა ქალაქში, მოშივდა;

¹⁹და დაინახა ერთი ლეღვის ხე გზაზე, მივიდა მასთან და ვერაფერი იპოვა მასზე, არამედ მარტო ფოთლები და უთხრა მას: ნუღარ გამოვა შენგან ნაყოფი საუკუნოდ; და გახმა უცბად ლეღვის ხე.

²⁰და როდესაც ნახეს მოწაფეებმა, გაუკვირდათ და თქვეს: როგორ უცბად გახმა ლეღვის ხე;

²¹ხოლო იესომ მიუგო და უთხრა მათ: ამინ გეუბნებით თქვენ: თუ გექნებათ რწმენა და არ დაეჭვდებით, არა მხოლოდ ლეღვის ხის გახმობას შეძლებთ, არამედ ამ მთასაც თუ ეტყვით: აღმოიფხვერი და ჩავარდი ზღვაში, — იქნება ასე;

²²და ყველაფერი, რასაც ითხოვთ ლოცვისას რწმენით, მოგეცემათ.

²³და როცა მოვიდა იგი ტაძარში და ასწავლიდა, მივიდნენ მასთან მღვდელმთავრები და ერის უხუცესები და უთხრეს: რომელი ხელმწიფებით აკეთებ ამას და ვინ მოგცა შენ ეს ხელმწიფება?

²⁴მიუგო იესომ და უთხრა მათ: გკითხავთ მეც თქვენ ერთ სიტყვას და თუ მეტყვით მე, მეც გეტყვით თქვენ, რომელი ხელმწიფებით ვაკეთებ ამას.

²⁵ნათლისცემა იოანესი საიდან იყო, ზეციდან თუ კაცთაგან? ხოლო ისინი ბჭობდნენ თავისთვის და ამბობდნენ: თუ ვიტყვით: ზეციდან, — გვეტყვის ჩვენ: რატომ არ ირწმუნეთ მისი?

²⁶ხოლო თუ ვიტყვით: კაცთაგან, — გვეშინია ხალხისა, რადგან ყველამ აღიარა იოანე, როგორც წინასწარმეტყველი.

²⁷და მიუგეს იესოს და უთხრეს: არ ვიცით. უთხრა მათ მანაც: არც მე გეტყვით თქვენ, რომელი ხელმწიფებით ვაკეთებ ამას.

²⁸როგორ გგონიათ თქვენ? ერთ კაცს ჰყავდა ორი შვილი; მივიდა პირველთან და უთხრა: შვილო, წადი დღეს და იმუშავე ჩემს ვენახში;

²⁹ხოლო მან მიუგო და უთხრა: არ მინდა, — ბოლოს კი ინანა და წავიდა.

³⁰და მივიდა მეორესთან და უთხრა ასევე; ხოლო მან მიუგო და უთხრა: მივდივარ, ბატონო, და არ წავიდა.

³¹ამ ორთაგან რომელმა შეასრულა მამის ნება? უთხრეს მას: პირველმა. უთხრა მათ იესომ: ამინ ეუბნებით თქვენ, რომ მეზვერეები და მეძავები წინ წაგიძღვებიან თქვენ ღვთის სასუფეველში,

³²რადგან მოვიდა იოანე თქვენთან სიმართლის გზით და არ ირწმუნეთ მისი; მეზვერეებმა და მეძავებმა კი ირწმუნეს მისი; ხოლო თქვენ იხილეთ და არც ბოლოს შეინანეთ, რომ გერწმუნათ მისი.

³³სხვა იგავი ისმინეთ: ერთი კაცი იყო, სახლის პატრონი, რომელმაც გააშენა ვენახი და ღობე შემოავლო მას, ამოთხარა მასში საწნახელი და ააშენა გოდოლი და გადასცა იგი მიწათმოქმედებს და წავიდა;

³⁴ხოლო როდესაც მოახლოვდა ჟამი ნაყოფისა, გაგზავნა თავისი მონები მიწათმოქმედებთან თავისი ნაყოფის მისაღებად.

³⁵და შეიპყრეს მიწათმოქმედებმა მისი მონები; ზოგს სცემეს, ზოგი მოკლეს, ხოლო ზოგი ჩაქოლეს.

³⁶შემდეგ გაგზავნა სხვა მონები, პირველებზე მეტნი, და მათაც ასევე მოექცნენ.

³⁷და ბოლოს გაგზავნა მათთან თავისი ძე და თქვა: მოერიდებათ ჩემი ძისა;

³⁸ხოლო მიწათმოქმედებმა, როდესაც დაინახეს ძე, თქვეს თავის გულში: ეს არის მემკვიდრე; მოდი, მოვკლათ იგი და დავეუფლოთ მის სამკვიდრებელს.

³⁹და შეიპყრეს იგი და გაიყვანეს ვენახის გარეთ და მოკლეს.

⁴⁰როდესაც მივა ვენახის პატრონი, რას უზამს იმ მიწათმოქმედებს?

⁴¹უთხრეს მას: ბოროტებს ბოროტად ამოწყვეტს და ვენახს გადასცემს სხვა მიწათმოქმედებს, რომლებიც მისცემენ მას ნაყოფს თავის დროზე.

⁴²უთხრა მათ იესომ: არასოდეს ამოგიკითხავთ წერილში: ლოდი, რომელიც დაიწუნეს მშენებლებმა, იგი იქცა თავკიდურად, უფლის მიერ იყო ეს და საკვირველია ჩვენს თვალში (ფს.117,22-23)?

⁴³ამიტომ გეუბნებით თქვენ, რომ წაგერთმევათ თქვენ სასუფეველი ღვთისა და მიეცემა მოდგმას, რომელიც გამოიღებს მის ნაყოფს.

⁴⁴და ვინც დაეცემა ამ ლოდზე, შეიმუსრება და ვისაც დაეცემა, გასრესს მას.

⁴⁵და გაიგონეს რა მღვდელმთავრებმა და ფარისევლებმა მისი იგავები, მიხვდნენ, რომ მათზე თქვა,

⁴⁶და ეძებდნენ მას შესაპყრობად და ეშინოდათ ხალხისა, რადგან წინასწარმეტყველად აღიარებდნენ მას.