Read ახალი აღთქმა წიგნი მათესი 22 Bible Online

წიგნი მათესი 22 - ახალი აღთქმა bible

წიგნი მათესი 22

¹და მიუგო იესომ კვლავ იგავებით და უთხრა მათ:

²ემსგავსა სასუფეველი ცათა კაცს, მეფეს, რომელმაც გაუმართა ქორწილი თავის ძეს.

³და გაგზავნა თავისი მონები, რათა მოეწვიათ ქორწილში წვეულნი, და არ ინებეს მოსვლა.

⁴კვლავ გაგზავნა სხვა მონები და უთხრა: უთხარით წვეულებს: აჰა, სადილი ჩემი მზად არის, ზვარაკები ჩემი და ნასუქი საქონელი დაკლულია და ყველაფერი მზად არის; მოდით ქორწილში.

⁵მაგრამ ისინი უგულისხმოდ მოიქცნენ და წავიდნენ: ზოგი საკუთარ ყანაში, ზოგი თავის სავაჭროში;

⁶ხოლო დანარჩენებმა შეიპყრეს მისი მონები, აგინეს და დახოცეს.

⁷და მეფე განრისხდა, გაგზავნა თავისი ჯარი და ამოწყვიტა ის მკვლელები და მათი ქალაქი გადაწვა.

⁸მაშინ უთხრა თავის მონებს: ქორწილი მზად არის, ხოლო წვეულები არ იყვნენ ღირსნი.

⁹წადით გზათა გასაყრებზე და, რამდენსაც იპოვით, მოიწვიეთ ქორწილში.

¹⁰და გავიდნენ ის მონები გზებზე და შეკრიბეს ყველა, რამდენიც იპოვეს, ბოროტი და კეთილი; და გაივსო ქორწილი მეინახეებით;

¹¹ხოლო როცა შევიდა მეფე მეინახეთა სანახავად, იხილა იქ კაცი, რომელსაც არ ემოსა საქორწილო სამოსი,

¹²და უთხრა მას: მოყვასო, როგორ შემოხვედი აქ, რადგან არა გაქვს საქორწილო სამოსი? ხოლო იგი დუმდა.

¹³მაშინ უთხრა მეფემ თავის მსახურებს: შეუკარით მაგას ფეხები და ხელები და გააგდეთ იგი ბნელ გარესკნელში; იქ იქნება ტირილი და კბილთა ღრჭენა;

¹⁴რადგან ბევრია მოწვეული და ცოტა — რჩეული.

¹⁵მაშინ წავიდნენ ფარისევლები და შეთანხმდნენ, როგორ დაეგოთ მახე მისთვის სიტყვით.

¹⁶და მიუგზავნეს მას თავისი მოწაფეები ჰეროდიანებთან ერთად და უთხრეს: მოძღვარო, ვიცით, რომ ჭეშმარიტი ხარ და ღვთის გზას ჭეშმარიტებით ასწავლი და არ პირმოთნეობ შენ არავისთან, რადგან არ უყურებ კაცის სახეს;

¹⁷ამიტომ გვითხარი ჩვენ, რას ფიქრობ შენ: მართებულია ხარკის მიცემა კეისრისთვის თუ არა?

¹⁸მიხვდა იესო მათ უკეთურებას და უთხრა: რად მცდით მე, თვალთმაქცნო?

¹⁹მაჩვენეთ მე ხარკის მონეტა; ხოლო მათ მიუტანეს მას დინარი.

²⁰და უთხრა მათ: ვისია ეს სახე და წარწერა?

²¹უთხრეს მას: კეისრისა. მაშინ უთხრა მათ: მიეცით კეისრისა კეისარს და ღვთისა — ღმერთს.

²²და როცა გაიგონეს, გაუკვირდათ და დატოვეს იგი და წავიდნენ.

²³იმ დღეს მივიდნენ მასთან სადუკევლები, რომლებიც ამბობდნენ: არ არსებობს აღდგომა, — და ჰკითხეს მას

²⁴და უთხრეს: მოძღვარო, მოსემ თქვა: თუ ვინმე მოკვდეს და არ ჰყავდეს შვილები, შეირთოს მისმა ძმამ მისი ცოლი და აღუდგინოს თესლი თავის ძმას (2სჯ.25,5).

²⁵იყო ჩვენ შორის შვიდი ძმა; და პირველმა იქორწინა და მოკვდა და არ დარჩა თესლი და დაუტოვა თავისი ცოლი თავის ძმას;

²⁶ასევე მეორემ და მესამემ — მეშვიდემდე;

²⁷ხოლო ყველაზე ბოლოს მოკვდა დედაკაციც.

²⁸აღდგომისას შვიდთაგან რომლის ცოლი იქნება, რადგან ყველას ჰყავდა იგი?

²⁹მიუგო იესომ და უთხრა მათ: ცდებით, რადგან არ იცით წერილი, არც ძალა ღვთისა;

³⁰რადგან აღდგომისას არც ქორწინდებიან და არც თხოვდებიან, არამედ როგორც ღვთის ანგელოზები, ცაში არიან;

³¹ხოლო მკვდართა აღდგომის შესახებ არ ამოგიკითხავთ თქვენთვის თქმული ღვთის მიერ, რომელიც ამბობს:

³²მე ვარ ღმერთი აბრაამისა და ღმერთი ისააკისა და ღმერთი იაკობისა (გამ.3,6). არ არის ღმერთი — ღმერთი მკვდართა, არამედ ცოცხალთა.

³³და გაიგონა ეს ხალხმა და განცვიფრდა მისი მოძღვრებით.

³⁴ხოლო როცა ფარისევლებმა გაიგონეს, რომ გააჩუმა სადუკევლები, შეიკრიბნენ ერთად

³⁵და ჰკითხა ერთმა მათგანმა, სჯულისმოძღვარმა, სცდიდა მას და ეუბნებოდა:

³⁶მოძღვარო, რომელი მცნებაა უდიდესი სჯულში?

³⁷ხოლო იესომ უთხრა მას: შეიყვარე უფალი ღმერთი შენი მთელი შენი გულით და მთელი შენი სულით და მთელი შენი გონებით (მსჯ.6,5).

³⁸ეს არის პირველი და უდიდესი მცნება;

³⁹და მეორე — მსგავსი ამისი: შეიყვარე მოყვასი შენი, როგორც თავი შენი (ლევ.19,18).

⁴⁰ამ ორ მცნებაზეა მთელი სჯული და წინასწარმეტყველნი დამოკიდებული.

⁴¹ხოლო როდესაც შეიკრიბნენ ფარისევლები, ჰკითხა მათ იესომ

⁴²და უთხრა: რას ფიქრობთ თქვენ ქრისტეზე, ვისი ძე არის? უთხრეს მას: დავითისა.

⁴³უთხრა მათ: როგორღა უწოდებს დავითი მას სულით უფალს და ამბობს:

⁴⁴უთხრა უფალმა ჩემს უფალს: დაჯექი ჩემ მარჯვნივ, ვიდრე დავცემ შენს მტრებს შენ ფეხთქვეშ (ფს.109,1)?

⁴⁵თუ დავითი უწოდებს მას უფალს, როგორ არის მისი ძე?

⁴⁶და არავის შეეძლო მისთვის სიტყვის მიგება, ვეღარც გაბედა ვინმემ იმ დღიდან რამის კითხვა მისთვის.