Read ახალი აღთქმა წიგნი მათესი 23 Bible Online

წიგნი მათესი 23 - ახალი აღთქმა bible

წიგნი მათესი 23

¹მაშინ იესო ესაუბრა ხალხს და თავის მოწაფეებს

²და უთხრა: მოსეს დასაჯდომელზე დასხდნენ მწიგნობრები და ფარისევლები.

³ყოველივე, რასაც გეტყვიან თქვენ, რომ დაიცვათ, დაიცავით და გააკეთეთ, მაგრამ მათი საქმეებისამებრ ნუ გააკეთებთ, რადგან ამბობენ და არ აკეთებენ;

⁴რადგან კრავენ ტვირთს, მძიმეს და ძნელად სატვირთველს, და დებენ კაცთა მხრებზე, ხოლო თავად თითითაც არ უნდათ დაძვრა მისი;

⁵და თავის ყველა საქმეს აკეთებენ კაცთა დასანახავად, რადგან იფართოებენ თავის საცავებს და იდიდებენ თავისი სამოსლის ფოჩებს,

⁶უყვართ ინახით წინ სხდომა ნადიმებზე და წინ დასხდომა შესაკრებლებში

⁷და მისალმება მოედნებზე და რომ უწოდონ ადამიანებმა: რაბი, რაბი

⁸ხოლო თქვენ ნუ იწოდებით: რაბი, რადგან ერთია მოძღვარი თქვენი — ქრისტე; ხოლო თქვენ ყველანი ძმები ხართ.

⁹და მამას ნურავის უწოდებთ თქვენ ქვეყანაზე, რადგან ერთია მამა თქვენი, რომელიც არის ზეცაში.

¹⁰ნურც იწოდებით წინამძღვრებად, რადგან ერთია წინამძღვარი თქვენი — ქრისტე;

¹¹ხოლო უდიდესი თქვენ შორის იყოს თქვენი მსახური;

¹²ხოლო ვინც აიმაღლებს თავს, დამდაბლდება და ვინც დაიმდაბლებს თავს, ამაღლდება.

¹³ვაი თქვენ, მწიგნობარნო და ფარისეველნო თვალთმაქცნო, რადგან ჭამთ ქვრივთა სახლებს და მოსაჩვენებლად ხანგრძლივად ლოცულობთ; ამის გამო მიიღებთ უმეტეს სასჯელს.

¹⁴ვაი თქვენ, მწიგნობარნო და ფარისეველნო თვალთმაქცნო, რადგან კეტავთ ცათა სასუფეველს კაცთა წინაშე; თქვენ არ შედიხართ და არც შემსვლელებს ანებებთ შესვლას.

¹⁵ვაი თქვენ, მწიგნობარნო და ფარისეველნო თვალთმაქცნო, რადგან მოივლით ზღვასა და ხმელეთს, რათა ერთი ვინმე მაინც მოაქციოთ; და როცა ეს მოხდება, აქცევთ მას გეენის ძედ თქვენზე ორჯერ მეტად.

¹⁶ვაი თქვენ, წინამძღვარნო ბრმანო, რომლებიც ამბობთ: ვინც დაიფიცებს ტაძარს, არაფერია, ხოლო ვინც დაიფიცებს ტაძრის ოქროს, ვალდებულია.

¹⁷უგუნურნო და ბრმანო, რა უფრო დიდია: ოქრო თუ ტაძარი, რომელიც განწმედს ოქროს?

¹⁸და ამბობთ: ვინც დაიფიცებს სამსხვერპლოს, არაფერია; ხოლო ვინც დაიფიცებს შესაწირავს, რომელიც მასზეა, ვალდებულია.

¹⁹უგუნურნო და ბრმანო, რა უფრო დიდია: შესაწირავი თუ სამსხვერპლო, რომელიც განწმედს შესაწირავს?

²⁰რადგან ვინც დაიფიცებს სამსხვერპლოს, იფიცებს მას და ყოველივეს, რაც მასზეა;

²¹და ვინც დაიფიცებს ტაძარს, იფიცებს მას და ვინც დამკვიდრებულია მასში;

²²და ვინც დაიფიცებს ცას, იფიცებს ღვთის ტახტს და ვინც ზის მასზე.

²³ვაი თქვენ, მწიგნობარნო და ფარისეველნო თვალთმაქცნო, რადგან იხდით პიტნის, ცერეცოს და ძირას მეათედს და დაგიტოვებიათ უმთავრესი სჯულისა: სამართალი, წყალობა და რწმენა. ამის გაკეთება გმართებდათ და არც იმის დატოვება.

²⁴წინამძღვარნო ბრმანო, რომლებიც წურავთ კოღოს, ხოლო აქლემს შთანთქავთ.

²⁵ვაი თქვენ, მწიგნობარნო და ფარისეველნო თვალთმაქცნო, რადგან წმენდთ გარედან სასმისს და ლანგარს, ხოლო შიგნიდან სავსეა ნაძარცვით და უსამართლობით.

²⁶ფარისეველო ბრმაო, გაწმინდე ჯერ შიგნიდან სასმისი და ლანგარი, რომ იყოს იგი გარედანაც წმინდა.

²⁷ვაი თქვენ, მწიგნობარნო და ფარისეველნო თვალთმაქცნო, რადგან მსგავსნი ხართ შეფეთქილი საფლავებისა, რომლებიც გარედან ჩანან მშვენიერნი, ხოლო შიგნით სავსე არიან მკვდრების ძვლებით და ყოველგვარი უწმინდურებით.

²⁸ასევე თქვენც გარედან ჩანხართ კაცთათვის მართალნი, ხოლო შიგნით სავსე ხართ თვალთმაქცობით და უსჯულოებით.

²⁹ვაი თქვენ, მწიგნობარნო და ფარისეველნო თვალთმაქცნო, რადგან აშენებთ წინასწარმეტყველთა საფლავებს და ამკობთ მართალთა სამარეებს

³⁰და ამბობთ: რომ ვყოფილიყავით ჩვენი მამების დროს, არ ვიქნებოდით მათი თანაზიარნი წინასწარმეტყველთა სისხლში;

³¹და ამით ემოწმებით საკუთარ თავს, რომ ძეები ხართ წინასწარმეტყველთა მკვლელებისა;

³²და თქვენც აავსეთ საწყაო თქვენი მამებისა.

³³გველნო, იქედნეთა ნაშობნო, როგორ გაექცევით გეენის სასჯელს?

³⁴ამის გამო, აჰა, მე გიგზავნით თქვენ წინასწარმეტყველებს, ბრძენებს და მწიგნობრებს, ზოგ მათგანს მოკლავთ და ჯვარს აცვამთ და ზოგ მათგანს გაშოლტავთ თქვენს შესაკრებლებში და განდევნით ქალაქიდან ქალაქში,

³⁵რათა მოიწიოს თქვენზე ყოველი მართალი სისხლი, დათხეული ქვეყანაზე მართალი აბელის სისხლიდან ზაქარიას, ბარუქის ძის, სისხლამდე, რომელიც მოკალით ტაძარსა და სამსხვერპლოს შორის.

³⁶ამინ გეუბნებით თქვენ: მოიწევა ეს ყოველივე ამ მოდგმაზე.

³⁷იერუსალიმო, იერუსალიმო, რომელმაც დახოცე წინასწარმეტყველნი და ჩაქოლე შენთან მოვლინებულნი! რამდენჯერ მსურდა შეკრება შენი შვილებისა, როგორც შემოიკრებს ფრინველი თავის მართვეებს ფრთების ქვეშ, და არ ისურვეთ.

³⁸აჰა, გრჩებათ თქვენ სახლი თქვენი ოხრად,

³⁹რადგან გეუბნებით თქვენ: ვეღარ მიხილავთ მე ამიერიდან, ვიდრე არ იტყვით: კურთხეულია მომავალი უფლის სახელით (ფს.117,26).