Read ახალი აღთქმა წიგნი მათესი 24 Bible Online

წიგნი მათესი 24 - ახალი აღთქმა bible

წიგნი მათესი 24

¹და გამოვიდა იესო ტაძრიდან და წავიდა; და მივიდნენ მასთან მისი მოწაფეები, რათა ეჩვენებინათ მისთვის ტაძრის ნაგებობები;

²ხოლო იესომ მიუგო და უთხრა მათ: ვერ ხედავთ ყოველივე ამას? ამინ გეუბნებით თქვენ: არ დარჩება აქ ქვა ქვაზე, რომელიც არ დაირღვევა.

³და როცა დაჯდა იგი ზეთისხილის მთაზე, მივიდნენ მასთან მოწაფეები განმარტოებით და უთხრეს: გვითხარი ჩვენ, როდის იქნება ეს და რა არის ნიშანი შენი მოსვლისა და საუკუნეთა დასასრულისა?

⁴მიუგო იესომ და უთხრა მათ: გაფრთხილდით, ვინმემ არ გაცდუნოთ თქვენ,

⁵რადგან მრავალი მოვა ჩემი სახელით და იტყვის: მე ვარ ქრისტე, და მრავალს აცდუნებს.

⁶და გაიგებთ ომებზე და ომების ამბებს; იხილეთ და ნუ შეძრწუნდებით, რადგან ეს ყოველივე უნდა იყოს, მაგრამ ჯერ არ არის აღსასრული;

⁷რადგან აღდგება ხალხი ხალხის წინააღმდეგ და სამეფო სამეფოს წინააღმდეგ და იქნება შიმშილი, ჭირი და მიწისძვრები ადგილ-ადგილ;

⁸ხოლო ეს ყოველივე ტკივილების დასაწყისია.

⁹მაშინ ჩაგაგდებენ თქვენ გასაჭირში და დაგხოცავენ თქვენ და იქნებით მოძულებულნი ყველა წარმართისგან ჩემი სახელის გამო.

¹⁰და მაშინ დაბრკოლდება მრავალი და ერთმანეთს გასცემენ და შეიძულებენ ერთმანეთს.

¹¹და მრავალი ცრუწინასწარმეტყველი აღდგება და აცდუნებს მრავალს;

¹²და უსჯულოების გამრავლებით გაცივდება სიყვარული მრავალთა,

¹³ხოლო ვინც მოითმენს ბოლომდე, ის ცხონდება.

¹⁴და იქადაგება ეს სახარება სასუფევლისა მთელ ქვეყანაზე დასამოწმებლად ყველა წარმართისათვის და მაშინ მოვა აღსასრული.

¹⁵ამიტომ, როდესაც იხილავთ მოოხრების სისაძაგლეს, თქმულს დანიელ წინასწარმეტყველის მიერ მდგომარეს წმიდა ადგილზე (დან.9,27) ვინც ამოიკითხავს, გულისხმა-ყოს.

¹⁶მაშინ ვინც ჰურიასტანში იქნება, გაიქცეს მთაში,

¹⁷და ვინც ერდოზე იქნება, ნუ ჩამოვა რამის ასაღებად თავისი სახლიდან,

¹⁸და ვინც ველზე იქნება, ნუ მობრუნდება უკან თავისი სამოსის ასაღებად;

¹⁹ხოლო ვაი ორსულებს და ვინც აწოვებს იმ დღეებში;

²⁰ილოცეთ, რომ არ მოხდეს თქვენი გაქცევა ზამთარში, არც შაბათს;

²¹რადგან იქნება მაშინ დიდი გასაჭირი, როგორიც არ ყოფილა ქვეყნის დასაბამიდან აქამდე და არც იქნება.

²²და თუ არ შემოკლდება ის დღეები, ვერ გადარჩება ვერც-ერთი ხორციელი; ხოლო რჩეულთათვის შემოკლდება ის დღეები.

²³მაშინ თუ ვინმე გეტყვით თქვენ: აჰა, აქ არის ქრისტე ან — იქ, არ ირწმუნოთ;

²⁴რადგან აღდგებიან ცრუქრისტენი და ცრუწინასწარმეტყველნი და აღასრულებენ დიდ სასწაულებსა და ნიშნებს, რომ აცდუნონ, თუ შეძლებენ, რჩეულნიც.

²⁵აჰა, წინასწარ გითხარით თქვენ:

²⁶თუ გეტყვიან თქვენ: აჰა, უდაბნოშია, — ნუ გახვალთ; აჰა, საიდუმლო ოთახებშია, — ნუ ირწმუნებთ;

²⁷რადგან როგორც ელვა გამოჩნდება აღმოსავლეთიდან და გაანათებს დასავლეთამდე — ასე იქნება მოსვლაც ძისა კაცისა;

²⁸რადგან სადაც იქნება მძორი, იქ შეიკრიბებიან ორბები.

²⁹და მაშინვე, იმ დღეების გაჭირვების შემდეგ, მზე დაბნელდება და მთვარე არ გამოსცემს თავის ნათელს და ვარსკვლავები ჩამოცვივა ზეციდან და ცათა ძალები შეიძვრება (ეს.3,1; ეზეკ.32,7).

³⁰და მაშინ გამოჩნდება ნიშანი ძისა კაცისა ცაზე და მაშინ მოჰყვება გოდებას ყოველი ტომი ქვეყნისა და იხილავენ ძეს კაცისას, მომავალს ცის ღრუბლებზე მრავალი ძალითა და დიდებით (დან.7,13-14).

³¹და მოავლენს თავის ანგელოზებს დიდხმიანი საყვირით და შეკრებენ მის რჩეულებს ოთხივე ქართაგან, ცათა კიდიდან მათ კიდემდე.

³²ხოლო ლეღვის ხის მაგალითით ისწავლეთ: როცა მისი რტო დარბილდება და ფოთლები გამოვა, იცოდეთ, რომ ახლოს არის ზაფხული;

³³ასევე თქვენც, როცა იხილავთ ყოველივე ამას, იცოდეთ, რომ ახლოს არის, კარებთან.

³⁴ამინ გეუბნებით თქვენ: არ გადავა ეს მოდგმა, ვიდრე ეს ყოველივე არ იქნება.

³⁵ცა და ქვეყანა გადავა, ხოლო ჩემი სიტყვები არ გადავა.

³⁶ხოლო იმ დღისა და ჟამის შესახებ არავინ იცის: არც ცის ანგელოზებმა, არც ძემ, არამედ მხოლოდ მამამ.

³⁷როგორც ნოეს დღეები, ისე იქნება მოსვლაც ძისა კაცისა,

³⁸რადგან როგორც იყვნენ წარღვნის წინა დღეებში — ჭამდნენ და სვამდნენ, ქორწინდებოდნენ და თხოვდებოდნენ იმ დღემდე, ვიდრე არ შევიდა ნოე კიდობანში,

³⁹და ვერ მიხვდნენ, ვიდრე არ მოვიდა წარღვნა და არ წალეკა ყოველივე — ასევე იქნება მოსვლა ძისა კაცისა.

⁴⁰მაშინ ორნი იქნებიან ველად: ერთს წაიყვანენ და ერთი დარჩება;

⁴¹ორნი დაფქვავენ წისქვილში: ერთს წაიყვანენ და ერთი დარჩება.

⁴²ამიტომ ფხიზლად იყავით, რადგან არ იცით, რომელ დღეს მოვა თქვენი უფალი;

⁴³ხოლო ეს იცოდეთ: რომ სცოდნოდა სახლის პატრონს, რომელ სახმილავზე მოვიდოდა მპარავი, იფხიზლებდა და არ დაუშვებდა თავისი სახლის მოთხრას.

⁴⁴ამიტომ თქვენც იყავით მზად, რადგან რა დროსაც არ ფიქრობთ, მაშინ მოვა ძე კაცისა.

⁴⁵ვინ არის სარწმუნო და გონიერი მონა, რომელიც დაუდგინა ბატონმა თავის სახლეულს, რომ მიეცა მათთვის საზრდო დროულად?

⁴⁶ნეტარია ის მონა, რომელთანაც მივა მისი ბატონი და იპოვის მას ამგვარად მოქმედს.

⁴⁷ამინ გეუბნებით თქვენ, რომ მთელ თავის ქონებაზე დაადგენს მას;

⁴⁸ხოლო თუ იტყვის ის უკეთური მონა თავის გულში: აყოვნებს ჩემი ბატონი მოსვლას,

⁴⁹და დაიწყებს ცემას თავისი მსგავსი მონებისას და ჭამასა და სმას ლოთებთან ერთად,

⁵⁰მოვა ბატონი იმ მონისა და იმ დღეს, რომელსაც არ ელის, და იმ დროს, რომელიც არ იცის,

⁵¹და ორად გაკვეთს მას და მის ნაწილს თვალთმაქცებთან დადებს; იქ იქნება ტირილი და კბილთა ღრჭენა.