Read ახალი აღთქმა წიგნი მათესი 26 Bible Online

წიგნი მათესი 26 - ახალი აღთქმა bible

წიგნი მათესი 26

¹და იყო, როცა დაასრულა იესომ ყველა ეს სიტყვა, უთხრა თავის მოწაფეებს:

²იცით, რომ ორი დღის შემდეგ პასექი იქნება და ძე კაცისა გადაეცემა ჯვარზე საცმელად?

³მაშინ შეიკრიბნენ მღვდელმთავრები და მწიგნობრები და ერის უხუცესები ეზოში მღვდელმთავრისა, რომელსაც ერქვა კაიაფა,

⁴და განიზრახეს, რომ იესო მზაკვრულად შეეპყროთ და მოეკლათ,

⁵და ამბობდნენ: არა დღესასწაულზე, რომ შფოთი არ იყოს ერში.

⁶ხოლო როდესაც იესო იყო ბეთანიაში, სიმონ კეთროვნის სახლში,

⁷მივიდა მასთან დედაკაცი, რომელსაც ჰქონდა ალაბასტრი ძვირფასი ნელსაცხებლით, და თავზე დაასხა მას, ინახით მჯდომს,

⁸და როცა დაინახეს მოწაფეებმა, გაკიცხეს და თქვეს: რისთვის იყო ეს ხარჯი?

⁹რადგან შეიძლებოდა ამ ნელსაცხებლის გაყიდვა ძვირად და მიცემა გლახაკებისთვის.

¹⁰ხოლო იესომ გულისხმაყო და უთხრა მათ: რატომ აწუხებთ ამ დედაკაცს? მან კეთილი საქმე გააკეთა ჩემთვის,

¹¹რადგან გლახაკები ყოველთვის თქვენთან არიან, ხოლო მე არა ვარ ყოველთვის თქვენთან,

¹²რადგან ეს ნელსაცხებელი რომ დაასხა მან ჩემს სხეულს, ჩემს დასამარხად გააკეთა.

¹³ამინ გეუბნებით თქვენ: სადაც იქადაგება ეს სახარება მთელ ქვეყანაზე, ითქმება, რაც გააკეთა მან თავის მოსახსენებლად.

¹⁴მაშინ წავიდა ერთი თორმეტთაგანი, რომელსაც ერქვა იუდა ისკარიოტელი, მღვდელმთავრებთან და უთხრა:

¹⁵რას ინებებთ, რომ მომცეთ, თუ მე გადმოგცემთ მას თქვენ? ხოლო მათ მიუთვალეს მას ოცდაათი ვერცხლი.

¹⁶და ამიერიდან ეძებდა ხელსაყრელ დროს, რათა გადაეცა იგი მათთვის.

¹⁷ხოლო უფუარობის პირველ დღეს მივიდნენ მოწაფეები იესოსთან და უთხრეს მას: სად გინდა, რომ მოგიმზადოთ შენ საჭმელად პასექი?

¹⁸ხოლო მან უთხრა: წადით ქალაქში ამა და ამ კაცთან და უთხარით მას: მოძღვარი ამბობს: ჟამი ჩემი ახლოს არის, შენთან აღვასრულებ პასექს ჩემს მოწაფეებთან ერთად.

¹⁹და გააკეთეს მოწაფეებმა, როგორც უბრძანა მათ იესომ, და მოამზადეს პასექი.

²⁰და როცა მოსაღამოვდა, ინახით იჯდა თავის თორმეტ მოწაფესთან ერთად.

²¹და როდესაც ჭამდნენ ისინი, უთხრა: ამინ გეუბნებით თქვენ: ერთი თქვენგანი გამცემს მე;

²²ხოლო ისინი შეწუხდნენ ძლიერ; და დაიწყო თითოეულმა და ეუბნებოდა მას: ნუთუ მე ვარ, უფალო?

²³ხოლო მან მიუგო და უთხრა: ვინც ჩაყოფს ჩემთან ერთად ხელს ჯამში, ის გამცემს მე.

²⁴ძე კაცისა კი მიდის, როგორც წერია მის შესახებ, ხოლო ვაი იმ კაცს, ვის მიერაც ძე კაცისა გაიცემა. უმჯობესი იქნებოდა მისთვის, რომ არ შობილიყო ის კაცი.

²⁵მიუგო იუდამ, რომელმაც გასცა იგი, და უთხრა: ნუთუ მე ვარ, რაბი? უთხრა მას იესომ: შენ თქვი.

²⁶და როდესაც ისინი ჭამდნენ, აიღო იესომ პური და აკურთხა, გატეხა და მისცა მოწაფეებს და უთხრა: მიიღეთ და ჭამეთ, ეს არის ხორცი ჩემი;

²⁷და აიღო სასმისი და მადლობდა, მისცა მათ და თქვა: სვით ამისგან ყველამ,

²⁸რადგან ეს არის სისხლი ჩემი ახალი აღთქმისა, მრავალთათვის დათხეული მისატევებლად ცოდვათა.

²⁹ხოლო გეუბნებით თქვენ: აღარ შევსვამ ამიერიდან ვენახის ამ ნაყოფისგან იმ დღემდე, როცა შევსვამ თქვენთან ერთად ახალს ჩემი მამის სასუფეველში.

³⁰და იგალობეს და გავიდნენ ზეთისხილის მთაზე.

³¹მაშინ უთხრა მათ იესომ: თქვენ ყველანი დაბრკოლდებით ჩემ მომართ ამ ღამეს, რადგან წერია: დავცემ მწყემსს და განიბნევიან სამწყსოს ცხვრები (საქ.13,7),

³²ხოლო ჩემი აღდგომის შემდეგ წაგიძღვებით თქვენ გალილეისკენ.

³³მიუგო პეტრემ და უთხრა მას: თუნდაც ყველა დაბრკოლდეს შენ მიმართ, მე არასოდეს დავბრკოლდები.

³⁴უთხრა მას იესომ: ამინ გეუბნები შენ, რომ ამ ღამეს, მამლის ყივილამდე, სამგზის უარმყოფ მე.

³⁵უთხრა მას პეტრემ: თუნდაც მომიწიოს მე შენთან ერთად სიკვდილი, არ უარგყოფ შენ. და ამგვარადვე ამბობდა ყველა მოწაფე.

³⁶მაშინ მივიდა მათთან ერთად იესო ადგილზე, რომელსაც ეწოდება გეთსიმანია, და უთხრა მოწაფეებს: დასხედით მანდ, ვიდრე მივალ და ვილოცებ იქ.

³⁷და წაიყვანა პეტრე და ზებედეს ორი ძე და დაიწყო წუხილი და ურვა.

³⁸მაშინ უთხრა მათ იესომ: მწუხარეა ჩემი სული სიკვდილამდე. გაჩერდით აქ და იფხიზლეთ ჩემთან ერთად.

³⁹და წავიდა ცოტა წინ და დავარდა პირქვე, ლოცულობდა და ამბობდა: მამაო ჩემო, თუ შესაძლებელია, ამერიდოს მე ეს სასმისი; მაგრამ არა როგორც მე მნებავს, არამედ როგორც შენ.

⁴⁰და მივიდა მოწაფეებთან და ნახა ისინი მძინარე და უთხრა პეტრეს: ეს ვერ შეძელით, ერთხანს გეფხიზლათ ჩემთან ერთად?

⁴¹იფხიზლეთ და ილოცეთ, რომ არ შეხვიდეთ განსაცდელში; სული მხნეა, ხოლო ხორცი — უძლური.

⁴²კვლავ წავიდა მეორედ, ილოცა და ამბობდა: მამაო ჩემო, თუ არ არის შესაძლებელი, ამერიდოს მე ეს სასმისი, რათა არ შევსვა იგი, იყოს ნება შენი.

⁴³და მივიდა და ნახა ისინი კვლავ მძინარე, რადგან მათ თვალები ჰქონდათ დამძიმებული.

⁴⁴და დატოვა ისინი, კვლავ წავიდა და ილოცა მესამედ და იგივე სიტყვა თქვა.

⁴⁵მაშინ მივიდა თავის მოწაფეებთან და უთხრა მათ: დაიძინეთ ცოტა კიდევ და დაისვენეთ; აჰა, მოახლოებულია ჟამი და ძე კაცისა გადაეცემა ცოდვილთა ხელში.

⁴⁶ადექით, წავიდეთ; აჰა, მოახლოვდა ჩემი გამცემი.

⁴⁷და ვიდრე იგი ამას ამბობდა, აჰა, იუდა, ერთი თორმეტთაგანი, მივიდა და მასთან ერთად დიდძალი ხალხი მახვილებითა და კეტებით მღვდელმთავრებისა და ერის უხუცესებისგან;

⁴⁸ხოლო მისმა გამცემმა მისცა მათ ნიშანი და უთხრა: ვისაც ვეამბორები, ის არის, შეიპყარით იგი.

⁴⁹და მაშინვე მივიდა იესოსთან და უთხრა: გიხაროდეს, რაბი. — და ეამბორა მას;

⁵⁰ხოლო იესომ უთხრა მას: მოყვასო, რისთვის მოხვედი? მაშინ მივიდნენ და დაადეს ხელი იესოს და შეიპყრეს იგი.

⁵¹და აჰა, ერთმა, იესოსთან მყოფმა, აღმართა ხელი, იშიშვლა თავისი მახვილი და დაჰკრა მღვდელმთავრის მონას და მოჰკვეთა მას ყური.

⁵²მაშინ უთხრა მას იესომ: დააბრუნე მახვილი თავის ადგილას, რადგან ყველა, ვინც აიღებს მახვილს, მახვილით მოკვდება.

⁵³თუ გგონია, რომ არ შემიძლია, შევევედრო ჩემს მამას და წარმომიდგინოს მე აქ ახლა ანგელოზთა თორმეტ გუნდზე მეტი?

⁵⁴და როგორღა აღსრულდება წერილი, რომ ასე უნდა მოხდეს?

⁵⁵იმ დროს უთხრა იესომ ხალხს: როგორც ავაზაკზე, გამოხვედით მახვილებითა და კეტებით ჩემს შესაპყრობად; ყოველდღე თქვენთან ვიჯექი და გასწავლიდით ტაძარში და არ შემიპყარით მე;

⁵⁶ხოლო ეს ყოველივე მოხდა, რათა აღსრულებულიყო წინასწარმეტყველთა დაწერილი. მაშინ ყველა მოწაფემ დატოვა იგი და გაიქცა.

⁵⁷და მათ შეიპყრეს იესო და მიიყვანეს კაიაფა მღვდელმთავართან, სადაც მწიგნობრები და უხუცესები შეკრებილიყვნენ;

⁵⁸ხოლო პეტრე მიჰყვებოდა მას მოშორებით მღვდელმთავრის ეზომდე და შევიდა შიგნით და დაჯდა მსახურებთან, რომ ენახა დასასრული;

⁵⁹ხოლო მღვდელმთავრები და უხუცესები და მთელი საკრებულო ეძებდნენ ცრუმოწმობას იესოს წინააღმდეგ, რათა მოეკლათ იგი,

⁶⁰და ვერ პოულობდნენ. და მრავალი ცრუმოწმე იყო მოსული, მაგრამ ვერ იპოვეს; და ბოლოს მოვიდნენ ორნი

⁶¹და თქვეს: ეს ამბობდა: შემიძლია, დავანგრიო ღვთის ტაძარი და სამ დღეში ავაშენო.

⁶²და ადგა მღვდელმთავარი და უთხრა მას: არაფერს მიუგებ იმაზე, რასაც ესენი შენ წინააღმდეგ მოწმობენ?

⁶³ხოლო იესო დუმდა. მღვდელმთავარმა უთხრა მას: გაფიცებ შენ ცოცხალ ღმერთს, რომ გვითხრა ჩვენ, შენ ხარ თუ არა ქრისტე, ძე ღვთისა?

⁶⁴უთხრა მას იესომ: შენ თქვი. მაგრამ გეუბნებით თქვენ: ამიერიდან იხილავთ ძეს კაცისას, მჯდომარეს ძალის მარჯვნივ და მომავალს ცის ღრუბლებზე.

⁶⁵მაშინ მღვდელმთავარმა შემოიხია თავისი სამოსი და თქვა: დაგმო, რაღად გვინდა მოწმეები? აჰა, ახლა გაიგონეთ გმობა მისგან.

⁶⁶თქვენ რას ფიქრობთ? ხოლო მათ მიუგეს და უთხრეს: ღირსია სიკვდილისა!

⁶⁷მაშინ აფურთხებდნენ მას სახეში და მუშტებს ურტყამდნენ, ხოლო ზოგი ყვრიმალში სცემდა

⁶⁸და ეუბნებოდა: გვიწინასწარმეტყველე ჩვენ, ქრისტე, ვინ არის, ვინც დაგარტყა შენ?

⁶⁹ხოლო პეტრე იჯდა გარეთ, ეზოში. და მივიდა მასთან ერთი მხევალი და უთხრა: შენც იყავი იესო გალილეველთან;

⁷⁰ხოლო მან უარყო ყველას წინაშე და თქვა: არ ვიცი, რას ამბობ.

⁷¹და როდესაც გამოდიოდა იგი ჭიშკარში, დაინახა იგი სხვამ და უთხრა იქ მყოფთ: ესეც იყო იესო ნაზორეველთან.

⁷²და ისევ უარყო ფიცით და თქვა: არ ვიცნობ იმ კაცს.

⁷³ხოლო ცოტა ხნის შემდეგ მივიდნენ იქ მდგომნი და უთხრეს პეტრეს ჭეშმარიტად შენც მათგანი ხარ, რადგან შენი ლაპარაკიც გამჟღავნებს შენ.

⁷⁴მაშინ დაიწყო შეჩვენება და ფიცი: არ ვიცნობ ამ კაცს. — და მყისვე მამალმა იყივლა.

⁷⁵და გაახსენდა პეტრეს იესოს სიტყვა, რომელიც უთხრა მას: მამლის ყივილამდე სამგზის უარმყოფ მე — და გამოვიდა გარეთ და ტიროდა მწარედ.