Read ახალი აღთქმა წიგნი მათესი 27 Bible Online

წიგნი მათესი 27 - ახალი აღთქმა bible

წიგნი მათესი 27

¹და როდესაც გათენდა, ბჭობა გამართა ყველა მღვდელმთავარმა და ერის უხუცესმა იესოს წინააღმდეგ, რათა მოეკლათ იგი;

²და შეკრეს იგი, წაიყვანეს და გადასცეს პონტოელ პილატეს, მმართველს.

³მაშინ, როდესაც ნახა იუდამ, მისმა გამცემმა, რომ მსჯავრი დასდეს, ინანა და დაუბრუნა ოცდაათი ვერცხლი მღვდელმთავრებსა და უხუცესებს

⁴და თქვა: შევცოდე, რადგან გავეცი მართალი სისხლი. ხოლო მათ უთხრეს: ჩვენ რა? შენ ნახე.

⁵და დაყარა ვერცხლი ტაძარში, გაშორდა და წავიდა და თავი ჩამოიხრჩო;

⁶ხოლო მღვდელმთავრებმა აიღეს ვერცხლი და თქვეს: არ არის მართებული ამის დადება საგანძურში, რადგან სისხლის საფასურია.

⁷და ბჭობა გამართეს და იყიდეს იმით მექოთნის მიწა უცხოთა დასამარხად.

⁸ამიტომ ეწოდა იმ მიწას სისხლის მიწა დღევანდელ დღემდე.

⁹მაშინ აღსრულდა თქმული იერემია წინასწარმეტყველის მიერ, რომელიც ამბობს: და აიღეს ოცდაათი ვერცხლი, ფასი: შეფასებულისა, რომელიც შეფასდა ისრაელის ძეების მიერ,

¹⁰და მისცეს იგი მექოთნის მიწაში, როგორც მიბრძანა მე უფალმა (იერ.18,2; 32,7-9; ზაქ.11,13).

¹¹ხოლო იესო დადგა მმართველის წინაშე; და ჰკითხა მას მმართველმა და უთხრა: შენა ხარ მეფე იუდეველთა? ხოლო იესომ უთხრა: შენ ამბობ.

¹²და როდესაც ბრალი დასდეს მას მღვდელმთავრებმა და უხუცესებმა, არაფერი მიუგო.

¹³მაშინ უთხრა მას პილატემ: არ გესმის, რამდენს მოწმობენ შენ წინააღმდეგ?

¹⁴და არ უპასუხა მას არც ერთ სიტყვაზე, ისე რომ ძლიერ უკვირდა მმართველს;

¹⁵ხოლო დღესასწაულზე ჩვეულება ჰქონდა მმართველს: ათავისუფლებდა ხალხისთვის ერთ პატიმარს, რომელსაც ისურვებდნენ.

¹⁶და ჰყავდათ მაშინ ერთი ცნობილი პატიმარი, რომელსაც ერქვა ბარაბა.

¹⁷და როდესაც შეკრებილები იყვნენ ისინი, უთხრა მათ პილატემ: ვინ გინდათ, რომ გაგითავისუფლოთ თქვენ: ბარაბა თუ იესო, რომელსაც ჰქვია ქრისტე? —

¹⁸რადგან იცოდა, რომ შურის გამო გადასცეს იგი.

¹⁹და როდესაც დაჯდა იგი მსაჯულის ტახტზე, გაგზავნა მასთან მისმა ცოლმა და უთხრა: ნურაფერი იქნება შენსა და მაგ მართალს შორის, რადგან ჩვენებით ბევრი ვიტანჯე დღეს მის გამო.

²⁰ხოლო მღვდელმთავრებმა და უხუცესებმა დაარწმუნეს ხალხი, რათა გამოეთხოვათ ბარაბა, ხოლო იესო დაეღუპათ.

²¹მიუგო მმართველმა და უთხრა მათ: ვინ გინდათ ამ ორთაგან, რომ გაგითავისუფლოთ თქვენ? ხოლო მათ უთხრეს: ბარაბა.

²²უთხრა მათ პილატემ: რა ვუყო იესოს, რომელსაც ჰქვია ქრისტე? უთხრა მას ყველამ: ჯვარს ეცვას!

²³ხოლო მმართველმა უთხრა მათ: და რა ბოროტება ჩაიდინა? ხოლო ისინი უფრო მეტად ყვიროდნენ და ამბობდნენ: ჯვარს ეცვას

²⁴როდესაც ნახა პილატემ, რომ ვერაფერს შველოდა, არამედ უფრო მატულობდა შფოთი, აიღო წყალი და დაიბანა ხელები ხალხის წინაშე და თქვა: უდანაშაულო ვარ ამ მართლის სისხლში, თქვენ ნახეთ.

²⁵და მიუგო მთელმა ერმა და უთხრა: სისხლი მაგისი ჩვენზე და ჩვენს შვილებზე!

²⁶მაშინ გაუთავისუფლა მათ ბარაბა, ხოლო იესოს შოლტით სცემა და გადასცა, რათა ჯვარცმულიყო.

²⁷მაშინ მმართველის ჯარისკაცებმა წაიყვანეს იესო პრეტორიუმში და შეკრიბეს მის წინააღმდეგ მთელი მხედრობა

²⁸და გახადეს მას და მეწამული ქლამიდით შემოსეს იგი.

²⁹და დაწნეს გვირგვინი ეკლისგან და დაადგეს მას თავზე და ლერწამი მისცეს მარჯვენა ხელში და მუხლი მოიყარეს მის წინაშე. დასცინოდნენ მას და ეუბნებოდნენ: გიხაროდეს, მეფეო იუდეველთა!

³⁰და აფურთხებდნენ მას და აიღეს ლერწამი და ურტყამდნენ მას თავში.

³¹და როდესაც შეურაცხყვეს იგი, გახადეს მას ქლამიდი და შემოსეს მისივე სამოსით და წაიყვანეს იგი, რათა ჯვარს ეცვათ.

³²ხოლო როცა გამოვიდნენ, ნახეს კაცი კვირინელი, სახელად სიმონი; იგი აიძულეს, რომ აეღო მისი ჯვარი.

³³და მივიდნენ ადგილზე, რომელსაც ჰქვია გოლგოთა, რაც ნიშნავს თხემის ადგილს.

³⁴მისცეს მას სასმელად ძმარი, ნაღვლით შეზავებული; და როცა იგემა, არ ისურვა დალევა.

³⁵და ჯვარს აცვეს იგი და გაიყვეს მისი სამოსი და იყარეს წილი, რათა აღსრულებულიყო თქმული წინასწარმეტყველის მიერ, რომელიც ამბობს: გაიყვეს სამოსი ჩემი ერთმანეთში და ჩემს კვართზე იყარეს წილი (ფს.21,10)

³⁶და ისხდნენ და სდარაჯობდნენ მას იქ.

³⁷და დადეს მის თავს ზემოთ მისი ბრალდება, დაწერილი: ეს არის იესო, მეფე იუდეველთა.

³⁸მაშინ ჯვარს აცვეს მასთან ერთად ორი ავაზაკი, ერთი — მარჯვნივ და ერთი — მარცხნივ;

³⁹ხოლო გამვლელები გმობდნენ მას, აქნევდნენ თავებს

⁴⁰და ამბობდნენ: რომელიც ანგრევ ტაძარს და სამ დღეში აშენებ, იხსენი შენი თავი, თუ ძე ხარ ღვთისა, გადმოდი ჯვრიდან.

⁴¹ასევე მღვდელმთავრებიც დასცინოდნენ მწიგნობრებთან და უხუცესებთან და ფარისევლებთან ერთად და ამბობდნენ:

⁴²სხვები იხსნა, თავისი თავის ხსნა კი არ ძალუძს; თუ მეფეა ისრაელისა, გადმოვიდეს ახლა ჯვრიდან და ვირწმუნებთ მას.

⁴³თუ ღმერთს იყო მინდობილი, იხსნას ახლა იგი, თუ ნებავს იგი, რადგან თქვა: ღვთის ძე ვარ.

⁴⁴ასევე ავაზაკებიც, მასთან ერთად ჯვარცმულნი, კიცხავდნენ მას.

⁴⁵ხოლო მეექვსე ჟამიდან დაბნელდა მთელ ქვეყანაზე მეცხრე ჟამამდე.

⁴⁶და დაახლოებით მეცხრე ჟამზე შეღაღადა იესომ დიდი ხმით და თქვა: ელი, ელი, ლამა საბაქთანი? ეს არის: ღმერთო ჩემო, ღმერთო ჩემო, რისთვის დამტოვე მე (ფს.21,2)?

⁴⁷და ზოგიერთმა იქ მდგომმა გაიგონა და ამბობდა: ელიას უხმობს ეს.

⁴⁸და მაშინვე გაიქცა ერთი მათგანი და აიღო ღრუბელი, აავსო ძმრით და დააგო ლერწამზე და ასმევდა მას;

⁴⁹ხოლო დანარჩენები ამბობდნენ: აცალეთ, ვნახოთ, თუ მოვა ელია მის დასახსნელად;

⁵⁰ხოლო იესომ კვლავ შეღაღადა დიდი ხმით და განუტევა სული.

⁵¹და აჰა, კრეტსაბმელი ტაძრისა გაიპო ორად, ზემოდან ქვემოთ, და მიწა შეიძრა და კლდეები დასკდა

⁵²და საფლავები გაიხსნა და მრავალი გვამი განსვენებულ წმიდანთა აღდგა

⁵³და გამოვიდნენ საფლავებიდან მისი აღდგომის შემდეგ, შევიდნენ წმიდა ქალაქში და გამოეცხადნენ მრავალთ;

⁵⁴ხოლო ასისთავი და ვინც მასთან ერთად სდარაჯობდა იესოს — როცა ნახეს, რომ მიწა იძრა და რაც მოხდა — შეშინდნენ ძლიერ და თქვეს: ჭეშმარიტად ძე ღვთისა იყო იგი.

⁵⁵და იყო იქ მრავალი დედაკაცი, რომლებიც შორიდან უყურებდნენ და რომლებიც გაჰყვნენ იესოს გალილეიდან და ემსახურებოდნენ მას,

⁵⁶რომელთა შორის იყვნენ: მარიამ მაგდალელი და მარიამი, იაკობისა და იოსეს დედა, და დედა ზებედეს ძეთა.

⁵⁷ხოლო როდესაც მოსაღამოვდა, მოვიდა მდიდარი კაცი არიმათიიდან, სახელად იოსები, რომელიც თვითონაც დამოწაფებოდა იესოს.

⁵⁸იგი მივიდა პილატესთან და გამოითხოვა იესოს გვამი. მაშინ პილატემ ბრძანა, მიეცათ.

⁵⁹და აიღო გვამი იოსებმა და გაახვია იგი წმინდა სუდარაში

⁶⁰და დადო იგი თავის ახალ საფლავში, რომელიც გამოეკვეთა კლდეში; და მიაგორა დიდი ლოდი საფლავის კართან და წავიდა.

⁶¹და იყო იქ მარიამ მაგდალელი და სხვა მარიამი, რომლებიც ისხდნენ საფლავის წინ.

⁶²ხოლო მომდევნო დღეს, რომელიც არის პარასკევის შემდეგ, შეიკრიბნენ მღვდელმთავრები და ფარისევლები პილატესთან

⁶³და ეუბნებოდნენ: ბატონო, გაგვახსენდა, რომ იმ მაცდურმა თქვა, სანამ ცოცხალი იყო: სამი დღის შემდეგ აღვდგები, —

⁶⁴ამიტომ ბრძანე, დაიცვან საფლავი მესამე დღემდე, რომ არ მივიდნენ მისი მოწაფეები ღამით მის მოსაპარად და არ უთხრან ხალხს: აღდგა მკვდრეთით — და იქნება უკანასკნელი საცდური პირველზე უარესი.

⁶⁵უთხრა მათ პილატემ: გყავთ თქვენ მცველები; წადით და დაიცავით, როგორც იცით,

⁶⁶ხოლო ისინი წავიდნენ და დაიცვეს საფლავი და დაბეჭდეს ლოდი მცველებთან ერთად.