Read ახალი აღთქმა წიგნი მათესი 28 Bible Online

წიგნი მათესი 28 - ახალი აღთქმა bible

წიგნი მათესი 28

¹ხოლო შაბათს, გვიან, როდესაც თენდებოდა ერთშაბათი, მივიდა მარიამ მაგდალელი, და სხვა მარიამი საფლავის სანახავად.

²და აჰა, იყო დიდი მიწისძვრა, რადგან უფლის ანგელოზი გადმოვიდა ზეციდან, მივიდა და გადააგორა ლოდი საფლავის კარიდან და დაჯდა მასზე.

³და იყო მისი სახე როგორც ელვა, და მისი სამოსი თეთრი როგორც თოვლი.

⁴და მისი შიშით შეძრწუნდნენ მცველები და გახდნენ როგორც მკვდრები.

⁵მიუგო ანგელოზმა და უთხრა დედაკაცებს: ნუ გეშინიათ თქვენ, რადგან ვიცი, რომ იესოს, ჯვარცმულს, ეძებთ.

⁶არ არის აქ, რადგან აღდგა, როგორც თქვა. მოდით და იხილეთ ადგილი, სადაც ესვენა უფალი;

⁷და სწრაფად წადით და უთხარით მის მოწაფეებს, რომ აღდგა მკვდრეთით, და აჰა, წინ გიძღვით თქვენ გალილეაში; იქ იხილავთ მას; აჰა, გითხარით თქვენ.

⁸და გამოვიდნენ სწრაფად საფლავიდან შიშით და დიდი სიხარულით და მირბოდნენ, რომ ეუწყებინათ მისი მოწაფეებისთვის.

⁹და როდესაც მიდიოდნენ, რომ ეუწყებინათ მისი მოწაფეებისათვის, აჰა, იესო შეხვდა მათ და უთხრა: გიხაროდეთ! ხოლო ისინი მივიდნენ და მოეხვივნენ ფეხებზე და თაყვანი სცეს მას.

¹⁰მაშინ უთხრა მათ იესომ: ნუ გეშინიათ, წადით და აუწყეთ ჩემს ძმებს, რომ წავიდნენ გალილეაში, და იქ მიხილავენ მე.

¹¹და როდესაც ისინი წავიდნენ, აჰა, ზოგიერთი მის მცველთაგან შევიდა ქალაქში და აუწყა მღვდელმთავრებს ყოველივე, რაც მოხდა,

¹²ხოლო ისინი შეიკრიბნენ უხუცესებთან ერთად და ბჭობა გამართეს და დიდძალი ვერცხლი მისცეს ჯარისკაცებს

¹³და უთხრეს: თქვით, რომ მისი მოწაფეები ღამე მოვიდნენ და მოიპარეს იგი, ვიდრე ჩვენ გვეძინა;

¹⁴და თუ გაიგო ეს მმართველმა, ჩვენ დავარწმუნებთ მას და თქვენ საზრუნავი არ გექნებათ;

¹⁵ხოლო მათ აიღეს ვერცხლი და მოიქცნენ ისე, როგორც იყვნენ დარიგებულნი და გავრცელდა ეს სიტყვა ჰურიათა შორის დღევანდელ დღემდე;

¹⁶ხოლო თერთმეტი მოწაფე წავიდა გალილეაში, იმ მთაზე, სადაც უბრძანა მათ იესომ.

¹⁷და იხილეს იგი და თაყვანი სცეს მას, ხოლო ზოგი დაეჭვდა.

¹⁸და მოვიდა იესო, ეუბნებოდა მათ და უთხრა: მომეცა მე მთელი ხელმწიფება ცაში და ქვეყანაზე;

¹⁹წადით და დაიმოწაფეთ ყველა წარმართი და ნათელი ეცით მათ მამისა ძისა და და სულიწმიდის სახელით;

²⁰და ასწავლეთ მათ, დაიცვან ყოველივე, რაც გამცნეთ თქვენ. და აჰა, მე თქვენთან ვარ ყოველდღე საუკუნეთა დასასრულამდე. ამინ.