Read ახალი აღთქმა წიგნი მათესი 3 Bible Online

წიგნი მათესი 3 - ახალი აღთქმა bible

წიგნი მათესი 3

¹იმ დღეებში მოვიდა იოანე ნათლისმცემელი და ქადაგებდა ჰურიასტანის უდაბნოში

²და ამბობდა: შეინანეთ, რადგან მოახლოებულია სასუფეველი ცათა.

³რადგან ამაზეა ნათქვამი ესაია წინასწარმეტყველის მიერ, რომელიც ამბობს: ხმა მღაღადებლისა უდაბნოში: გაამზადეთ გზა უფლისა და გამართეთ მისი ბილიკები (ეს.40,3).

⁴ხოლო თავად იოანეს ემოსა. აქლემის ბეწვის სამოსი და წელზე ჰქონდა ტყავის სარტყელი; და მისი საზრდო იყო კალია და ველური თაფლი.

⁵მაშინ გამოდიოდნენ მასთან იერუსალიმი და მთელი ჰურიასტანი და იორდანის შემოგარენი,

⁶და ნათელს იღებდნენ იორდანეში მისგან და აღიარებდნენ თავის ცოდვებს

⁷და როდესაც იხილა მრავალი ფარისეველი და სადუკეველი, მომავალი ნათლის მისაღებად მისგან, უთხრა მათ: იქედნეთა ნაშობნო, ვინ გიჩვენათ თქვენ გაქცევა მომავალი რისხვისგან?

⁸გამოიღეთ ნაყოფი, ღირსი სინანულისა,

⁹და ნუ ფიქრობთ და ამბობთ თქვენთვის: მამა გვყავს, აბრაამი, — რადგან გეუბნებით თქვენ, რომ შეუძლია ღმერთს, ამ ქვათაგან აღუდგინოს შვილები აბრაამს;

¹⁰რადგან ცული უკვე ხეების ძირთან დევს; ყოველი ხე, რომელიც არ გამოიღებს კეთილ ნაყოფს, მოიჭრება და ცეცხლს მიეცემა.

¹¹მე ნათელს გცემთ თქვენ წყლით სინანულისთვის, ხოლო ვინც ჩემ შემდეგ მოდის, ჩემზე ძლიერია, რომლის ხამლთა ტვირთვის ღირსიც არა ვარ; იგი ნათელს გცემთ თქვენ სულიწმიდით და ცეცხლით,

¹²რომლის ნიჩაბი მის ხელთ არის და გაწმენდს თავის კალოს და შეკრებს ხორბალს ბეღელში, ხოლო ბზეს დაწვავს უშრეტი ცეცხლით.

¹³მაშინ მოვიდა იესო გალილეიდან იორდანეზე იოანესთან, რათა ნათელი მიეღო მისგან;

¹⁴ხოლო იოანე აჩერებდა მას და ეუბნებოდა: მე მმართებს შენგან ნათლის მიღება და შენ ჩემთან მოდიხარ?

¹⁵მაგრამ იესომ მიუგო და უთხრა მას: დამითმე ახლა, რადგან ასე გვმართებს, აღვასრულოთ ჩვენ ყოველი სიმართლე. მაშინ დაუთმო მას.

¹⁶და ნათელი მიიღო იესომ და ამოვიდა მყისვე წყლიდან; და აჰა, გაეხსნა მას ცანი, და იხილა სული ღვთისა, გადმომავალი, როგორც მტრედი, რომელიც გადმოვიდა მასზე.

¹⁷და აჰა, ხმა იყო ზეციდან მეტყველი: ეს არის ძე ჩემი საყვარელი, რომელიც სათნოა ჩემთვის.