Read ახალი აღთქმა წიგნი მათესი 4 Bible Online

წიგნი მათესი 4 - ახალი აღთქმა bible

წიგნი მათესი 4

¹მაშინ იესო აყვანილი იყო უდაბნოში სულის მიერ ეშმაკისგან გამოსაცდელად.

²და იმარხულა ორმოცი დღე და ორმოცი ღამე და ბოლოს მოშივდა.

³მივიდა მასთან გამომცდელი და უთხრა: თუ ძე ხარ ღვთისა, თქვი, რომ ეს ქვები პურებად იქცეს;

⁴ხოლო მან მიუგო და უთხრა: წერია: არა მხოლოდ პურით ცოცხლობს კაცი, არამედ ყოველი სიტყვით, რომელიც გამოდის ღვთის პირიდან (2სჯ.8,3).

⁵მაშინ წაიყვანა იგი ეშმაკმა წმიდა ქალაქში და დააყენა იგი ტაძრის სახურავზე

⁶და უთხრა მას: თუ ძე ხარ ღვთისა, გადაიგდე თავი ქვევით, რადგან წერია: თავის ანგელოზებს უბრძანებს შენთვის და ხელში აგიყვანენ შენ, რომ არსად წამოჰკრა ქვას ფეხი შენი (ფს.90,11-12).

⁷უთხრა მას იესომ: ასევე წერია: არ გამოსცადო უფალი ღმერთი შენი (2სჯ.6,16).

⁸კვლავ წაიყვანა იგი ეშმაკმა ძალიან მაღალ მთაზე და უჩვენა მას ქვეყნის ყველა სამეფო. და დიდება მათი.

⁹და უთხრა მას: ყოველივე ამას შენ მოგცემ, თუ დავარდები და თაყვანს მცემ მე.

¹⁰მაშინ უთხრა მას იესომ: გამშორდი, სატანა, რადგან წერია: უფალ ღმერთს შენსას თაყვანი ეცი და მხოლოდ მას ემსახურე (2სჯ.6,13).

¹¹მაშინ დატოვა იგი ეშმაკმა და აჰა, ანგელოზები მივიდნენ და ემსახურებოდნენ მას.

¹²ხოლო გაიგო რა იესომ, რომ იოანე შეიპყრეს, გაერიდა და წავიდა გალილეაში.

¹³და დატოვა ნაზარეთი, მივიდა და დამკვიდრდა ზღვისპირა კაპერნაუმში, ზაბულონისა და ნეფთალემის საზღვრებში,

¹⁴რათა აღსრულებულიყო ნათქვამი ესაია წინასწარმეტყველის მიერ, რომელიც ამბობს:

¹⁵ქვეყანა ზაბულონისა და ქვეყანა ნეფთალემისა, გზა ზღვისა იორდანის გაღმა, გალილეა წარმართთა;

¹⁶ერმა, რომელიც ისხდა ბნელში, იხილა ნათელი დიდი და რომლებიც ისხდნენ ბნელსა და სიკვდილის, ჩრდილში, ნათელი ამოუბრწყინდათ მათ (ეს.9,1-2).

¹⁷ამიერიდან დაიწყო იესომ ქადაგება და ამბობდა: შეინანეთ, რადგან მოახლოებულია სასუფეველი ცათა.

¹⁸და მიდიოდა რა იესო გალილეის ზღვის პირას, იხილა ორი ძმა: სიმონი, რომელსაც ეწოდა პეტრე, და ანდრია, ძმა მისი, ისროდნენ ბადეებს ზღვაში, რადგან იყვნენ მებადურები;

¹⁹და უთხრა მათ: მოდით, შემომიდექით მე და გაქცევთ თქვენ კაცთა მებადურებად;

²⁰ხოლო მათ მყისვე დატოვეს თავისი ბადეები და გაჰყვნენ მას.

²¹როდესაც იქიდან წამოვიდა, იხილა სხვა ორი ძმა: იაკობ ზებედესი და იოანე, ძმა მისი, ნავში, ზებედესთან, მათ მამასთან ერთად, და უხმო მათ;

²²ხოლო მათ მყისვე დატოვეს ნავი და თავისი მამა და გაჰყვნენ მას.

²³და დადიოდა იესო მთელ გალილეაში, ასწავლიდა მათ შესაკრებლებში და ქადაგებდა სახარებას სასუფევლისას და კურნავდა ყველა სენსა და ყველა უძლურებას ერში.

²⁴და გავრცელდა ხმა მის შესახებ მთელ სირიაში; და მოჰყავდათ მასთან ყველა ავადმყოფი, სხვადასხვა სენით და სატკივრით შეპყრობილი: ეშმაკეული, მთვარეული და დავრდომილი და განკურნა ისინი.

²⁵და მიჰყვებოდა მას დიდძალი ხალხი გალილეიდან და ათქალაქიდან, იერუსალიმიდან და ჰურიასტანიდან და იორდანის გაღმიდან.