Read ახალი აღთქმა წიგნი მათესი 5 Bible Online

წიგნი მათესი 5 - ახალი აღთქმა bible

წიგნი მათესი 5

¹როდესაც იხილა ხალხი, ავიდა მთაზე, დაჯდა იგი და მივიდნენ მასთან მისი მოწაფეები.

²და გახსნა პირი, ასწავლიდა მათ და ეუბნებოდა:

³ნეტარნი არიან გლახაკნი სულით, რადგან მათია სასუფეველი ცათა.

⁴ნეტარნი არიან მგლოვიარენი გულით, რადგან ისინი ნუგეშცემულნი იქნებიან.

⁵ნეტარნი არიან მშვიდნი, რადგან ისინი დაიმკვიდრებენ ქვეყანას.

⁶ნეტარნი არიან, რომელთაც შიათ და სწყურიათ სიმართლე, რადგან ისინი გაძღებიან.

⁷ნეტარნი არიან მოწყალენი, რადგან ისინი შეწყალებულნი იქნებიან.

⁸ნეტარნი არიან წმიდანი გულით, რადგან ისინი ღმერთს იხილავენ.

⁹ნეტარნი არიან მშვიდობისმყოფელნი, რადგან ისინი ღვთის ძეებად იწოდებიან.

¹⁰ნეტარნი არიან დევნილნი სიმართლისათვის, რადგან მათია სასუფეველი ცათა.

¹¹ნეტარნი ხართ თქვენ, როცა გაგლანძღავენ და განგდევნიან და იტყვიან ყოველგვარ ბოროტ სიტყვას სიცრუით თქვენზე ჩემ გამო;

¹²გიხაროდეთ და მხიარულნი იყავით, რადგან საზღაური თქვენი მრავალია ცაში: რადგან ასევე დევნეს წინასწარმეტყველნი, რომლებიც თქვენზე უწინ იყვნენ.

¹³თქვენ ხართ მარილი ქვეყნისა, ხოლო თუ მარილი გამტკნარდა, რითღა დამარილდება? აღარაფრად გამოდგება მერე, თუ არა გადასაყრელად გარეთ და გასათელად კაცთაგან.

¹⁴თქვენ ხართ ნათელი სოფლისა. შეუძლებელია დაიფაროს ქალაქი მთაზე დაშენებული.

¹⁵არც ანთებენ სანთელს, რომ დადგან იგი საწყაოს ქვეშ, არამედ სასანთლეზე და უნათებს იგი ყველას, ვინც სახლში არის.

¹⁶ასე ბრწყინავდეს ნათელი თქვენი კაცთა წინაშე, რათა იხილონ საქმენი თქვენნი კეთილნი და ადიდონ მამა თქვენი ზეცათა.

¹⁷ნუ გგონიათ, რომ მოვედი დასარღვევად სჯულისა ან წინასწარმეტყველთა; მოვედი არა დასარღვევად, არამედ აღსასრულებლად.

¹⁸ამინ გეუბნებით თქვენ: ვიდრე არ გადავა ცა და ქვეყანა, ერთი იოტა ან ერთი წერტილი არ გადავა სჯულისგან და წინასწარმეტყველთაგან, ვიდრე ყოველივე არ აღსრულდება.

¹⁹ვინც დაარღვევს ერთ ამ მცნებათაგან უმცირესს და ისე ასწავლის ადამიანებს, უმცირესი ეწოდება მას ცათა სასუფეველში; ხოლო ვინც შეასრულებს და ასწავლის, მას დიდი ეწოდება ცათა სასუფეველში,

²⁰რადგან გეუბნებით თქვენ: თუ თქვენი სიმართლე არ აღემატება მწიგნობართა და ფარისეველთა სიმართლეს, ვერ შეხვალთ ცათა სასუფეველში.

²¹გსმენიათ, რომ ითქვა ძველთა მიმართ: არ მოკლა (გამ.20,13); ხოლო ვინც მოკლავს, ღირსია სასჯელისა;

²²ხოლო მე გეუბნებით თქვენ: ყველა, ვინც განურისხდება თავის ძმას უმიზეზოდ, ღირსია სასჯელისა; და ვინც ეტყვის თავის ძმას: რაკა, — განსასჯელია სამსჯავროზე; და ვინც ეტყვის: სულელო, — ღირსია გეენის ცეცხლისა.

²³ამიტომ, თუ სწირავ შენს შესაწირავს სამსხვერპლოზე და იქ გაგახსენდა, რომ შენი ძმა გულძვირად არის შენზე,

²⁴დატოვე იქ შენი შესაწირავი სამსხვერპლოს წინ, წადი და ჯერ შეურიგდი შენს ძმას და მაშინ მიდი და შესწირე შენი შესაწირავი.

²⁵იყავი კეთილადმცნობელი შენი მეტოქისა უმალ, ვიდრე ხარ გზაზე მასთან ერთად, რომ არ გადაგცეს შენ მეტოქემ მსაჯულს და მსაჯულმა — მსახურს და საპყრობილეში არ ჩავარდე.

²⁶ამინ გეუბნები შენ: ვერ გამოხვალ იქიდან, ვიდრე არ მისცემ უკანასკნელ კოდრანტს.

²⁷გსმენიათ, რომ ითქვა ძველთა მიმართ: არ იმრუშო (გამ.20,14);

²⁸ხოლო მე გეუბნებით თქვენ: ყოველმა, რომელმაც გულისთქმით შეხედა დედაკაცს, უკვე იმრუშა მასთან თავის გულში.

²⁹თუ თვალი შენი მარჯვენა გაცდუნებს შენ, ამოიღე იგი და განაგდე შენგან, რადგან უმჯობესია შენთვის, წარწყმდეს ერთი შენი ასოთაგანი და არა მთელი შენი სხეული ჩავარდეს გეენაში.

³⁰და თუ მარჯვენა ხელი შენი გაცდუნებს შენ, მოიკვეთე იგი და განაგდე შენგან, რადგან უმჯობესია შენთვის, წარწყმდეს ერთი შენი ასოთაგანი და არა მთელი შენი სხეული ჩავარდეს გეენაში.

³¹ნათქვამია: ვინც გაუშვებს თავის ცოლს, მისცეს მას განტევების წერილი (2სჯ.24,1);

³²ხოლო მე გეუბნებით თქვენ: ყოველი, რომელიც გაუშვებს თავის ცოლს სიძვის მიზეზის გარეშე, ამრუშებს მას; და ვინც გაშვებულს შეირთავს, მრუშობს.

³³კიდევ გსმენიათ, რომ ითქვა ძველთა მიმართ: არ დაიფიცო ტყუილად, არამედ შეუსრულე უფალს შენი ფიცი (ლევ.19,12; 2სჯ.23,21);

³⁴ხოლო მე გეუბნებით თქვენ: ნუ დაიფიცებთ სრულიად: ნურც ცას, რადგან ტახტია ღვთისა,

³⁵ნურც ქვეყანას, რადგან კვარცხლბეკია მის ფეხთა, ნურც იერუსალიმს, რადგან ქალაქია დიდი მეუფისა,

³⁶ნურც შენს თავს დაიფიცებ, რადგან არ შეგიძლია თმის ერთი ღერის გათეთრება ან გაშავება;

³⁷არამედ იყოს თქვენი სიტყვა: ჰო — ჰო და არა — არა, ხოლო ამაზე მეტი უკეთურისგან არის.

³⁸გსმენიათ, რომ ითქვა: თვალი თვალის წილ და კბილი კბილის წილ (გამ.21,24).

³⁹ხოლო მე გეუბნებით თქვენ: წინ ნუ აღუდგებით ბოროტს; არამედ ვინც გაგარტყამს შენ მარჯვენა ყვრიმალში, მიუშვირე მას მეორეც;

⁴⁰და ვინც მოინდომებს შენთვის მსჯავრის დადებას და შენი პერანგის წართმევას, დაუტოვე მას სამოსიც;

⁴¹და ვინც გაიძულებს შენ, წაჰყვე ერთ მილზე, გაჰყევი მას — ორზე;

⁴²ვინც გთხოვს შენ, მიეცი; და ვისაც უნდა სესხება შენგან, პირს ნუ იბრუნებ.

⁴³გსმენიათ, რომ ითქვა: შეიყვარე მოყვასი შენი და მოიძულე მტერი შენი (ლევ.19,18);

⁴⁴ხოლო მე გეუბნებით თქვენ: გიყვარდეთ თქვენი მტრები; აკურთხეთ თქვენი მაწყევარნი; სიკეთე გაუკეთეთ თქვენს მოძულეებს. და ილოცეთ მათთვის, ვინც მძლავრობს თქვენზე და გდევნით თქვენ,

⁴⁵რათა იყოთ თქვენ შვილები თქვენი ზეცათა მამისა; რადგან თავისი მზე ამოჰყავს ბოროტებზე და კეთილებზე და აწვიმებს მართლებზე და ცრუებზე;

⁴⁶რადგან თუ გეყვარებათ მხოლოდ თქვენი მოყვარენი, რა საზღაური გაქვთ? განა მეზვერეებიც ასე არ იქცევიან?

⁴⁷და თუ მოიკითხავთ მხოლოდ თქვენს მეგობრებს, განსაკუთრებულს რას აკეთებთ? განა წარმართებიც ასე არ იქცევიან?

⁴⁸იყავით თქვენ სრულნი, როგორც სრულია მამა თქვენი ზეცათა.