Read ახალი აღთქმა წიგნი მათესი 7 Bible Online

წიგნი მათესი 7 - ახალი აღთქმა bible

წიგნი მათესი 7

¹ნუ განიკითხავთ, რათა არ იყოთ განკითხულნი;

²რადგან რა განკითხვითაც განიკითხავთ, იმითვე განიკითხებით, და რა საწყაოთიც მიუწყავთ, იმითვე მოგეწყვებათ თქვენ.

³რად ხედავ ბეწვს შენი ძმის თვალში და შენს თვალში დირეს არ განიცდი?

⁴ან როგორ ეტყვი შენს ძმას: მაცალე და ამოვიღებ ბეწვს შენი თვალიდან, — და აჰა, დირეა შენს თვალში?

⁵თვალთმაქცო, ამოიღე პირველად დირე შენი თვალიდან და მაშინ დაინახავ ამოსაღებ ბეწვს შენი ძმის თვალიდან.

⁶ნუ აძლევთ სიწმიდეს ძაღლებს, ნურც უყრით წინ თქვენს მარგალიტებს ღორებს, რათა არ გათელონ ისინი თავისი ფეხებით და არ მოგიბრუნდნენ და არ დაგგლიჯონ თქვენ.

⁷ითხოვეთ და მოგეცემათ თქვენ; ეძიეთ და იპოვით; აკაკუნეთ და გაგეღებათ თქვენ,

⁸რადგან ყველა, ვინც ითხოვს, იღებს და ვინც ეძიებს, პოულობს და ვინც აკაკუნებს, გაეღება.

⁹ან ვინ არის თქვენ შორის კაცი, რომელიც, თუ სთხოვს თავისი ძე პურს, ქვას მისცემს მას?

¹⁰და თუ თევზს სთხოვს, გველს მისცემს მას?

¹¹თუ თქვენ, უკეთურებმა, იცით კეთილი მისაცემის მიცემა თქვენი შვილებისთვის, რამდენად უფრო მამა თქვენი ზეცათა მისცემს კეთილს იმათ, ვინც სთხოვს მას?

¹²ყოველივე, რაც გინდათ, რომ გაგიკეთონ თქვენ ადამიანებმა, თქვენც ის გაუკეთეთ მათ, რადგან ეს არის სჯული და წინასწარმეტყველნი.

¹³შედით ვიწრო ბჭით, რადგან ფართოა ბჯე და ვრცელია გზა, რომელსაც მიჰყავს წარსაწყმედად, და მრავალნი არიან რომლებიც დადიან მასზე.

¹⁴რა ვიწროა ბჭე და ძნელია გზა, რომელსაც მიჰყავს ცხოვრებისაკენ, და ცოტაა, ვინც პოულობს მას!

¹⁵ერიდეთ ცრუწინასწარმეტყველებს, რომლებიც მოდიან თქვენთან ცხვრის სამოსით, ხოლო შინაგანად არიან მტაცებელი მგლები.

¹⁶მათი ნაყოფით იცნობთ მათ. განა კრეფენ ეკლიდან ყურძენს ან ნარიდან — ლეღვს?

¹⁷ასევე ყოველი კეთილი ხე კარგ ნაყოფს გამოიღებს, ხოლო უვარგისი ხე უკეთურ ნაყოფს გამოიღებს.

¹⁸არ შეუძლია კეთილ ხეს უკეთური ნაყოფის გამოღება, არც უვარგის ხეს — კარგი ნაყოფის გამოღება.

¹⁹ყოველ ხეს, რომელიც არ გამოიღებს კარგ ნაყოფს, მოჭრიან და ცეცხლში ჩააგდებენ.

²⁰ასე რომ, მათი ნაყოფით იცნობთ მათ.

²¹არა ყველა ვინც მეუბნება მე: უფალო, უფალო, შევა ცათა სასუფეველში, არამედ ვინც ასრულებს ჩემი ზეცათა მამის ნებას.

²²მრავალი მეტყვის მე იმ დღეს: უფალო, უფალო, განა შენი სახელით არ ვწინასწარმეტყველებდით და შენი სახელით არ ვდევნიდით ეშმაკებს და შენი სახელით არ აღვასრულებდით მრავალ სასწაულს?

²³და მაშინ გამოვუცხადებ მათ: არ გიცნობთ თქვენ, გამშორდით მე ყველა უსჯულოების მოქმედი.

²⁴ამიტომ ყველას, ვინც ისმენს ჩემს სიტყვებს და ასრულებს მათ, ვამსგავსებ მას გონიერ კაცს, რომელმაც ააშენა თავისი სახლი კლდეზე.

²⁵და წამოვიდა წვიმა, მოვარდა მდინარეები, დაბერა ქარებმა და ეკვეთნენ იმ სახლს და არ დაეცა, რადგან დაფუძნებული იყო კლდეზე.

²⁶და ყველა ვინც ისმენს ამ ჩემს სიტყვებს და არ ასრულებს მათ, ემსგავსება სულელ კაცს, რომელმაც. ააშენა თავისი სახლი ქვიშაზე.

²⁷და წამოვიდა წვიმა, მოვარდა მდინარეები, დაბერა ქარებმა და ეკვეთნენ იმ სახლს და დაეცა. და იყო მისი დაცემა მეტად დიდი.

²⁸და იყო, როცა დაასრულა იესომ ეს სიტყვები, განცვიფრებული იყო ხალხი მისი მოძღვრებით,

²⁹რადგან იგი ასწავლიდა მათ, როგორც ხელმწიფების მქონე და არა როგორც მათი მწიგნობრები და ფარისევლები.