Read ახალი აღთქმა წიგნი მათესი 8 Bible Online

წიგნი მათესი 8 - ახალი აღთქმა bible

წიგნი მათესი 8

¹და როდესაც ჩამოდიოდა იგი მთიდან, გამოჰყვა მას დიდძალი ხალხი.

²და აჰა, კეთროვანი მივიდა, თაყვანს სცემდა მას და ეუბნებოდა: უფალო; თუ გნებავს, შეგიძლია ჩემი განწმენდა.

³და გაიწოდა ხელი იესომ, შეახო მას და უთხრა: მნებავს, განიწმინდე. და მყისვე განიწმინდა იგი კეთრისაგან.

⁴და უთხრა მას იესომ: იცოდე, არავის უთხრა, არამედ წადი და უჩვენე შენი თავი მღვდელს და შესწირე შესაწირავი, რომელიც ბრძანა მოსემ მათთვის დასამოწმებლად.

⁵და როცა შევიდა იგი კაპერნაუმში, მივიდა მასთან ასისთავი, ევედრებოდა მას

⁶და ეუბნებოდა: უფალო, ჩემი მსახური წევს სახლში, დავრდომილი, და ძლიერ იტანჯება.

⁷უთხრა მას იესომ: მე მოვალ და განვკურნავ მას.

⁸მიუგო ასისთავმა და უთხრა: უფალო, არა ვარ ღირსი, რომ ჩემ ჭერქვეშ შემოხვიდე, არამედ მხოლოდ სიტყვა თქვი და განიკურნება ჩემი მსახური,

⁹რადგან მეც კაცი ვარ. ხელმწიფების ქვეშ მყოფი და მყავს ჩემ ხელქვეით მეომრები და ვეუბნები ამას: წადი, — და მიდის; და სხვას: მოდი, — და მოდის; და ჩემს მონას: გააკეთე ეს, — და აკეთებს.

¹⁰და ეს რომ გაიგონა იესომ, გაუკვირდა და უთხრა მათ, ვინც მიჰყვებოდა: ამინ გეუბნებით თქვენ: ისრაელშიც ვერ ვპოვე ასეთი რწმენა.

¹¹და გეუბნებით თქვენ, რომ მრავალნი მოვლენ აღმოსავლეთიდან და დასავლეთიდან და ინახით დასსხდებიან აბრაამთან, ისააკთან და იაკობთან ცათა სასუფეველში,

¹²ხოლო სასუფევლის ძენი გაიყრებიან ბნელ გარესკნელში. იქ იქნება ტირილი და კბილთა ღრჭენა.

¹³და უთხრა იესომ ასისთავს: წადი და როგორც ირწმუნე, მოგეგოს შენ. — და განიკურნა მისი მსახური იმ დროს.

¹⁴და მივიდა იესო პეტრეს სახლში და იხილა მისი სიდედრი, დავრდომილი ცხელებისაგან;

¹⁵შეეხო მის ხელს და დატოვა იგი ცხელებამ, ადგა და ემსახურებოდა მას;

¹⁶ხოლო როცა მოსაღამოვდა, მიუყვანეს მას მრავალი ეშმაკეული და განდევნა სულები სიტყვით და ყველა ავადმყოფი განკურნა;

¹⁷რათა აღსრულებულიყო ნათქვამი ესაია წინასწარმეტყველის მიერ, რომელიც ამბობს: მან უძლურებანი ჩვენი თავს იდო და სნეულებანი იტვირთა (ეს.53,4).

¹⁸როდესაც იხილა იესომ მრავალი ხალხი თავის გარშემო, უბრძანა გაღმა გასვლა.

¹⁹და მივიდა ერთი მწიგნობარი და უთხრა მას: მოძღვარო, გამოგყვები შენ, სადაც წახვალ.

²⁰უთხრა მას იესომ: მელიებს სოროები აქვთ და ცის ფრინველებს — ბუდეები, ხოლო ძეს კაცისას არა აქვს, სად მიიდრიკოს თავი.

²¹ხოლო სხვა მისმა მოწაფეთაგანმა უთხრა მას: უფალო, ნება მომეცი მე, ჯერ წავიდე და დავმარხო მამა ჩემი.

²²ხოლო იესომ უთხრა მას: გამომყევი მე და აცალე მკვდრებს, დამარხონ თავისი მკვდრები.

²³და ავიდა იგი ნავზე და გაჰყვნენ მას მისი მოწაფეები.

²⁴და აჰა, დიდი ღელვა იყო ზღვაზე, ისე რომ ნავი იფარებოდა ტალღებით; ხოლო მას ეძინა.

²⁵და მივიდნენ მისი მოწაფეები, გააღვიძეს იგი და უთხრეს: უფალო, გვიხსენი ჩვენ, ვიღუპებით.

²⁶და უთხრა მათ: რატომ შეშინდით, მცირედმორწმუნენო? მაშინ ადგა და შერისხა ქარები და ზღვა და დადგა დიდი მყუდროება;

²⁷ხოლო ადამიანებს გაუკვირდათ და თქვეს: ვინ არის ეს, რომ ქარებიცა და ზღვაც ემორჩილებიან მას?

²⁸და როდესაც გავიდა იგი გაღმა, გერგესელთა მხარეში, შეხვდა მას საფლავებიდან გამოსული ორი ეშმაკეული, მეტად საზარელი, ისე რომ არავის შეეძლო ამ გზაზე გავლა.

²⁹და აჰა, შეღაღადეს და თქვეს: რა გინდა ჩვენგან შენ, იესო, ძეო ღვთისაო? მოხვედ აქ დროზე ადრე ჩვენ სატანჯველად?

³⁰და მათგან მოშორებით ღორების დიდი კოლტი ძოვდა.

³¹ხოლო ეშმაკები ევედრებოდნენ მას და ეუბნებოდნენ: თუ განგვდევნი ჩვენ, გვიბრძანე, შევიდეთ ღორების კოლტში.

³²და უთხრა მათ: წადით; ხოლო ისინი გავიდნენ და შევიდნენ ღორების კოლტში; და აჰა, გადაეშვა ღორების მთელი კოლტი კბოდიდან ზღვაში და შთაინთქა წყალში,

³³ხოლო მწყემსები გაიქცნენ და, მივიდნენ რა ქალაქში, აუწყეს ყოველივე და ეშმაკეულების შესახებაც.

³⁴და აჰა, მთელი ქალაქი გამოვიდა იესოს შესახვედრად და, როცა ნახეს იგი, შეევედრნენ, რომ გასულიყო მათი საზღვრებიდან.