Read ახალი აღთქმა წიგნი მათესი 9 Bible Online

წიგნი მათესი 9 - ახალი აღთქმა bible

წიგნი მათესი 9

¹და ავიდა ნავზე, გავიდა გაღმა და მივიდა თავის ქალაქში.

²და აჰა, მიუყვანეს მას დავრდომილი, სარეცელზე მდებარე. და იხილა იესომ მათი რწმენა და უთხრა დავრდომილს: გამხნევდი, შვილო, მოგეტევა შენ შენი ცოდვები.

³და აჰა, ზოგმა მწიგნობართაგანმა თქვა თავის გულში: ეს გმობს.

⁴და იცოდა იესომ მათი გულისზრახვები და უთხრა: რატომ ფიქრობთ თქვენ ბოროტს თქვენს გულში?

⁵რა უფრო ადვილია, თქმა: მოგეტევა შენი ცოდვები, თუ თქმა: ადექი და იარე?

⁶ხოლო რათა იცოდეთ, რომ ხელმწიფება აქვს ძეს კაცისას ქვეყანაზე ცოდვების მიტევებისა, — მაშინ უთხრა დავრდომილს: ადექი, აიღე შენი სარეცელი და წადი შენს სახლში.

⁷და ადგა და წავიდა თავის სახლში.

⁸ამის მხილველი ხალხი გაოცდა და ადიდებდა ღმერთს, რომელმაც ასეთი ხელმწიფება მისცა ადამიანებს.

⁹და წამოვიდა იესო იქიდან და იხილა კაცი, რომელიც იჯდა საზვერეში, მათედ წოდებული, და უთხრა მას: გამომყევი მე. და ადგა და გაჰყვა მას.

¹⁰და იყო, როდესაც იგი ინახით იჯდა სახლში, აჰა, მრავალი მეზვერე და ცოდვილი მივიდა და დაჯდა თანამეინახედ იესოსთან და მის მოწაფეებთან.

¹¹და როდესაც ნახეს ფარისევლებმა, უთხრეს მის მოწაფეებს: რატომ ჭამს მეზვერეებთან და ცოდვილებთან თქვენი მოძღვარი?

¹²ხოლო იესომ როდესაც გაიგონა, უთხრა მათ: არ სჭირდებათ ჯანმრთელებს მკურნალი, არამედ ავადმყოფებს.

¹³ხოლო თქვენ წადით და ისწავლეთ, რა არის: წყალობა მნებავს და არა მსხვერპლი, — რადგან მოვედი არა მართალთა მოსაწოდებლად, არამედ ცოდვილთა.

¹⁴მაშინ მივიდნენ მასთან იოანეს მოწაფეები და უთხრეს: რატომ ვმარხულობთ ჩვენ და ფარისევლები ბევრს, ხოლო შენი მოწაფეები არ მარხულობენ?

¹⁵და უთხრა მათ იესომ: განა შეუძლიათ ქორწილის ძეებს გლოვა, ვიდრე მათთან არის სიძე? მოვა დღეები, როცა წაიყვანენ მათგან სიძეს, და მაშინ იმარხულებენ.

¹⁶არავინ ადებს ახალი ნაჭრის საკერებელს ძველ სამოსს, რადგან დაირღვევა სამოსის მთლიანობა და უფრო დაიხევა;

¹⁷არც ასხამენ ახალ ღვინოს ძველ თხიერებში, თორემ დასკდება თხიერები და ღვინო დაიღვრება და თხიერები უვარგისი გახდება; არამედ ასხამენ ახალ ღვინოს ახალ თხიერებში და ორივე ინახება.

¹⁸და როდესაც იგი ამას ამბობდა, აჰა, ერთი მთავარი მივიდა, თაყვანს სცემდა მას და ეუბნებოდა: ჩემი ასული ახლახან აღესრულა, მაგრამ მოდი და დაადე შენი ხელი მას და გაცოცხლდება.

¹⁹და ადგა იესო და გაჰყვა მას. და მასთან ერთად მისი მოწაფეებიც.

²⁰და აჰა, დედაკაცი, რომელსაც ჰქონდა სისხლდენა თორმეტი წელი, მივიდა ზურგიდან და შეეხო მისი სამოსის კიდეს,

²¹რადგან ამბობდა თავის გულში: მხოლოდ მის სამოსსაც რომ შევეხო, განვიკურნები.

²²ხოლო იესო მიბრუნდა, იხილა იგი და უთხრა: გამხნევდი, ასულო, შენმა რწმენამ გიხსნა შენ. და განიკურნა დედაკაცი იმ დროიდან.

²³და როდესაც მივიდა იესო მთავრის სახლში და იხილა იქ მესაკრავენი და შეშფოთებული ხალხი, უთხრა მათ:

²⁴გაშორდით, რადგან არ მომკვდარა გოგონა, არამედ სძინავს. და დასცინოდნენ მას.

²⁵და როდესაც გამოყარეს ხალხი, შევიდა და მოჰკიდა ხელი მას და ადგა გოგონა.

²⁶და გავრცელდა მისი ამბავი მთელ იმ ქვეყანაში.

²⁷და წამოვიდა რა იქიდან იესო, მოსდევდა მას ორი ბრმა, ღაღადებდნენ და ამბობდნენ: შეგვიწყალე ჩვენ, ძეო დავითისაო.

²⁸და როდესაც შევიდა სახლში, მივიდნენ მასთან ბრმები და უთხრა მათ იესომ: გწამთ, რომ შემიძლია ამის გაკეთება? უთხრეს მას: ჰო, უფალო.

²⁹მაშინ შეეხო მათ თვალებს და უთხრა: თქვენი რწმენისამებრ მოგეგოთ თქვენ.

³⁰და აეხილათ მათ თვალები; და მკაცრად მიმართა მათ იესომ და უთხრა: იცოდეთ, არავინ გაიგოს.

³¹ხოლო ისინი გამოვიდნენ და გაავრცელეს ეს ამბავი მთელ იმ ქვეყანაში.

³²და როდესაც გამოვიდნენ ისინი, აჰა, მიუყვანეს მას კაცი მუნჯი და ეშმაკეული.

³³და როცა განდევნა ეშმაკი, ამეტყველდა მუნჯი. და გაუკვირდა ხალხს და ამბობდა: არასდროს ყოფილა ამგვარი რამ ისრაელში.

³⁴ხოლო ფარისევლები ამბობდნენ: ეშმაკთა მთავრით განდევნის ეშმაკებს.

³⁵და დადიოდა იესო ყველა ქალაქსა და დაბაში, ასწავლიდა მათ შესაკრებლებში და ქადაგებდა სახარებას სასუფევლისას და კურნავდა ყველა სენსა და ყველა უძლურებას ერში.

³⁶და როდესაც იხილა ხალხი, შეებრალა ისინი, რადგან იყვნენ დამაშვრალნი და დაცვენილნი, როგორც ცხვრები, რომელთაც არა ჰყავთ მწყემსი.

³⁷მაშინ უთხრა თავის მოწაფეებს: სამკალი ბევრია, ხოლო მუშაკი — ცოტა;

³⁸ევედრეთ სამკალის პატრონს, რომ გამოიყვანოს მუშაკები თავის სამკალში.