Read ახალი აღთქმა წიგნი მარკოზისა 1 Bible Online

წიგნი მარკოზისა 1 - ახალი აღთქმა bible

წიგნი მარკოზისა 1

¹დასაწყისი სახარებისა იესო ქრისტესი, ძისა ღვთისა.

²როგორც წერია წინასწარმეტყველებთან: აჰა, მე მივავლენ ჩემს ანგელოზს შენი პირის წინაშე, რომელიც გაამზადებს შენს გზას შენ წინაშე (მალ.3,1).

³ხმა მღაღადებლისა უდაბნოში: გაამზადეთ გზა უფლისა და გამართეთ მისი ბილიკები (ეს.40,3).

⁴იყო იოანე და ნათელს სცემდა უდაბნოში და ქადაგებდა სინანულის ნათლისღებას ცოდვათა მისატევებლად.

⁵და გადიოდა მასთან ჰურიასტანის მთელი ქვეყანა და ყველა იერუსალიმელი და ნათელს იღებდნენ ყველანი მისგან მდინარე იორდანეში და აღიარებდნენ თავის ცოდვებს.

⁶და იყო იოანე შემოსილი აქლემის ბეწვით და ტყავის სარტყელი ჰქონდა მას წელზე და ჭამდა კალიასა და ველურ თაფლს,

⁷და ქადაგებდა და ამბობდა: მოდის ჩემზე ძლიერი ჩემ შემდეგ, ვის წინაშეც არა ვარ ღირსი, მოვიდრიკო და გავხსნა მის ხამლთა თასმები.

⁸მე ნათელი გეცით თქვენ წყლით, ხოლო იგი ნათელს გცემთ თქვენ სულიწმიდით.

⁹და იყო, იმ დღეებში მოვიდა იესო გალილეის ნაზარეთიდან და ნათელი მიიღო იოანესგან იორდანეში.

¹⁰და მყისვე, წყლიდან ამოსვლისას, იხილა ცანი გახსნილნი და სული, როგორც მტრედი, გადმომავალი მასზე.

¹¹და ხმა იყო ზეციდან: შენ ხარ ძე ჩემი საყვარელი, შენ სათნო ხარ ჩემთვის.

¹²და მაშინვე გაიყვანა სულმა იგი უდაბნოში.

¹³და იყო იქ ორმოცი დღე და გამოიცდებოდა სატანისგან და იყო მხეცებთან და ანგელოზები ემსახურებოდნენ მას.

¹⁴ხოლო იოანეს შეპყრობის შემდეგ მივიდა იესო გალილეაში და ქადაგებდა სახარებას ღვთის სასუფევლისას

¹⁵და ამბობდა: აღსრულდა ჟამი და მოახლოვდა სასუფეველი ღვთისა; შეინანეთ და გწამდეთ სახარება.

¹⁶და როდესაც მიდიოდა გალილეის ზღვის პირას, იხილა სიმონი და ანდრია, ძმა მისი, რომლებიც ისროდნენ ბადეს ზღვაში, რადგან იყვნენ მებადურები.

¹⁷და უთხრა მათ იესომ: მოდით და შემომიდექით მე და გაქცევთ თქვენ კაცთა მებადურებად.

¹⁸და მყისვე დატოვეს ბადეები და გაჰყვნენ მას.

¹⁹და ცოტა რომ გაიარა, იხილა იაკობ ზებედესი და იოანე, ძმა მისი; ისინიც ამზადებდნენ ბადეებს ნავში.

²⁰და მყისვე უხმო მათ. და მათ დატოვეს თავისი მამა, ზებედე, ნავში მუშებთან და გაჰყვნენ მას,

²¹და შევიდნენ კაპერნაუმში, და მაშინვე, შაბათს, შევიდა შესაკრებელში და ასწავლიდა.

²²და განცვიფრებული იყვნენ მისი მოძღვრებით, რადგან ასწავლიდა მათ, როგორც ხელმწიფების მქონე და არა როგორც მწიგნობრები.

²³და იყო მათ შესაკრებელში კაცი, არაწმინდა სულით შეპყრობილი, და შეჰყვირა

²⁴და თქვა: ეჰა, რა გინდა ჩვენგან შენ, იესო ნაზარეველო? მოხვედი ჩვენს წარსაწყმედად? გიცნობთ შენ, ვინ ხარ, წმიდა ღვთისა.

²⁵და შერისხა იგი იესომ და უთხრა გაჩუმდი და გადი მაგისგან

²⁶და დაანარცხა იგი არაწმინდა სულმა და იყვირა დიდი ხმით და გავიდა მისგან.

²⁷და გაოცდა ყველა, ისე რომ კამათობდნენ ერთმანეთში და ამბობდნენ: ვინ არის ეს? რა არის ეს ახალი მოძღვრება, რომ ხელმწიფებით არაწმინდა სულებსაც უბრძანებს და ემორჩილებიან მას?

²⁸და გავრცელდა მისი ამბავი მყისვე გალილეის მთელ შემოგარენში.

²⁹და მაშინვე გამოვიდა შესაკრებლიდან და მივიდა სიმონისა და ანდრიას სახლში. იაკობთან და იოანესთან ერთად.

³⁰ხოლო სიმონის სიდედრი იწვა ცხელებით და მაშინვე უთხრეს მას მის შესახებ.

³¹და მივიდა და მოჰკიდა ხელი და ააყენა იგი; და მყისვე დატოვა იგი ცხელებამ და ემსახურებოდა მათ.

³²ხოლო როცა მოსაღამოვდა, მზის ჩასვლისას, მოჰყავდათ მასთან ყველა ავადმყოფი და ეშმაკეული

³³და მთელი ქალაქი შეკრებილი იყო კარების წინ.

³⁴და განკურნა მრავალი ავადმყოფი. სხვადასხვა სენისგან და მრავალი ეშმაკი განდევნა, და არ ანებებდა ეშმაკებს თქმას, რომ იცოდნენ, რომ იგია ქრისტე.

³⁵და განთიადისას, რიჟრაჟზე, ადგა და გამოვიდა და მივიდა უდაბურ ადგილას და იქ ლოცულობდა.

³⁶და მისდევდნენ. მას სიმონი და ვინც მასთან იყო.

³⁷და იპოვეს იგი და უთხრეს მას: ყველანი გეძებენ შენ.

³⁸და უთხრა მათ: მოდით, წავიდეთ მახლობელ დაბა-ქალაქებში, რომ იქაც ვიქადაგო, რადგან ამისთვის მოვედი.

³⁹და ქადაგებდა მათ შესაკრებლებში მთელ გალილეაში და ეშმაკებს დევნიდა.

⁴⁰მივიდა მასთან კეთროვანი და ევედრებოდა მას მუხლმოდრეკილი და ეუბნებოდა: თუ გნებავს, შეგიძლია ჩემი განწმენდა,

⁴¹ხოლო იესოს შეებრალა, გაიწოდა ხელი და შეახო მას და უთხრა: მნებავს, განიწმინდე.

⁴²და როდესაც ეს თქვა, მაშინვე მოშორდა მას კეთრი და განიწმინდა.

⁴³და მკაცრად მიმართა მას და მაშინვე გააგდო იგი

⁴⁴და უთხრა მას: იცოდე, არავის არაფერი უთხრა, არამედ წადი და უჩვენე შენი თავი მღვდელს და შესწირე შენი განწმენდისათვის, რაც ბრძანა მოსემ მათთვის დასამოწმებლად;

⁴⁵ხოლო როდესაც იგი გამოვიდა, დაიწყო ბევრი ქადაგება და გავრცელება სიტყვისა, ისე რომ აღარ შეეძლო მას ცხადად ქალაქში შესვლა, არამედ გარეთ, უდაბურ ადგილებში, იმყოფებოდა და მიდიოდნენ მასთან ყოველი მხრიდან.