Read ახალი აღთქმა წიგნი მარკოზისა 11 Bible Online

წიგნი მარკოზისა 11 - ახალი აღთქმა bible

წიგნი მარკოზისა 11

¹და როდესაც მიუახლოვდნენ იერუსალიმს, ბეთბაგეს და ბეთანიას, ზეთისხილის მთასთან, გაგზავნა თავისი ორი მოწაფე

²და უთხრა მათ: წადით დაბაში, რომელიც არის თქვენ პირდაპირ და როგორც კი შეხვალთ მასში, იპოვით დაბმულ კვიცს, რომელზეც კაცთაგან არავინ მჯდარა; ახსენით იგი და მომიყვანეთ.

³და თუ ვინმე გეტყვით თქვენ: რას აკეთებთ ამას? უთხარით: უფალს სჭირდება, და მაშინვე გამოგზავნის მას აქ.

⁴და წავიდნენ და იპოვეს კვიცი, დაბმული კართან, გარეთ, ქუჩაში და ახსნეს იგი.

⁵და ზოგიერთები იქ მდგომთაგან ეუბნებოდნენ მათ: რას აკეთებთ, რატომ ხსნით კვიცს?

⁶ხოლო მათ უთხრეს, როგორც უბრძანა იესომ, და გაუშვეს ისინი

⁷და მიიყვანეს კვიცი იესოსთან და დადეს მასზე თავისი სამოსი და დაჯდა მასზე.

⁸და ბევრი თავის სამოსს უფენდა გზაზე, ხოლო სხვები ჭრიდნენ რტოებს ხეებიდან და უფენდნენ გზაზე.

⁹და ვინც წინ უძღოდა და ვინც უკან მიჰყვებოდა, ღაღადებდა და ამბობდა: ოსანა! კურთხეულია მომავალი უფლის სახელით (ფს.117,26)!

¹⁰კურთხეულია ჩვენი მამის, დავითის, მომავალი მეუფება! ოსანა მაღალთა შინა!

¹¹და შევიდა იესო იერუსალიმში, ტაძარში, და გადახედა ყველაფერს. უკვე საღამო ხანი იყო და გავიდა ბეთანიაში თორმეტთან ერთად.

¹²და მომდევნო დღეს, როცა გამოდიოდნენ ისინი ბეთანიიდან, მოშივდა.

¹³და დაინახა შორიდან ლეღვის ხე, რომელსაც ჰქონდა ფოთლები. მივიდა, რომ იქნებ რამე ეპოვა მასზე და, როცა მივიდა მასთან, ვერაფერი იპოვა, გარდა ფოთლებისა, რადგან არ იყო ლეღვის დრო;

¹⁴და უთხრა მას: ნუღარავინ შეჭამს უკუნისამდე შენგან ნაყოფს! და ესმოდათ მის მოწაფეებს.

¹⁵და მივიდნენ იერუსალიმში და შევიდა იესო ტაძარში და დაიწყო გამოყრა, ვინც ყიდდა და ყიდულობდა ტაძარში და მეკერმეთა მაგიდები და მტრედის გამყიდველთა დასასხდომები დაამხო,

¹⁶და არ უშვებდა, რომ ვინმეს გამოეტანა ნივთი ტაძრის გავლით;

¹⁷და ასწავლიდა და ეუბნებოდა მათ: წერია: ჩემს სახლს სალოცავი სახლი ეწოდოს ყველა წარმართის მიერ, ხოლო თქვენ გიქცევიათ იგი ავაზაკთა გამოქვაბულად (ეს.56,7; იერ.7,11).

¹⁸და ესმოდათ მღვდელმთავრებს და მწიგნობრებს და ეძიებდნენ, როგორ დაეღუპათ იგი; და ეშინოდათ მისი, რადგან მთელი ხალხი განცვიფრებული იყო მისი მოძღვრებით.

¹⁹და როცა მოსაღამოვდა, გავიდა ქალაქგარეთ.

²⁰და როდესაც ჩაიარეს, განთიადისას, ნახეს ლეღვის ხე, გამხმარი ძირიდან.

²¹და გაახსენდა პეტრეს და უთხრა მას: რაბი, აჰა, ლეღვის ხე რომელიც დაწყევლე გახმა.

²²და მიუგო იესომ და უთხრა მათ:

²³თუ გაქვთ რწმენა ღვთისა, ამინ გეუბნებით თქვენ, რომ ვინც ეტყვის ამ მთას: აღმოიფხვერი და ჩავარდი ზღვაში, — და არ დაეჭვდება თავის გულში, არამედ ირწმუნებს, რომ, რასაც ამბობს, მოხდება, იქნება ისე.

²⁴ამიტომ გეუბნებით თქვენ: ყველაფერს, რასაც ლოცვისას ითხოვთ, გწამდეთ, რომ მიიღებთ, და იქნება თქვენთვის.

²⁵და როდესაც დგახართ და ლოცულობთ, მიუტევეთ, თუ გაქვთ რამე ვინმეს წინააღმდეგ, რათა თქვენმა ზეციერმა მამამაც მოგიტეოთ თქვენ თქვენი შეცოდებები;

²⁶ხოლო თუ თქვენ არ მიუტევებთ, არც მამა თქვენი ზეციერი მოგიტევებთ თქვენს შეცოდებებს.

²⁷და მივიდნენ კვლავ იერუსალიმში. და როდესაც დადიოდა იგი ტაძარში, მივიდნენ მასთან მღვდელმთავრები და მწიგნობრები და უხუცესები

²⁸და ეუბნებოდნენ მას: რომელი ხელმწიფებით აკეთებ ამას? ან ვინ მოგცა შენ ეს ხელმწიფება, რომ ამას აკეთებ?

²⁹ხოლო იესომ მიუგო და უთხრა მათ: გკითხავთ მეც თქვენ ერთ სიტყვას და მიპასუხეთ მე და გეტყვით თქვენ, რომელი ხელმწიფებით ვაკეთებ ამას:

³⁰ნათლისცემა იოანესი ზეციდან იყო თუ კაცთაგან? მიპასუხეთ მე;

³¹ხოლო ისინი ბჭობდნენ თავისთვის და ამბობდნენ: თუ ვიტყვით: ზეციდან, გვეტყვის: რატომ არ ირწმუნეთ მისი?

³²მაგრამ თუ ვიტყვით: კაცთაგან, გვეშინია ხალხისა, რადგან ყველამ იცის, რომ იოანე ჭეშმარიტად წინასწარმეტყველი იყო.

³³და მიუგეს და უთხრეს იესოს: არ ვიცით. და მიუგო იესომ და უთხრა მათ: არც მე გეტყვით თქვენ, რომელი ხელმწიფებით ვაკეთებ ამას.