Read ახალი აღთქმა წიგნი მარკოზისა 13 Bible Online

წიგნი მარკოზისა 13 - ახალი აღთქმა bible

წიგნი მარკოზისა 13

¹და როდესაც გამოდიოდა იგი ტაძრიდან, უთხრა მას ერთმა თავისმა მოწაფეთაგანმა: მოძღვარო, ნახე, როგორი ქვებია და როგორი ნაგებობები.

²და მიუგო იესომ და უთხრა მას: ხედავ ამ დიდ ნაგებობებს? არ დარჩება აქ ქვა ქვაზე, რომელიც არ დაირღვევა.

³და როცა დაჯდა იგი ზეთისხილის მთაზე, ტაძრის პირდაპირ, ეკითხებოდნენ მას განმარტოებით პეტრე და იაკობი, იოანე და ანდრია:

⁴გვითხარი ჩვენ, როდის იქნება ეს და რა იქნება ნიშანი, როდესაც ეს ყოველივე უნდა აღსრულდეს?

⁵ხოლო იესომ მიუგო და დაიწყო საუბარი მათთან: გაფრთხილდით, ვინმემ არ გაცდუნოთ თქვენ,

⁶რადგან მრავალი მოვა ჩემი სახელით და იტყვის: მე ვარ. და მრავალს აცდუნებენ.

⁷და როდესაც გაიგებთ ომებზე და ომების ამბებს, ნუ შეძრწუნდებით, რადგან ეს უნდა იყოს, მაგრამ ჯერ არ არის აღსასრული;

⁸რადგან აღდგება ხალხი ხალხის წინააღმდეგ და სამეფო სამეფოს წინააღმდეგ და იქნება მიწისძვრები ადგილ-ადგილ და იქნება შიმშილი და არეულობა; ეს არის ტკივილების დასაწყისი.

⁹და გაუფრთხილდით თქვენ თქვენს თავს, რადგან გადაგცემენ თქვენ საკრებულოს და თავის შესაკრებლებში დაგტანჯავენ თქვენ და მთავართა და მეფეთა წინაშე წარგადგენენ ჩემს გამო მათთვის დასამოწმებლად,

¹⁰და ყველა წარმართს ჯერ უნდა ექადაგოს სახარება.

¹¹ხოლო როდესაც მიგიყვანენ თქვენ და გადაგცემენ, წინასწარ ნუ ზრუნავთ და ნუ იღვწით, რა თქვათ, არამედ რაც მოგეცემათ თქვენ იმ დროს, ის თქვით, რადგან არა თქვენ იქნებით მეტყველნი, არამედ სულიწმიდა.

¹²და გადასცემს ძმა ძმას სასიკვდილოდ და მამა — შვილს და აღდგებიან შვილები მშობლებზე და დახოცავენ მათ.

¹³და იქნებით მოძულებულნი ყველასგან ჩემი სახელის გამო; და ვინც მოითმენს ბოლომდე, ის ცხონდება.

¹⁴ხოლო როდესაც იხილავთ მოოხრების სისაძაგლეს, თქმულს დანიელ წინასწარმეტყველის მიერ — მდგომარეს, სადაც არ არის მართებული (დან.9,27) — ვინც წაიკითხავს, გულისხმაყოს. მაშინ ვინც ჰურიასტანში იქნება, გაიქცეს მთაში,

¹⁵ხოლო ვინც ერდოზე იქნება, ნუ ჩამოვა სახლში, ნურც შევა რამის ასაღებად თავისი სახლიდან;

¹⁶და ვინც ველზე იქნება, ნუ მობრუნდება უკან თავისი სამოსის ასაღებად.

¹⁷ხოლო ვაი ორსულებს და ვინც აწოვებს იმ დღეებში.

¹⁸არამედ ილოცეთ, რომ არ მოხდეს თქვენი გაქცევა ზამთარში.

¹⁹რადგან იქნება ის დღეები გაჭირვებისა, რომლის მსგავსი არ ყოფილა დასაბამიდან შექმნისა როცა შექმნა ღმერთმა — აქამდე, და არც იქნება.

²⁰და თუ უფალი არ შეამოკლებს იმ დღეებს, ვერ გადარჩება ვერც ერთი ხორციელი; არამედ რჩეულთათვის, რომლებიც გამოირჩია, შეამოკლებს დღეებს.

²¹და მაშინ თუ ვინმე გეტყვით თქვენ: აჰა, აქ არის ქრისტე, ან აჰა — იქ, — ნუ ირწმუნებთ;

²²რადგან აღდგებიან ცრუქრისტენი და ცრუწინასწარმეტყველნი და აღასრულებენ სასწაულებს და ნიშნებს, რომ აცდუნონ, თუ შეძლებენ, რჩეულნიც;

²³და თქვენ გაფრთხილდით; აჰა, წინასწარ გითხარით თქვენ ყველაფერი.

²⁴ხოლო იმ დღეებში, იმ გაჭირვების შემდეგ, მზე დაბნელდება და მთვარე არ გამოსცემს თავის ნათელს

²⁵და ვარსკვლავები ჩამოცვივა ზეციდან და ძალები, რომლებიც იქნება ცაში, შეიძვრება (ეს.13,10; ეზეკ.32,7).

²⁶მაშინ იხილავენ ძეს კაცისას, მომავალს ღრუბლებზე მრავალი ძალითა და დიდებით (დან.7,13-14).

²⁷და მაშინ მოავლენს თავის ანგელოზებს და შეკრებს თავის რჩეულებს ოთხივე ქართაგან, ქვეყნის კიდიდან ცის კიდემდე.

²⁸ხოლო ლეღვის ხის მაგალითით ისწავლეთ: როცა უკვე მისი რტო დარბილდება და გამოვა ფოთოლი, იცოდეთ, რომ ახლოს არის ზაფხული;

²⁹ასევე თქვენც, როცა იხილავთ, რომ ეს ყველაფერი მოხდა, იცოდეთ, რომ ახლოს არის, კარებთან.

³⁰ამინ გეუბნებით თქვენ: არ გადავა ეს მოდგმა, ვიდრე ეს ყოველივე არ იქნება.

³¹ცა და ქვეყანა გადავა, ხოლო ჩემი სიტყვები არ გადავა.

³²ხოლო იმ დღის ან ჟამის შესახებ არავინ იცის: არც ანგელოზებმა ცაში, არც ძემ, არამედ მამამ.

³³გაფრთხილდით, იფხიზლეთ და ილოცეთ, რადგან არ იცით, როდის იქნება ჟამი —

³⁴როგორც კაცი, გზად მიმავალი, ტოვებს თავის სახლს და აძლევს თავის მონებს ძალაუფლებას და თითოეულს მის საქმეს და მეკარეს უბრძანებს, რომ იფხიზლოს

³⁵ასე რომ იფხიზლეთ, რადგან არ იცით, როდის მოვა სახლის პატრონი — საღამოს თუ შუაღამისას, მამლის ყივილისას თუ განთიადისას.

³⁶ვაითუ მოვიდეს უეცრად და გიპოვოთ თქვენ მძინარენი;

³⁷ხოლო რასაც თქვენ გეუბნებით, ყველას ვეუბნები: იფხიზლეთ!