Read ახალი აღთქმა წიგნი მარკოზისა 15 Bible Online

წიგნი მარკოზისა 15 - ახალი აღთქმა bible

წიგნი მარკოზისა 15

¹და მაშინვე, განთიადისას, ბჭობა გამართეს მღვდელმთავრებმა უხუცესებთან და მწიგნობრებთან ერთად და მთელმა საკრებულომ; და შეკრეს იესო და წაიყვანეს და გადასცეს იგი პილატეს.

²და ჰკითხა მას პილატემ: შენა ხარ მეფე იუდეველთა? ხოლო მან მიუგო და უთხრა მას: შენ ამბობ.

³და ბევრ რამეს აბრალებდნენ მას მღვდელმთავრები.

⁴და პილატემ კვლავ ჰკითხა მას და უთხრა: არაფერს მიუგებ? აჰა, რამდენს გაბრალებენ შენ,

⁵ხოლო იესომ აღარაფერი მიუგო, ისე რომ უკვირდა პილატეს.

⁶და ყოველ დღესასწაულზე უთავისუფლებდა მათ ერთი პატიმარს, რომელსაც სთხოვდნენ.

⁷და იყო ვინმე, რომელსაც ერქვა ბარაბა, მეამბოხეებთან ერთად შეპყრობილი, რომელსაც ამბოხებისას მკვლელობა ჩაედინა.

⁸და აყვირდა ხალხი და დაიწყო თხოვნა იმისა, რასაც მუდამ უკეთებდა მათ.

⁹ხოლო პილატემ მიუგო მათ და უთხრა: გინდათ, გაგითავისუფლოთ თქვენ მეფე იუდეველთა?

¹⁰რადგან იცოდა, რომ შურის გამო გადასცეს იგი მღვდელმთავრებმა;

¹¹ხოლო მღვდელმთავრებმა წააქეზეს ხალხი, რომ უმჯობესი იყო, ბარაბა გაეთავისუფლებინა მათთვის;

¹²ხოლო პილატემ კვლავ მიუგო და უთხრა მათ: რა გინდათ, რომ ვუყო, ვისაც უწოდებთ იუდეველთა მეფეს?

¹³და მათ კვლავ იყვირეს: ჯვარს აცვი იგი!

¹⁴ხოლო პილატე ეუბნებოდა მათ: რა ბოროტება ჩაიდინა? და ისინი უფრო მეტად ყვიროდნენ: ჯვარს აცვი იგი!

¹⁵ხოლო პილატეს სურდა ხალხის მომადლიერება და გაუთავისუფლა მათ ბარაბა და იესოს შოლტით სცემა და გადასცა, რათა ჯვარცმულიყო.

¹⁶და წაიყვანეს ჯარისკაცებმა იგი შიდა ეზოში, რომელიც არის პრეტორიუმი, და მოუხმეს მთელ მხედრობას.

¹⁷და შემოსეს იგი ძოწეულით და დაადგეს მას დაწნული ეკლის გვირგვინი

¹⁸და დაუწყეს მისალმება მას: გიხაროდეს, მეფეო იუდეველთა!

¹⁹და ურტყამდნენ მას თავში ლერწამს და აფურთხებდნენ მას და მუხლს იყრიდნენ და თაყვანს სცემდნენ მას.

²⁰და როდესაც შეურაცხყვეს იგი, გახადეს მას ძოწეული და შემოსეს იგი თავისივე სამოსით და გაიყვანეს იგი, რათა ჯვარს ეცვათ.

²¹და აიძულეს ვინმე გამვლელი, სიმონ კვირინელი, მომავალი მინდვრიდან, მამა ალექსანდრესი და რუფესი, რომ აეღო მისი ჯვარი.

²²და მიიყვანეს იგი გოლგოთის ადგილზე, რაც ითარგმნება: თხემის ადგილი.

²³და აძლევდნენ მას. შემურვილ ღვინოს, ხოლო მან არ მიიღო.

²⁴და ჯვარს აცვეს იგი და იყოფდნენ მის სამოსს და წილს იყრიდნენ იმაზე, ვის რა აეღო.

²⁵ხოლო იყო ჟამი მესამე და ჯვარს აცვეს იგი.

²⁶და იყო წარწერა მისი ბრალდებისა, დაწერილი: მეფე იუდეველთა.

²⁷მასთან ერთად ჯვარს აცვეს ორი ავაზაკი, ერთი მის მარჯვნივ და ერთი — მარცხნივ.

²⁸და აღსრულდა დაწერილი, რომელიც ამბობს: უსჯულოებთან შეირაცხა (ეს.53,12).

²⁹და გამვლელები გმობდნენ მას, აქნევდნენ თავებს და ამბობდნენ: ეჰა, რომელიც ანგრევ ტაძარს და სამ დღეში აშენებ,

³⁰იხსენი შენი თავი და გადმოდი ჯვრიდან.

³¹ასევე მღვდელმთავრებიც დასცინოდნენ ერთმანეთში მწიგნობრებთან ერთად და ამბობდნენ: სხვები იხსნა, ხოლო თავისი თავის ხსნა არ ძალუძს.

³²ქრისტე, მეფე ისრაელისა, გადმოვიდეს ახლა ჯვრიდან, რომ ვნახოთ და ვირწმუნოთ იგი. და მასთან ერთად ჯვარცმულნიც კიცხავდნენ მას.

³³და როცა იყო ჟამი მეექვსე, დაბნელდა მთელ ქვეყანაზე მეცხრე ჟამამდე.

³⁴და მეცხრე ჟამზე შეღაღადა იესომ დიდი ხმით და თქვა: ელოი, ელოი, ლამა საბაქთანი? რაც ითარგმნება: ღმერთო ჩემო, ღმერთო ჩემო, რად დამტოვე მე (ფს.21,2)?

³⁵და ზოგიერთმა წინ მდგომმა გაიგონა და ამბობდა: აჰა, ელიას უხმობს;

³⁶და გაიქცა ვიღაცა და აავსო ღრუბელი ძმრით, დააგო ლერწამზე, ასმევდა მას და ამბობდა: აცალეთ, ვნახოთ, თუ მოვა ელია, რომ გადმოხსნას იგი;

³⁷ხოლო იესომ შეღაღადა დიდი ხმით და განუტევა სული.

³⁸და კრეტსაბმელი ტაძრისა გაიპო ორად, ზემოდან ქვემოთ.

³⁹როდესაც იხილა ასისთავმა, რომელიც იდგა მის წინ, რომ ასე შეღაღადა და განუტევა სული, თქვა: ჭეშმარიტად ეს კაცი ძე ღვთისა იყო.

⁴⁰და იყვნენ დედაკაცებიც, რომლებიც შორიდან უყურებდნენ და რომლებთანაც იყო მარიამ მაგდალელი და მარიამი, იაკობ მცირისა და იოსეს დედა, და სალომე,

⁴¹რომლებიც, როდესაც იყო გალილეაში, გაჰყვნენ მას და ემსახურებოდნენ მას, და სხვაც მრავალი, ვინც მასთან ერთად ავიდა იერუსალიმში.

⁴²როდესაც მოსაღამოვდა — რადგან პარასკევი იყო, რომელიც არის შაბათზე წინ

⁴³მოვიდა იოსები არიმათიიდან, ჩინებული მრჩეველი, რომელიც ასევე მოელოდა ღვთის სასუფეველს, და გაბედა შესვლა პილატესთან და გამოითხოვა გვამი იესოსი;

⁴⁴ხოლო პილატეს გაუკვირდა, რომ უკუე მომკვდარიყო, და მოუხმო ასისთავს და ჰკითხა მას: დიდი ხანია, რაც მოკვდა?

⁴⁵და როცა გაიგო ასისთავისგან, უბოძა გვამი იოსებს.

⁴⁶და იყიდა სუდარა და გადმოხსნა იგი, შემოახვია სუდარა და დადო იგი საფლავში, რომელიც გამოკვეთილი იყო კლდეში, და მიაგორა ლოდი საფლავის კართან;

⁴⁷ხოლო მარიამ მაგდალელი და მარიამ იოსესი უყურებდნენ, სად დადეს.