Read ახალი აღთქმა წიგნი მარკოზისა 16 Bible Online

წიგნი მარკოზისა 16 - ახალი აღთქმა bible

წიგნი მარკოზისა 16

¹და როდესაც გავიდა შაბათი, მარიამ მაგდალელმა და მარიამ იაკობისამ და სალომემ იყიდეს ნელსაცხებელი, რათა მისულიყვნენ და ეცხოთ მისთვის.

²და ადრე განთიადისას, ერთშაბათს, მივიდნენ საფლავზე მზის ამოსვლისას

³ეუბნებოდნენ ერთმანეთს: ვინ გადაგვიგორებს ჩვენ ლოდს საფლავის კარიდან?

⁴და შეხედეს და დაინახეს, რომ გადაგორებული იყო ლოდი, რომელიც იყო ძალიან დიდი.

⁵და შევიდნენ რა საფლავში, იხილეს ჭაბუკი, მჯდომარე მარჯვნივ, შემოსილი თეთრი სამოსლით, და გაოცდნენ;

⁶ხოლო მან უთხრა მათ: ნუ გაოცდებით; იესოს ეძებთ, ნაზარეველს ჯვარცმულს? აღდგა, არ არის აქ; აჰა, ადგილი, სადაც დადეს იგი;

⁷არამედ წადით, უთხარით მის მოწაფეებს და პეტრეს, რომ წინ მიგიძღვით თქვენ გალილეაში; იქ იხილავთ მას, როგორც გითხრათ თქვენ.

⁸და გამოვიდნენ და გაიქცნენ საფლავიდან, რადგან კანკალებდნენ და გაოგნებულნი იყვნენ და არავის არაფერი უთხრეს, რადგან ეშინოდათ.

⁹და როცა აღდგა განთიადისას, პირველ შაბათს, გამოეცხადა პირველად მარიამ მაგდალელს, რომლისგანაც განდევნა შვიდი ეშმაკი.

¹⁰და იგი წავიდა და აუწყა მათ, ვინც მასთან იყო, რომლებიც გლოვობდნენ და ტიროდნენ;

¹¹და მათ გაიგეს რა, რომ ცოცხალია და ეჩვენა მას, არ ირწმუნეს.

¹²ხოლო ამის შემდეგ ორ მათგანს, მიმავალს, გამოეცხადა სხვა სახით, როდესაც მიდიოდნენ სოფელში;

¹³და ისინი მივიდნენ და აუწყეს დანარჩენებს, და არც მათი ირწმუნეს.

¹⁴ბოლოს ინახით მჯდომ იმ თერთმეტს გამოეცხადა და გაკიცხა მათი ურწმუნოება და გულქვაობა, რადგან ვინც იხილა იგი აღმდგარი, მათი არ ირწმუნეს.

¹⁵და უთხრა მათ: წადით მთელ ქვეყანაზე და უქადაგეთ სახარება ყოველ დაბადებულს.

¹⁶ვინც ირწმუნებს და ნათელს იღებს, ცხონდება, ხოლო ვინც არ ირწმუნებს, დაისჯება.

¹⁷და ვინც ირწმუნა, მათ თან სდევთ სასწაულები: ჩემი სახელით ეშმაკებს განდევნიან, ახალ ენებზე ამეტყველდებიან,

¹⁸გველებს აიყვანენ და თუ სასიკვდილო რამეს დალევენ, არ ავნებს მათ, სნეულებს ხელს დაადებენ და განიკურნებიან.

¹⁹და უფალი მათთან საუბრის შემდეგ ამაღლდა ზეცად და დაჯდა ღვთის მარჯვნივ

²⁰ხოლო ისინი გამოვიდნენ და ქადაგებდნენ ყველგან უფლის შეწევნით და სიტყვას ამტკიცებდნენ სასწაულებით, რომლებიც თან სდევდა მას. ამინ.