Read ახალი აღთქმა წიგნი მარკოზისა 2 Bible Online

წიგნი მარკოზისა 2 - ახალი აღთქმა bible

წიგნი მარკოზისა 2

¹და შევიდა კვლავ კაპერნაუმში რამდენიმე დღის შემდეგ და გაიგეს, რომ სახლშია.

²და მაშინვე შეიკრიბნენ ბევრნი, ისე რომ აღარ იყო ტევა კარის წინაც კი, და ეუბნებოდა მათ სიტყვას.

³და მივიდნენ მასთან და მიიყვანეს დავრდომილი, რომელიც მოჰყავდა ოთხს;

⁴და რადგან ვერ შეძლეს მიახლოება მასთან ხალხის გამო, მოხადეს სახურავი სახლს, სადაც იყო იგი, გათხარეს და ჩაუშვეს საწოლი, რომელზეც იწვა დავრდომილი.

⁵და იხილა იესომ მათი რწმენა და უთხრა დავრდომილს: შვილო, მოგეტეოს შენ შენი ცოდვები.

⁶ხოლო იყო იქ ზოგი მწიგნობართაგანი, იჯდა და ფიქრობდა თავის გულში:

⁷რად ამბობს ეს ასე? გმობს; ვის შეუძლია ცოდვების მიტევება, თუ არა მხოლოდ ღმერთს?

⁸და მყისვე გულისხმაყო იესომ თავისი სულით, რომ ასე ფიქრობდნენ თავის გულში და უთხრა მათ: რად ფიქრობთ მაგას თქვენს გულში?

⁹რა უფრო ადვილია, თქმა დავრდომილისთვის: მოგეტევა შენ ცოდვები, თუ თქმა: ადექი, აიღე შენი საწოლი და იარე?

¹⁰ხოლო რათა იცოდეთ, რომ ხელმწიფება აქვს ძეს კაცისას ქვეყანაზე ცოდვების მიტევებისა, უთხრა დავრდომილს:

¹¹შენ გეუბნები, ადექი, აიღე შენი საწოლი და წადი შენს სახლში!

¹²და ადგა და მაშინვე აიღო საწოლი და გამოვიდა ყველას წინაშე, ისე რომ გაოგნდა ყველა და ადიდებდნენ ღმერთს და ამბობდნენ: ამგვარი რამ არასოდეს გვიხილავს.

¹³და გავიდა კვლავ ზღვის პირას და მთელი ხალხი მიდიოდა მასთან და ასწავლიდა მათ.

¹⁴და როდესაც გაიარა, იხილა ლევი, ალფესი, მჯდომარე საზვერეში, და უთხრა მას: გამომყევი მე. და ადგა და გაჰყვა მას.

¹⁵და იყო, როდესაც ინახით იჯდა იგი მის სახლში, მრავალი მეზვერე და ცოდვილი იჯდა თანამეინახედ იესოსთან და მის მოწაფეებთან, რადგან ბევრნი იყვნენ და მიჰყვებოდნენ მას.

¹⁶და მწიგნობრებმა და ფარისევლებმა, როდესაც ნახეს იგი, რომ მეზვერეებთან და ცოდვილებთან ჭამდა, უთხრეს მის მოწაფეებს: რატომ ჭამს და სვამს მეზვერეებთან და ცოდვილებთან?

¹⁷და გაიგონა იესომ და უთხრა მათ: არ სჭირდებათ მკურნალი ჯანმრთელებს, არამედ ავადმყოფებს; არ მოვსულვარ მოსაწოდებლად მართალთა, არამედ ცოდვილთა.

¹⁸და როდესაც მარხულობდნენ იოანეს და ფარისეველთა მოწაფეები, მივიდნენ და უთხრეს მას: რატომ მარხულობენ იოანეს და ფარისეველთა მოწაფეები, ხოლო შენი მოწაფეები არ მარხულობენ?

¹⁹და უთხრა მათ იესომ: განა შეუძლიათ ქორწილის ძეებს მარხვა, ვიდრე სიძე არის მათთან? ვიდრე სიძე არის მათთან, არ შეუძლიათ მარხვა,

²⁰ხოლო მოვა დღეები, როცა წაიყვანენ მათგან სიძეს და მაშინ იმარხულებენ, იმ დღეებში.

²¹არავინ ადებს ახალი ნაჭრის საკერებელს ძველ სამოსს, თორემ დაარღვევს ახალი ძველის მთლიანობას და უფრო დაიხევა.

²²და არავინ ასხამს ახალ ღვინოს ძველ თხიერებში, თორემ გახეთქავს ახალი ღვინო თხიერებს და ღვინო დაიღვრება და თხიერები უვარგისი გახდება, არამედ ახალ ღვინოს ახალ თხიერებში ასხამენ.

²³და იყო, როდესაც მიდიოდა იგი შაბათს ნათესებში, მისმა მოწაფეებმა დაიწყეს გზად თავთავების მოწყვეტა.

²⁴და ფარისევლები ეუბნებოდნენ მას: ნახე, იმას აკეთებენ შაბათს, რაც არ არის მართებული?

²⁵და მან უთხრა მათ: არასოდეს ამოგიკითხავთ, რა გააკეთა დავითმა, როდესაც დასჭირდა, როცა მოშივდათ მას და მასთან მყოფებს?

²⁶როგორ შევიდა ღვთის სახლში აბიათარის მღვდელმთავრობისას და შესაწირავი პურები შეჭამა, რომელთა ჭამაც არ იყო მართებული არავისთვის, მღვდლების გარდა, და მისცა იმათაც, ვინც მასთან იყო?

²⁷და ეუბნებოდა მათ: შაბათი კაცისათვის შეიქმნა და არა კაცი — შაბათისათვის.

²⁸ასე რომ, ძე კაცისა უფალი არის შაბათისაც.