Read ახალი აღთქმა წიგნი მარკოზისა 3 Bible Online

წიგნი მარკოზისა 3 - ახალი აღთქმა bible

წიგნი მარკოზისა 3

¹და შევიდა კვლავ შესაკრებელში; და იყო იქ კაცი, რომელსაც გამხმარი ჰქონდა ხელი.

²და უთვალთვალებდნენ მას, შაბათს თუ განკურნავდა, რათა დაესმინათ იგი.

³და უთხრა კაცს, რომელსაც გამხმარი ჰქონდა ხელი: ადექი და დადექი შუაში!

⁴და უთხრა მათ: მართებულია შაბათს სიკეთის კეთება, თუ ბოროტების კეთება, სულის ცხონება, თუ დაღუპვა? ხოლო ისინი დუმდნენ.

⁵და შეხედა მათ რისხვით და შეწუხებულმა მათი გულქვაობით, უთხრა კაცს: გაშალე შენი ხელი, და გაშალა და აღუდგა მას ხელი.

⁶და როდესაც გამოვიდნენ ფარისევლები, მაშინვე ბჭობა გამართეს ჰეროდიანებთან მის წინააღმდეგ, თუ როგორ დაეღუპათ იგი;

⁷ხოლო იესო თავის მოწაფეებთან ერთად გაშორდა მათ და წავიდა ზღვისკენ; და მრავალი ხალხი გაჰყვა მას გალილეიდან და ჰურიასტანიდან

⁸და იერუსალიმიდან და იდუმეიდან და იორდანის გაღმიდან და ტვიროსისა და სიდონის მხარიდან; და ძალიან ბევრი, ვინც გაიგო, რასაც აკეთებდა, მივიდა მასთან.

⁹და უთხრა თავის მოწაფეებს, რომ ნავი გაემზადებინათ მისთვის ხალხის გამო, რათა არ შეევიწროებინათ იგი;

¹⁰რადგან მრავალი განკურნა, ამიტომ ზედ აწყდებოდნენ მას, რათა შეხებოდნენ, რომლებიც უძლურებაში იყვნენ.

¹¹და არაწმინდა სულები, როცა ხედავდნენ მას, ეცემოდნენ მის წინ, ღაღადებდნენ და ამბობდნენ: შენ ხარ ძე ღვთისა!

¹²და ძლიერ გაკიცხა ისინი, რათა არ გაეცხადებინათ იგი.

¹³და ავიდა მთაზე და მოუწოდა მათ, ვინც მას უნდოდა. და მივიდნენ მასთან.

¹⁴და დაადგინა თორმეტი, რათა ყოფილიყვნენ მასთან და გაეგზავნა ისინი საქადაგებლად.

¹⁵და ჰქონოდათ ხელმწიფება ეშმაკთა განდევნისა;

¹⁶და დაარქვა სახელი სიმონს — პეტრე

¹⁷და იაკობ ზებედესას და იოანეს, იაკობის ძმას, მათაც დაარქვა სახელები, ბანერგესი, რაც არის ძენი ქუხილისა.

¹⁸ანდრიას და ფილიპეს, ბართლომეს და მათეს, თომას იაკობ ალფესას, თადეოზსა და სიმონ კანანელს

¹⁹და იუდა ისკარიოტელს, რომელმაც გასცა იგი.

²⁰და მივიდნენ სახლში და შეიკრიბა კვლავ ხალხი, ისე რომ ვერ შეძლეს მათ პურის ჭამაც.

²¹და გაიგეს მისიანებმა და გამოვიდნენ მის შესაპყრობად, რადგან ამბობდნენ, რომ შეიშალა.

²²და მწიგნობრები, რომლებიც იერუსალიმიდან იყვნენ ჩამოსულნი, ამბობდნენ: ბელზებული არის მასთან და ეშმაკთა მთავრით დევნის ეშმაკებს.

²³და მოუხმო მათ და იგავებით ეუბნებოდა: როგორ შეუძლია სატანას სატანის განდევნა?

²⁴და თუ სამეფო თავის თავში გაიყოფა, ვერ შეძლებს დგომას ის სამეფო;

²⁵და თუ სახლი თავის თავში გაიყოფა, ვერ შეძლებს ის სახლი დგომას;

²⁶და თუ სატანა აღუდგა თავის თავს და გაიყო, ვერ შეძლებს დგომას, არამედ აღსასრული დაუდგა.

²⁷არავის შეუძლია შესვლა ძლიერის სახლში და მისი ქონების გატაცება, თუ ჯერ ძლიერს არ შეკრავს, და მაშინღა გაძარცვავს მის სახლს.

²⁸ამინ გეუბნებით თქვენ, რომ ყველაფერი მიეტევებათ ადამიანთა ძეებს, ცოდვა და გმობა, რამდენსაც უნდა გმობდნენ,

²⁹ხოლო ვინც დაგმობს სულიწმიდას, არა აქვს მიტევება უკუნისამდე, არამედ ღირსია საუკუნო სასჯელისა;

³⁰რადგან ამბობდნენ: არაწმინდა სული არის მასთან.

³¹და მივიდნენ დედა მისი და ძმები და გარეთ დადგნენ და შეაგზავნეს მასთან და უხმობდნენ მას.

³²და ისხდა მის გარშემო ხალხი და უთხრეს მას: აჰა, დედა შენი და შენი ძმები გარეთ გეძებენ შენ.

³³და მიუგო მათ და უთხრა: ვინ არის დედა ჩემი ან ჩემი ძმები?

³⁴და გადახედა თავის გარშემო მსხდომთ და უთხრა: აჰა, დედა ჩემი და ჩემი ძმები, —

³⁵რადგან ვინც აღასრულებს ღვთის ნებას, ის არის ჩემი ძმა და ჩემი და, და დედა ჩემი.