Read ახალი აღთქმა წიგნი მარკოზისა 7 Bible Online

წიგნი მარკოზისა 7 - ახალი აღთქმა bible

წიგნი მარკოზისა 7

¹და შეიკრიბნენ მასთან ფარისევლები და ზოგი მწიგნობარი, მოსულები იერუსალიმიდან;

²და დაინახეს ზოგიერთი მისი მოწაფე არაწმინდა ხელებით, ესე იგი, დაუბანელით, ჭამდა პურს და კიცხავდნენ,

³რადგან ფარისევლები და ყველა იუდეველი, თუ გულმოდგინედ არ დაიბანენ ხელებს, არ ჭამენ, იცავენ რა ხუცესთა გადმოცემას.

⁴და მოედნებიდან როცა მოდიან, თუ არ დაიბანენ, არ ჭამენ; და სხვაც მრავალია, რაც მიიღეს დასაცავად: გარეცხვა სასმისებისა და ქილებისა და ქვაბებისა და ტახტებისა.

⁵მაშინ ჰკითხეს მას ფარისევლებმა და მწიგნობრებმა: რატომ არ მისდევენ შენი მოწაფეები ხუცესთა გადმოცემას, არამედ დაუბანელი ხელებით ჭამენ პურს?

⁶ხოლო მან მიუგო და უთხრა მათ: კარგად იწინასწარმეტყველა ესაიამ თქვენზე, თვალთმაქცებზე, როგორც წერია: ეს ერი ბაგით პატივს მცემს მე, ხოლო გული მათი შორს არის განშორებული ჩემგან;

⁷ამაოდ მემსახურებიან მე, რადგან ასწავლიან კაცთა მოძღვრებებსა და მცნებებს (ეს.39,13);

⁸რადგან დაგიტოვებიათ მცნება ღვთისა და იცავთ კაცთა გადმოცემას — რეცხავთ ქილებსა და სასმისებს და სხვა მრავალ ამის მსგავსს აკეთებთ.

⁹და ეუბნებოდა მათ: უარს კარგად ამბობთ ღვთის მცნებაზე, რომ თქვენი გადმოცემა დაიცვათ,

¹⁰რადგან მოსემ თქვა: პატივი ეცი მამას შენსას და დედას შენსას; და: ვინც იტყვის ბოროტს მამაზე ან დედაზე, სიკვდილით აღესრულოს (გამ.20,12; 21,7);

¹¹ხოლო თქვენ ამბობთ: თუ ეტყვის კაცი მამას ან დედას: კორბანი, რაც არის ძღვენი, რითაც ჩემგან უნდა გესარგებლა, —

¹²და უშვებთ, რომ მან არაფერი გაუკეთოს მამას ან დედას, —

¹³აუქმებთ ღვთის სიტყვას თქვენი გადმოცემით, რომელსაც ასწავლით; და ამის მსგავსს მრავალს აკეთებთ.

¹⁴და მოუხმო მთელ ხალხს და ეუბნებოდა მათ: ისმინეთ ჩემი ყველამ და გაიგეთ

¹⁵არაფერია გარედან შემავალი კაცში, რასაც შეუძლია მისი წაბილწვა, არამედ რაც გამოდის მისგან, ის არის, რაც ბილწავს კაცს.

¹⁶ვისაც აქვს ყურები სასმენად, ისმინოს!

¹⁷და როდესაც გამოვიდა ხალხიდან, შევიდა სახლში და ეკითხებოდნენ მას მისი მოწაფეები იგავზე.

¹⁸და უთხრა მათ: თქვენც ასევე უგულისხმონი ხართ? არ იცით, რომ არაფერს, გარედან შემავალს კაცში, არ შეუძლია მისი წაბილწვა?

¹⁹რადგან არ შედის იგი გულში, არამედ მუცელში და გასავალში გადის და გაწმენდს მთელ საჭმელს;

²⁰და ამბობდა: რაც კაცისგან გამოდის, ის ბილწავს კაცს,

²¹რადგან კაცთა გულის შიგნიდან გამოდის ბოროტი გულისზრახვები: მრუშობა, სიძვა, მკვლელობა,

²²პარვა, ანგარება, უკეთურება, მზაკვრობა, გარყვნილება, ავთვალობა, გმობა, ამპარტავნება, უგუნურება;

²³ყველა ეს ბოროტება შიგნიდან გამოდის და ბილწავს კაცს.

²⁴და ადგა იქიდან და წავიდა ტვიროსისა და სიდონის საზღვრებთან და შევიდა სახლში და არ უნდოდა, რომ გაეგო ვინმეს, და ვერ შეძლო დამალვა,

²⁵რადგან მაშინვე გაიგო მის შესახებ ვიღაც დედაკაცმა, რომლის ასულიც არაწმინდა სულით იყო შეპყრობილი, მივიდა და ფეხებში ჩაუვარდა მას

²⁶ხოლო დედაკაცი იყო წარმართი, წარმოშობით ასურელი ფინიკიელი და სთხოვდა მას, რათა განედევნა ეშმაკი მისი ასულისგან.

²⁷და იესომ უთხრა მას: აცალე, ჯერ გაძღნენ შვილები, რადგან არ არის კარგი პურის აღება შვილებისგან და ძაღლებისთვის დაგდება.

²⁸ხოლო მან მიუგო და უთხრა მას: ჰო, უფალო, მაგრამ ძაღლებიც ჭამენ ტაბლის ქვეშ შვილების ნამცეცებს.

²⁹და უთხრა მას: მაგ სიტყვის გამო წადი, გავიდა ეშმაკი შენი ასულისგან.

³⁰და წავიდა თავის სახლში და ნახა, რომ ბავშვი იწვა სარეცელზე და ეშმაკი გასულიყო.

³¹და კვლავ გამოვიდა ტვიროსისა და სიდონის საზღვრებიდან და მივიდა გალილეის ზღვასთან, ათქალაქის საზღვრებს შორის.

³²და მოუყვანეს მას ყრუ და ენაბრგვნილი და ევედრებოდნენ მას, რომ დაედო მისთვის ხელი.

³³და გაიყვანა იგი ხალხიდან განმარტოებით და დაადო თავისი თითები მას ყურებზე და დაანერწყვა და შეახო მის ენას,

³⁴და ახედა ცას, ამოიოხრა და უთხრა მას: ეფფათა! — რაც არის: გაიხსენი.

³⁵და მაშინვე გაეხსნა მას სასმენელი და აეხსნა მას ბორკილი ენისა და ამეტყველდა გამართულად.

³⁶და უბრძანა მათ, რომ არავისთვის ეთქვათ, და რაც უფრო მეტს უბრძანებდა მათ, მით უფრო ქადაგებდნენ

³⁷და კიდევ უფრო განცვიფრებულები ამბობდნენ: ყველაფერს კარგს აკეთებს: ყრუებს ანიჭებს სმენას და მუნჯებს მეტყველებას.