Read ახალი აღთქმა წიგნი მარკოზისა 8 Bible Online

წიგნი მარკოზისა 8 - ახალი აღთქმა bible

წიგნი მარკოზისა 8

¹იმ დღეებში კვლავ უამრავი ხალხი იყო და არაფერი ჰქონდათ, რომ ეჭამათ; მოუხმო თავის მოწაფეებს და უთხრა მათ:

²მებრალება ეს ხალხი, რადგან უკვე სამი დღეა, მელოდებიან და არაფერი აქვთ, რომ ჭამონ;

³და თუ გავუშვებ მათ უჭმელებს თავის სახლში, დაუძლურდებიან გზაში, რადგან ზოგი მათგანი შორიდან არის მოსული.

⁴და მიუგეს მას მისმა მოწაფეებმა: საიდან შეგვიძლია ამდენი ხალხის გაძღომა პურით აქ, უდაბნოში?

⁵და ჰკითხა მათ: რამდენი გაქვთ პური? ხოლო მათ უთხრეს: შვიდი.

⁶და უბრძანა ხალხს დასხდომა მიწაზე; და აიღო შვიდი პური, მადლობდა, გატეხა და მისცა თავის მოწაფეებს, რათა დაერიგებინათ; და დაურიგეს ხალხს.

⁷და ჰქონდათ ცოტა თევზი; ისიც აკურთხა და უთხრა, დაერიგებინათ ისიც.

⁸და ჭამეს და გაძღნენ და აიღეს დარჩენილი ნატეხები, შვიდი კალათი.

⁹და იყო, ვინც ჭამა, დაახლოებით ოთხი ათასი; და გაუშვა ისინი.

¹⁰და მაშინვე ავიდა ნავზე თავის მოწაფეებთან ერთად და მივიდა დალმანუთის მხარეში.

¹¹და გამოვიდნენ ფარისევლები და დაუწყეს კამათი და მოითხოვდნენ მისგან სასწაულს ზეციდან და სცდიდნენ მას.

¹²და ამოიოხრა თავისი სულით და თქვა: რისთვის ეძებს ეს მოდგმა სასწაულს? ამინ გეუბნებით თქვენ: არ მიეცემა ამ მოდგმას სასწაული.

¹³და დატოვა ისინი და კვლავ ავიდა ნავზე და გავიდა გაღმა.

¹⁴და დაავიწყდათ პურის წაღება და ერთი პურის მეტი არ ჰქონდათ თან ნავში.

¹⁵და უბრძანა მათ და უთხრა: იცოდეთ, ერიდეთ ფარისეველთა საფუარს და ჰეროდიანთა საფუარს.

¹⁶ხოლო ისინი ბჭობდნენ ერთმანეთში და ამბობდნენ: იმიტომ რომ პური არა გვაქვს;

¹⁷და გულისხმაყო იესომ და უთხრა მათ: რატომ ფიქრობთ თქვენს გულში, მცირედმორწმუნენო, რომ პური არა გაქვთ? კიდევ ვერც ხვდებით, გაქვავებული გაქვთ თქვენი გულები?

¹⁸თვალები გაქვთ და არ ხედავთ და ყურები გაქვთ და არ გესმით? და არ გახსოვთ (იერ.5,21; ეზ.12,2),

¹⁹როდესაც ხუთი პური გავტეხე ხუთი ათასისთვის და რამდენი გოდორი აიღეთ ნატეხებით სავსე? უთხრეს მას: თორმეტი;

²⁰ხოლო როდესაც შვიდი — ოთხი ათასისთვის, რამდენი კალათი აიღეთ ნატეხებით სავსე? ხოლო მათ უთხრეს: შვიდი.

²¹და ეუბნებოდა მათ: როგორ ვერ ხვდებით?!

²²და მივიდა ბეთსაიდაში. და მიუყვანეს მას ბრმა და ევედრებოდნენ მას, რათა შეხებოდა მას.

²³და მოჰკიდა ხელი ბრმას და გაიყვანა იგი დაბის გარეთ და დაანერწყვა მის თვალებს, დაადო ხელები და ჰკითხა მას: თუ ხედავ რამეს?

²⁴და აიხედა და თქვა: ვხედავ ადამიანებს, როგორც მიმომავალ ხეებს.

²⁵შემდეგ კვლავ დაადო ხელები მის თვალებს და აუხილა; და აღუდგა მას მხედველობა და ხედავდა ნათლად ყველაფერს.

²⁶და გაგზავნა იგი მის სახლში და უთხრა: წადი შენს სახლში და ნურავის ეტყვი დაბაში.

²⁷და გამოვიდა იესო, და მისი მოწაფეები ფილიპეს კესარიის დაბებში; და გზაში ეკითხებოდა თავის მოწაფეებს და ეუბნებოდა მათ: რას ამბობენ ჩემზე ადამიანები: ვინ ვარ მე?

²⁸ხოლო მათ მიუგეს და უთხრეს: იოანე ნათლისმცემელი, — და სხვები ამბობენ: ელია, ხოლო სხვები — ერთი წინასწარმეტყველთაგანი.

²⁹და მან უთხრა მათ: ხოლო თქვენ რას ამბობთ ჩემზე: ვინ ვარ მე? და მიუგო მას პეტრემ და უთხრა: შენ ხარ ქრისტე.

³⁰და შერისხა ისინი, რომ არავისთვის ეთქვათ მის შესახებ.

³¹და დაიწყო სწავლება მათი, რომ მართებს ძეს კაცისას მრავალი ვნება და შეურაცხყოფა უხუცესებისგან, მღვდელმთავრებისა და მწიგნობრებისგან და მოიკვლება და სამი დღის შემდეგ აღდგება;

³²და ცხადად ამბობდა ამ სიტყვას. და გაიყვანა იგი პეტრემ და დაუწყო მას შეპასუხება;

³³ხოლო იგი მიბრუნდა და შეხედა თავის მოწაფეებს, შერისხა პეტრე და უთხრა: გამშორდი, სატანა, რადგან არ ფიქრობ ღვთისას, არამედ კაცისას.

³⁴და მოუხმო ხალხს თავის მოწაფეებთან ერთად და უთხრა მათ: ვისაც უნდა, რომ შემომიდგეს მე, უარყოს თავისი თავი და აიღოს თავისი ჯვარი და გამომყვეს მე;

³⁵რადგან ვისაც უნდა თავისი სულის გადარჩენა, წარწყმედს მას; ხოლო ვინც წარწყმედს თავის სულს ჩემთვის და სახარებისთვის, გადაარჩენს მას;

³⁶რადგან რა სარგებელი აქვს კაცს, თუ შეიძენს მთელ ქვეყანას და ავნებს თავის სულს?

³⁷რას მისცემს კაცი თავისი სულის სანაცვლოდ?

³⁸რადგან ვისაც შერცხვება ჩემი და ჩემი სიტყვებისა ამ მრუშსა და ცოდვილ მოდგმაში, ძეს კაცისასაც შერცხვება მისი, როცა მოვა თავისი მამის დიდებით წმიდა ანგელოზებთან ერთად.