Read ახალი აღთქმა წიგნი მარკოზისა 9 Bible Online

წიგნი მარკოზისა 9 - ახალი აღთქმა bible

წიგნი მარკოზისა 9

¹და ეუბნებოდა მათ: ამინ გეუბნებით თქვენ, რომ არიან ზოგიერთები აქ მდგომთაგან, რომლებიც არ იგემებენ სიკვდილს, ვიდრე არ იხილავენ ღვთის სასუფეველს, მომავალს ძალით.

²და ექვსი დღის შემდეგ წაიყვანა იესომ პეტრე, იაკობი და იოანე და აიყვანა ისინი მაღალ მთაზე განმარტოებით და ფერი იცვალა მათ წინაშე;

³მისი სამოსი გახდა ბრწყინვალე და თეთრი ძლიერ, როგორც თოვლი, ისეთი, რომ არ შეუძლია ქვეყანაზე არც ერთ მათეთრებელს ასე გათეთრება.

⁴და ეჩვენა მათ ელია მოსესთან ერთად და იყვნენ იესოსთან და საუბრობდნენ.

⁵და მიუგო პეტრემ და უთხრა იესოს: რაბი, კარგია ჩვენთვის აქ ყოფნა, გავაკეთოთ სამი კარავი: შენთვის — ერთი, მოსესთვის — ერთი და ელიასთვის — ერთი,

⁶რადგან არ იცოდა, რა ეთქვა, ვინაიდან შეშინებულნი იყვნენ.

⁷და იყო ღრუბელი და დაჩრდილა ისინი და ხმა იყო ღრუბლიდან: ეს არის ძე ჩემი საყვარელი, მაგისი ისმინეთ.

⁸და მყისვე მიმოიხედეს და ვერავინ დაინახეს, არამედ მხოლოდ იესო იყო მათთან.

⁹და როდესაც ჩამოდიოდნენ. ისინი მთიდან, უბრძანა მათ, რომ არავისთვის ეთქვათ, რაც იხილეს, ვიდრე ძე კაცისა მკვდრეთით არ აღდგებოდა.

¹⁰და ეს სიტყვა დაიმარხეს თავის თავში და კამათობდნენ: რა არის ვიდრე მკვდრეთით არ აღდგება?

¹¹და ეკითხებოდნენ მას და ეუბნებოდნენ: როგორ ამბობენ მწიგნობრები, რომ პირველად ელიას მართებს მოსვლა (მალ.4,5)?

¹²ხოლო მან მიუგო და უთხრა მათ: პირველად ელია მოვა და აღადგენს ყოველივეს; და როგორ წერია ძე კაცისაზე, რომ ფრიად ივნება და შეურაცხყოფილი იქნება?

¹³არამედ გეუბნებით თქვენ, რომ ელიაც მოვიდა და მოექცნენ მას, როგორც უნდოდათ, როგორც წერია მასზე.

¹⁴და მივიდა თავის მოწაფეებთან და ნახა უამრავი ხალხი მათ გარშემო და მწიგნობრები კამათობდნენ მათთან.

¹⁵და მაშინვე მთელმა ხალხმა დაინახა იგი და გაოცდა; და მირბოდნენ და ესალმებოდნენ მას.

¹⁶და ჰკითხა მწიგნობრებს: რას ეკამათებოდით მათ?

¹⁷და მიუგო მას ერთმა იმ ხალხიდან და უთხრა: მოძღვარო, მოვიყვანე შენთან ჩემი ძე, რომელიც არის უტყვი სულით შეპყრობილი;

¹⁸და სადაც მას შეიპყრობს, დასცემს და დუჟი გადმოსდის და აღრჭენს კბილებს და შეშდება; და ვუთხარი შენს მოწაფეებს, რომ განედევნათ იგი, და ვერ შეძლეს.

¹⁹და მიუგო მათ და უთხრა: ო, მოდგმავ ურწმუნო, როდემდე ვიქნები თქვენთან? როდემდე გიტვირთავთ თქვენ? მოიყვანეთ იგი ჩემთან.

²⁰და მიიყვანეს იგი მასთან. და როცა იხილა იგი არაწმინდა სულმა, მყისვე შეარყია იგი, და დავარდა მიწაზე, გორავდა და დუჟი გადმოსდიოდა.

²¹და ჰკითხა მის მამას: რამდენი ხანია, რაც ეს დაემართა მას? ხოლო მან უთხრა: სიყრმიდან;

²²და მრავალგზის ცეცხლშიც ჩააგდო იგი და წყალშიც, რათა დაეღუპა იგი; მაგრამ თუ რამე შეგიძლია, შეგვეწიე ჩვენ და შეგვიწყალე ჩვენ;

²³ხოლო იესომ უთხრა მას: თუ შეგიძლია, ირწმუნო, ყველაფერი შესაძლებელია მორწმუნისათვის.

²⁴და მყისვე შეღაღადა ყრმის მამამ და აცრემლებულმა უთხრა: მწამს, უფალო, შეეწიე ჩემს ურწმუნოებას.

²⁵და იხილა რა იესომ, რომ სწრაფად იკრიბებოდა ხალხი, შერისხა არაწმინდა სული და უთხრა მას: უტყვო და ყრუ სულო, მე გიბრძანებ შენ გამოდი მაგისგან და აღარასოდეს შეხვიდე მასში

²⁶და შეყვირა და ძლიერ დასცა და გავიდა მისგან; და იყო როგორც მკვდარი, ისე რომ ბევრი ამბობდა: მოკვდა;

²⁷ხოლო იესომ მოჰკიდა მას ხელი და ააყენა იგი, და ადგა.

²⁸და როდესაც შევიდა იგი სახლში, მისმა მოწაფეებმა განმარტოებით ჰკითხეს მას: რატომ ჩვენ ვერ შევძელით მისი განდევნა?

²⁹და უთხრა მათ: ამ მოდგმის გასვლა არაფრით შეიძლება, თუ არა ლოცვითა და მარხვით.

³⁰და იქიდან გამოვიდნენ და გამოიარეს გალილეა და არ უნდოდა, რომ ვინმეს გაეგოთ

³¹რადგან ასწავლიდა თავის მოწაფეებს და ეუბნებოდა მათ: ძე კაცისა გადაეცემა კაცთა ხელში და მოკლავენ მას და, როცა მოკვდება, მესამე დღეს აღდგება;

³²ხოლო მათ ვერ გაიგეს ეს სიტყვა და ეშინოდათ, მისთვის ეკითხათ.

³³და მივიდა კაპერნაუმში და როდესაც იყო სახლში, ეკითხებოდა მათ: რაზე ბჭობდით ერთმანეთთან გზაში?

³⁴ხოლო ისინი დუმდნენ, რადგან ერთმანეთთან დავობდნენ გზაში, ვინ უფრო დიდი იყო.

³⁵და დაჯდა და მოუხმო თორმეტს და უთხრა მათ: ვისაც უნდა, პირველი იყოს, იყოს ყველაზე უკანასკნელი და ყველას მსახური.

³⁶და მოიყვანა ყრმა და დააყენა იგი მათ შორის და მოეხვია მას და უთხრა მათ:

³⁷ვინც ერთ ასეთ ყრმას შეიწყნარებს ჩემი სახელით, მე შემიწყნარებს; და ვინც მე შემიწყნარებს, შემიწყნარებს არა მე, არამედ ჩემს მომავლინებელს.

³⁸მიუგო მას იოანემ და უთხრა: მოძღვარო, ვნახეთ ვიღაც, ვინც შენი სახელით დევნიდა ეშმაკებს და ჩვენ არ მოგვყვება; და ვუშლიდით მას, რადგან არ მოგვყვება ჩვენ;

³⁹ხოლო იესომ უთხრა: ნუ დაუშლით მას, რადგან არავინ არის, ვინც აღასრულებს სასწაულს ჩემი სახელით და შეძლებს, ცუდი თქვას ჩემზე;

⁴⁰რადგან ვინც არ არის ჩვენ წინააღმდეგ, ის ჩვენკენ არის.

⁴¹ვინც გასმევთ თქვენ სასმის წყალს ჩემი სახელით — რადგან ქრისტესნი ხართ — ამინ გეუბნებით თქვენ: არ დაეკარგება თავისი საზღაური;

⁴²ხოლო ვინც დააბრკოლებს ერთ ამ მცირეთაგანს, რომელსაც სწამს ჩემი, უმჯობესია მისთვის, რომ მოაბან წისქვილის დოლაბი მას ქედზე და ჩააგდონ ზღვაში.

⁴³და თუ გაცდუნებს შენ ხელი შენი, მოიკვეთე იგი; უმჯობესია შენთვის, ხეიბარი შეხვიდე საუკუნო ცხოვრებაში, ვიდრე ორი ხელი გქონდეს და შეხვიდე გეენაში, უშრეტ ცეცხლში,

⁴⁴სადაც მათი მატლი არ ილევა და ცეცხლი არ იშრიტება (ეს.66,24),

⁴⁵და თუ ფეხი შენი გაცდუნებს შენ, მოიკვეთე იგი; უმჯობესია შენთვის, შეხვიდე საუკუნო ცხოვრებაში კოჭლი, ვიდრე ორი ფეხი გქონდეს და ჩავარდე გეენაში, უშრეტ ცეცხლში,

⁴⁶სადაც მათი მატლი არ ილევა და ცეცხლი არ იშრიტება.

⁴⁷და თუ თვალი შენი გაცდუნებს შენ, ამოიგდე იგი; უმჯობესია შენთვის, ერთი თვალით შეხვიდე ღვთის სასუფეველში, ვიდრე ორი თვალი გქონდეს და ჩავარდე ცეცხლის გეენაში,

⁴⁸სადაც მათი მატლი არ ილევა და ცეცხლი არ იშრიტება;

⁴⁹რადგან ყოველივე ცეცხლით დამარილდება და ყოველი შესაწირავი მარილით დამარილდება.

⁵⁰კარგია მარილი, ხოლო თუ მარილი უმარილო გახდება, რითღა შენელდება? არის თქვენში მარილი და მშვიდობით იყავით ერთმანეთში.