Read ახალი აღთქმა წიგნი ლუკასი 1 Bible Online

წიგნი ლუკასი 1 - ახალი აღთქმა bible

წიგნი ლუკასი 1

¹ვინაიდან უკვე მრავალმა მიჰყო ხელი ჩვენ შორის ნამდვილად აღსრულებული საქმეების თხრობის აღწერას,

²როგორც გადმოგვცეს ჩვენ მათ, ვინც დასაბამიდან თვითმხილველნი და მსახურნი იყვნენ სიტყვისა,

³მივიჩნიე მეც, ვინც თავიდანვე შევუდექი, ყველაფერი ზედმიწევნით თანამიმდევრულად მომეწერა შენთვის, ღირსეულო თეოფილე,

⁴რათა შეიცნო შესწავლილი სიტყვების სიმტკიცე.

⁵იყო ჰურიასტანის მეფის, ჰეროდეს, დღეებში მღვდელი ვინმე, სახელად ზაქარია, აბიას მორიგეობიდან, და ცოლი მისი — აარონის ასულთაგან და სახელი მისი — ელისაბედი.

⁶და იყო ორივე მართალი ღვთის წინაშე და დადიოდნენ უფლის ყველა მცნებითა და სიმართლით, უბიწონი,

⁷და არ ჰყავდათ მათ შვილი, რადგან ელისაბედი იყო ბერწი, და ორივენი ხანგადასულები იყვნენ.

⁸და იყო მისი მღვდელმსახურებისას, მისი მორიგეობის წესის მიხედვით ღვთის წინაშე,

⁹ჩვეულებისამებრ მღვდელმსახურებისა, წილად ხვდა კმევა და შევიდა უფლის ტაძარში,

¹⁰და მთელი სიმრავლე ერისა ლოცულობდა გარეთ კმევის დროს.

¹¹და ეჩვენა მას ანგელოზი უფლისა, მდგომარე საკმევლის სამსხვერპლოს მარჯვნივ.

¹²და შეძრწუნდა ზაქარია, როცა იხილა, და შიში დაეცა მას.

¹³უთხრა მას ანგელოზმა: ნუ გეშინია, ზაქარია, რადგან შესმენილია შენი ვედრება, და შენი ცოლი, ელისაბედი, გიშობს შენ ძეს და უწოდებ მის სახელს, იოანეს.

¹⁴და გექნება შენ სიხარული და მხიარულება და მრავალნი მისი შობით გაიხარებენ;

¹⁵რადგან დიდი იქნება უფლის წინაშე და ღვინოსა და თაფლუჭს არ შესვამს და სულიწმიდით აივსება თავისი დედის მუცლიდანვე,

¹⁶და მრავალს ისრაელის ძეთაგან მოაქცევს მათი უფალი ღმერთისკენ.

¹⁷და ჯერ იგი მოვა მასზე წინ ელიას სულითა და ძალით, რათა მოაქციოს მამათა გულები შვილებისკენ და ურჩები მართალთა გონებაზე და მოუმზადოს უფალს ერი გამზადებული.

¹⁸და უთხრა ზაქარიამ ანგელოზს: რითი გავიგო ეს, რადგან მე მოხუცებული ვარ და ჩემი ცოლი ხანგადასულია?

¹⁹და მიუგო ანგელოზმა და უთხრა მას: მე ვარ გაბრიელი, წინამდგომი ღვთის წინაშე, და გამოგზავნილი ვარ, რომ გითხრა შენ და გახარო შენ ეს.

²⁰და აჰა, იქნები დადუმებული და ვერ შეძლებ ლაპარაკს იმ დღემდე, ვიდრე ეს არ მოხდება, რადგან არ ირწმუნე ჩემი სიტყვებისა, რომელიც აღსრულდება თავის დროზე.

²¹და იყო ერი, რომელიც ელოდა ზაქარიას, გაკვირვებული მისი დაყოვნებით ტაძარში,

²²ხოლო როცა გამოვიდა, ვერ შეძლო ლაპარაკი მათთან და მიხვდნენ, რომ ჩვენება იხილა ტაძარში, და იგი ანიშნებდა მათ დამუნჯებული.

²³და იყო, როგორც კი დასრულდა მისი მსახურების დღეები, წავიდა თავის სახლში.

²⁴და იმ დღეების შემდეგ მუცლადიღო ელისაბედმა, მისმა ცოლმა, და იფარავდა თავს ხუთი თვე და ამბობდა:

²⁵ასე მიყო მე უფალმა ამ დღეებში, როცა მომხედა, რათა მოესპო ჩემი ყვედრება კაცთა შორის.

²⁶და მეექვსე თვეს მოვლენილ იქნა გაბრიელ ანგელოზი ღვთის მიერ გალილეის ქალაქში, რომლის სახელია ნაზარეთი,

²⁷ქალწულთან, რომელიც დაწინდული იყო ქმართან, რომლის სახელი იყო იოსები, დავითის სახლიდან და სახელი ქალწულისა — მარიამი.

²⁸და შევიდა ანგელოზი მასთან და უთხრა: გიხაროდეს, მიმადლებულო, უფალი შენთან არის; კურთხეული ხარ შენ დედათა შორის.

²⁹ხოლო მან, როცა იხილა, შეძრწუნდა მის სიტყვაზე და ფიქრობდა: რას უნდა ნიშნავდეს ეს მოკითხვა?

³⁰და უთხრა ანგელოზმა მას: ნუ გეშინია, მარიამ, რადგან ჰპოვე მადლი ღვთის წინაშე.

³¹და აჰა, მუცლადიღებ და შობ ძეს და უწოდებ მის სახელს, იესოს.

³²იგი იქნება დიდი და ძე მაღლისა ეწოდება და მისცემს მას უფალი ღმერთი დავითის, მისი მამის, ტახტს,

³³და იმეფებს იაკობის სახლზე საუკუნოდ და მის სუფევას არ ექნება დასასრული.

³⁴და უთხრა მარიამმა ანგელოზს: როგორ იქნება ეს, რადგან მამაკაცი არ ვიცი?

³⁵და მიუგო ანგელოზმა და უთხრა მას: სულიწმიდა გადმოვა შენზე და ძალი მაღლისა დაგფარავს შენ; ამიტომ შობილსაც წმიდა ეწოდება, ძე მაღლისა.

³⁶და აჰა, ელისაბედი, ნათესავი შენი, მანაც მუცლადიღო ძე თავის სიბერეში და ეს მეექვსე თვეა იმისი, რომელსაც ერქვა ბერწი,

³⁷რადგან არ არის შეუძლებელი ღვთისათვის არც ერთი სიტყვა.

³⁸და უთხრა მარიამმა: აჰა, მხევალი უფლისა, მეყოს მე სიტყვისამებრ შენისა. და წავიდა მისგან ანგელოზი.

³⁹და ადგა მარიამი იმ დღეებში და წავიდა სწრაფად მთიან მხარეში, იუდას ქალაქში,

⁴⁰და შევიდა ზაქარიას სახლში და მოიკითხა ელისაბედი.

⁴¹და იყო, როგორც კი გაიგონა ელისაბედმა მარიამის მოკითხვა, შეიძრა ყრმა მის მუცელში და აივსო სულიწმიდით ელისაბედი

⁴²და შეღაღადა დიდი ხმით და თქვა: კურთხეული ხარ შენ დედათა შორის და კურთხეულია ნაყოფი შენი მუცლისა.

⁴³და საიდან მეუწყა მე ეს, რომ მოვიდა დედა უფლისა ჩემისა ჩემთან?

⁴⁴რადგან, აჰა, როგორც კი შენი მოკითხვის ხმამ მოაღწია ჩემს ყურამდე შეიძრა ყრმა სიხარულით ჩემს მუცელში.

⁴⁵და ნეტარია, ვინც ირწმუნა, რადგან აღსრულდება ნათქვამი მის მიმართ უფლის მიერ.

⁴⁶და თქვა მარიამმა: ადიდებს სული ჩემი უფალს,

⁴⁷და გაიხარა სულმა ჩემმა ღვთის მიმართ, ჩემი მაცხოვრისა,

⁴⁸რადგან მოხედა თავისი მხევლის სიმდაბლეს, რადგან, აჰა, ამიერიდან შემომნატრებს მე ყოველი მოდგმა;

⁴⁹რადგან ქმნა დიდებული ჩემთვის ძლიერმა და წმიდაა სახელი მისი,

⁵⁰და წყალობა მისი იყოს მოდგმიდან მოდგმამდე მის მოშიშთათვის.

⁵¹გამოავლინა ძალა თავისი მკლავით, განაბნია ამპარტავანნი მათი გულის ზრახვებით;

⁵²დაამხო ძლიერნი ტახტებიდან და აამაღლა მდაბალნი,

⁵³მშიერნი აავსო სიკეთით და მდიდარნი გაუშვა ცარიელნი.

⁵⁴შეეწია ისრაელს, თავის მსახურს, მოსახსენებლად წყალობისა,

⁵⁵როგორც ეუბნებოდა ჩვენს მამებს, აბრაამს და მის თესლს საუკუნოდ.

⁵⁶და დარჩა მარიამი მასთან სამიოდე თვე და დაბრუნდა თავის სახლში.

⁵⁷ხოლო ელისაბედს შეუსრულდა დრო შობისა და შვა ძე.

⁵⁸და გაიგეს მის გარშემო მკვიდრებმა და ნათესავებმა, რომ განადიდა უფალმა თავისი წყალობა მასზე, და ხარობდნენ მასთან ერთად.

⁵⁹და იყო, მერვე დღეს მოვიდნენ, რომ წინადაეცვითათ ყრმისთვის და ეწოდებინათ მისთვის სახელი მისი მამისა, ზაქარია.

⁶⁰და მიუგო მისმა დედამ და უთხრა: არა, არამედ ეწოდოს იოანე.

⁶¹და უთხრეს მას: არავინ არის შენს ნათესავებში, ვისაც ჰქვია ეგ სახელი.

⁶²და ანიშნებდნენ მის მამას, რის დარქმევას ისურვებდა მისთვის.

⁶³და მოითხოვა ფიცარი და დაწერა და თქვა: იოანე არის მისი სახელი. და გაუკვირდა ყველას.

⁶⁴და გაეხსნა უცებ მას პირი და ენა და ამეტყველდა და აკურთხებდა ღმერთს.

⁶⁵და მოიცვა შიშმა ყველა, ვინც მათ გარშემო მკვიდრობდა, და ჰურიასტანის მთელ მთიან მხარეში გავრცელდა ყველა ეს სიტყვა,

⁶⁶და ჩაიდო ყველამ, ვისაც ესმოდა ეს, თავის გულში და ამბობდა: ვინ იქნება ეს ყრმა? და ხელი უფლისა იყო მასზე.

⁶⁷და ზაქარია, მისი მამა, აივსო სულიწმიდით, წინასწარმეტყველებდა და თქვა:

⁶⁸კურთხეულია უფალი ღმერთი ისრაელისა, რადგან გადმოხედა და გამოიხსნა თავისი ერი;

⁶⁹და აღგვიდგინა ჩვენ რქა ხსნისა, დავითის, თავისი მონის, სახლში,

⁷⁰როგორც ეუბნებოდა წმიდანთა პირით, რომლებიც იყვნენ საუკუნიდან მისი წინასწარმეტყველნი,

⁷¹რომ გვიხსნის ჩვენი მტრებისგან და ყველა ჩვენი მოძულის ხელისგან,

⁷²წყალობას გაიღებს ჩვენი მამების მიმართ და გაიხსენებს თავის წმიდა აღთქმას,

⁷³ფიცს, რომელიც შეჰფიცა აბრაამს, ჩვენს მამას, რომ მოეცა ჩვენთვის,

⁷⁴მტრების ხელიდან გამოხსნილთათვის, უშიშრად მსახურება მის მიმართ

⁷⁵სიწმინდით და სიმართლით მის წინაშე ჩვენი ცხოვრების ყოველ დღეს.

⁷⁶და შენ, ყრმაო, წინასწარმეტყველი მაღლისა გეწოდოს, რადგან წინამორბედი იქნები უფლის წინაშე გასამზადებლად მისი გზებისა (მალ.3,1),

⁷⁷რათა მისცე ცოდნა გამოხსნისა მის ერს მიტევებით მათი ცოდვებისა,

⁷⁸მოწყალებით ჩვენი ღვთის წყალობისა, რომლითაც გადმოგვხედა ჩვენ აღმოსავლეთმა მაღლიდან

⁷⁹მათ გასანათლებლად, რომლებიც სხედან ბნელსა და სიკვდილის ჩრდილში, და ჩვენ ფეხთა წარსამართავად მშვიდობის გზაზე.

⁸⁰ხოლო ყრმა იზრდებოდა და მტკიცდებოდა სულით და იყო უდაბნოში იმ დღემდე, ვიდრე გამოეცხადებოდა იგი ისრაელს.