Read ახალი აღთქმა წიგნი ლუკასი 14 Bible Online

წიგნი ლუკასი 14 - ახალი აღთქმა bible

წიგნი ლუკასი 14

¹და იყო, როცა მივიდა იესო ვიღაც ფარისეველი მთავრის სახლში შაბათს პურის საჭმელად, ისინი უთვალთვალებდნენ მას.

²და აჰა, იყო ვიღაც წყალმანკიანი კაცი მის წინ.

³მიუგო იესომ და უთხრა სჯულისმოძღვრებს და ფარისევლებს: მართებულია თუ არა შაბათს განკურნება?

⁴ხოლო ისინი დუმდნენ. და მოიყვანა და განკურნა იგი და გაუშვა.

⁵და უთხრა მათ: რომელიმე თქვენგანს ვირი ან ხარი რომ ჩაუვარდეს ორმოში, განა მაშინვე არ ამოიყვანს მას შაბათ დღეს?

⁶და ვერ შეძლეს შეპასუხება ამაზე.

⁷და ეუბნებოდა წვეულებს იგავს, შეამჩნია რა წინა ადგილებს როგორ ირჩევდნენ, და უთხრა მათ:

⁸როცა მიგიწვევს ვინმე ქორწილში, ნუ დაჯდები წინა ადგილზე, ვაითუ შენზე პატივსაცემი იყოს მოწვეული მის მიერ;

⁹და მოვიდეს, ვინც შენ და ის მოგიწვიათ და გითხრას შენ: ადგილი დაუთმე ამას. მაშინ დაიწყებ სირცხვილით ბოლო ადგილის დაკავებას;

¹⁰არამედ, როცა მიგიწვევენ, მიდი და დაჯექი ბოლო ადგილზე, რათა მოვიდეს, ვინც მოგიწვია შენ, და გითხრას: მეგობარო, ამოდი ზემოთ. მაშინ განდიდდები შენ ყველა შენი თანამეინახის წინაშე,

¹¹რადგან ყოველი, რომელიც აიმაღლებს თავს, დამდაბლდება და რომელიც დაიმდაბლებს თავს, ამაღლდება.

¹²და ეუბნებოდა იმას, ვინც მოიწვია იგი: როცა გამართავ სადილს ან ვახშამს, ნუ დაუძახებ შენს მეგობრებს, ნურც შენს ძმებს, ნურც შენს ნათესავებს, ნურც მდიდარ მეზობლებს, რომ მათაც არ მიგიწვიონ შენ საპასუხოდ და მოგეგოს შენ სანაცვლო,

¹³არამედ, როცა გამართავ წვეულებას, მოიწვიე გლახაკები, ხეიბრები, კოჭლები და ბრმები.

¹⁴და ნეტარი იქნები, რადგან არაფერი აქვთ, რომ მოგაგონ შენ სანაცვლოდ, და მოგეგება შენ სანაცვლო მართალთა აღდგომისას.

¹⁵და გაიგონა ვიღაც თანამეინახემ ეს და უთხრა მას: ნეტარია, ვინც შეჭამს პურს ღვთის სასუფეველში.

¹⁶ხოლო მან უთხრა მას: ვიღაც კაცმა გამართა დიდი სერობა და მოიწვია მრავალნი.

¹⁷და გაგზავნა თავისი მონა სერობის დროს, რათა ეთქვა წვეულთათვის: მოდით, რადგან, აჰა, მზად არის ყველაფერი.

¹⁸და დაიწყო ყველამ სათითაოდ უარის თქმა. პირველმა უთხრა მას: ყანა ვიყიდე და უცილობლად უნდა მივიდე და ვნახო იგი. გთხოვ შენ, ვიყო მე შენგან განტევებული;

¹⁹და სხვამ თქვა: უღელი ხარი ვიყიდე, ხუთი, და მივდივარ მათ გამოსაცდელად. გთხოვ შენ, ვიყო მე შენგან განტევებული;

²⁰და შემდეგ სხვამ უთხრა: ცოლი შევირთე და ამის გამო არ შემიძლია მოსვლა.

²¹და მოვიდა მონა და აუწყა ეს თავის ბატონს. მაშინ განრისხდა სახლის პატრონი და უთხრა თავის მონას: გადი სწრაფად ქალაქის ქუჩებში და შესახვევებში და გლახაკები და ხეიბრები და ბრმები და კოჭლები შემოიყვანე აქ.

²²და უთხრა მონამ: ბატონო, აღსრულდა შენი ბრძანება და კიდევ არის ადგილი.

²³და უთხრა ბატონმა მონას: გადი გზებზე და ორღობეებში და აიძულე, რომ შემოვიდნენ, რათა გაივსოს ჩემი სახლი;

²⁴რადგან გეუბნებით თქვენ: ვერავინ იხილავს იმ წვეულ კაცთაგან გემოს ჩემი სერობისას, რადგან ბევრია მოწვეული და ცოტა რჩეული.

²⁵და იკრიბებოდა მასთან დიდძალი ხალხი და მიუბრუნდა და უთხრა მათ:

²⁶ვინც მოდის ჩემთან და არ მოიძულებს თავის მამას და დედას და ცოლს და შვილებს და ძმებს და დებს და მერე თავის სულსაც, ვერ შეძლებს, იყოს ჩემი მოწაფე;

²⁷ვინც არ იტვირთავს თავის ჯვარს და შემომიდგება მე, ვერ შეძლებს, იყოს ჩემი მოწაფე.

²⁸თქვენგან ვინმეს რომ უნდოდეს გოდლის აშენება, განა ჯერ არ დაჯდება და არ აღრიცხავს, რაც უნდა დაიხარჯოს, თუ აქვს, რომ ეყოს დასამთავრებლად?

²⁹რათა, ვაითუ დაუდოს საფუძველი და ვერ შეძლოს დასრულება და ყველამ, ვინც ნახავს მას, არ დაუწყოს დაცინვა

³⁰და არ თქვას: ამ კაცმა დაიწყო შენება და ვერ შეძლო დასრულება.

³¹ან რომელი მეფე წავა სხვა მეფის წინააღმდეგ საომრად, თუ არ დაჯდება ჯერ და არ მოითათბირებს, შეუძლია თუ არა ათი ათასით დაუხვდეს ოცი ათასით მის წინააღმდეგ მომავალს?

³²ხოლო თუ არა, ვიდრე იგი შორს არის, მოციქულს გაუგზავნის და სთხოვს მშვიდობას.

³³ასევე ყოველი თქვენგანი, ვინც არ განეშორება მთელ თავის ქონებას, ვერ შეძლებს, იყოს ჩემი მოწაფე.

³⁴კარგია მარილი, ხოლო თუ მარილი გამტკნარდა, რითღა დამარილდება?

³⁵არც მიწად, არც ნაკელად არ გამოდგება, არამედ გარეთ გადაყრიან მას. ვისაც აქვს ყური სასმენად, ისმინოს!