Read ახალი აღთქმა წიგნი ლუკასი 16 Bible Online

წიგნი ლუკასი 16 - ახალი აღთქმა bible

წიგნი ლუკასი 16

¹და ეუბნებოდა მოწაფეებსაც: და იყო ვიღაც მდიდარი კაცი, რომელსაც ჰყავდა მნე, და იგი დაასმინეს მასთან, როგორც გამფლანგველი მისი ქონებისა.

²და მოიხმო და უთხრა მას: ეს რა მესმის შენზე? ჩამაბარე ანგარიში შენს სამნეოზე, რადგან ვეღარ შეძლებ მნეობას.

³და თქვა თავის გულში მნემ: რა ვქნა, რადგან ჩემი ბატონი მართმევს ჩემს სამნეოს? მუშაობა არ შემიძლია, თხოვნისა მრცხვენია.

⁴ვიცი, რა ვქნა, როცა გადამაყენებენ მნეობიდან, რომ მიმიღონ მე თავის სახლებში.

⁵და მოუხმო სათითაოდ თავისი ბატონის მოვალეებს და უთხრა პირველს: რამდენი გმართებს ჩემი ბატონისა?

⁶ხოლო მან უთხრა: ასი საწნეხელი ზეთი. და უთხრა მას: მიიღე შენი ხელწერილი და დაჯექი ჩქარა და დაწერე — ორმოცდაათი.

⁷შემდეგ სხვას უთხრა: შენ რამდენი გმართებს? ხოლო მან თქვა: ასი საწყაო ხორბალი. უთხრა მასაც: მიიღე შენი ხელწერილი და დაწერე — ოთხმოცი.

⁸და შეაქო ბატონმა სიცრუის მნე, რადგან მოხერხებულად მოიქცა, რადგან ამ სოფლის ძეები მოხერხებულნი არიან ნათლის ძეებზე თავის მოდგმაში.

⁹და მე გეუბნებით თქვენ: შეიძინეთ თქვენთვის მეგობრები სიცრუის მამონით, რათა, როცა მოაკლდებით ამ სოფელს, შეგიწყნარონ თქვენ საუკუნო სამყოფელში.

¹⁰სარწმუნო მცირედზე მრავალზეც სარწმუნოა; და ვინც მცირედზე ცრუა, მრავალზეც ცრუა.

¹¹თუ სიცრუის მამონის მიმართ სარწმუნო არ იქნებით, ჭეშმარიტს ვინ განდობთ თქვენ?

¹²და თუ სხვისაზე სარწმუნო არ იქნებით, თქვენსას ვინ მოგცემთ თქვენ?

¹³არც ერთ მსახურს არ შეუძლია ორი ბატონის მონება: რადგან ან ერთს მოიძულებს და მეორეს შეიყვარებს, ან ერთს დაემორჩილება და მეორეს უგულებელყოფს ვერ შეძლებთ მონებას ღვთისა და მამონისა.

¹⁴ესმოდათ ეს ყველაფერი ფარისევლებს, რომლებიც ვერცხლისმოყვარენი იყვნენ, და დასცინოდნენ მას.

¹⁵და უთხრა მათ: თქვენ ხართ, ვინც იმართლებს თავს კაცთა წინაშე, ხოლო ღმერთმა იცის თქვენი გული, რადგან რაც კაცთა შორის ამაღლებულია, სისაძაგლეა ღვთის წინაშე.

¹⁶სჯული და წინასწარმეტყველნი იოანემდე იყო. მას შემდეგ სასუფეველი ღვთისა ეხარება და ყოველი იძულებით აღწევს მას.

¹⁷უფრო ადვილია ცისა და ქვეყნის გადასვლა, ვიდრე სჯულის ერთი წერტილის დაკარგვა.

¹⁸ყოველი, რომელიც გაუშვებს თავის ცოლს და სხვას შეირთავს, მრუშობს და ვინც ქმრისგან გაშვებულს შეირთავს, ისიც მრუშობს.

¹⁹ერთი კაცი იყო, მდიდარი, და იმოსებოდა ძოწეულით და ბისონით და მხიარულობდა ყოველდღე ბრწყინვალედ.

²⁰და ერთი გლახაკი, სახელად ლაზარე, დავრდომილი იყო მის ჭიშკართან დაწყლულებული,

²¹და უნდოდა გამძღარიყო მდიდრის ტაბლიდან გადმოცვენილი ნამცეცებით, მაგრამ ძაღლებიც მოდიოდნენ და მის წყლულებს ლოკავდნენ.

²²და იყო, მოკვდა გლახაკი და მიიყვანეს იგი ანგელოზებმა აბრაამის წიაღში. მოკვდა მდიდარიც და დაიმარხა

²³და ჯოჯოხეთში აახილა თავისი თვალები; და იყო რა ტანჯვაში, დაინახა აბრაამი შორიდან და ლაზარე — მის წიაღში;

²⁴და მან შეჰყვირა და თქვა: მამაო აბრაამ, შემიწყალე მე და გამოგზავნე ლაზარე, რათა ჩაყოს თავისი თითის წვერი წყალში და გამიგრილოს ენა, რადგან ვიტანჯები მე ამ ალში;

²⁵ხოლო აბრაამმა უთხრა: შვილო, გაიხსენე, რომ მიიღე შენი სიკეთე შენს ცხოვრებაში და ლაზარემ მსგავსადვე — ბოროტება; და ახლა აქ ეს ნუგეშცემულია, ხოლო შენ იტანჯები.

²⁶და ყოველივე ამასთან, ჩვენსა და შენ შორის დიდი უფსკრულია დამყარებული, რადგან ვინც მოისურვებს გადასვლას აქედან თქვენთან, ვერ შეძლებს და ვერც მანდედან გადმოვა ჩვენთან.

²⁷და უთხრა: გთხოვ შენ, მამაო, რომ გაგზავნო იგი მამაჩემის სახლში,

²⁸რადგან მყავს ხუთი ძმა, და დაარწმუნოს ისინი, რომ არ მოვიდნენ ისინიც ტანჯვის ამ ადგილზე.

²⁹და უთხრა მას აბრაამმა: ჰყავთ მოსე და წინასწარმეტყველნი, მათი ისმინონ.

³⁰ხოლო მან უთხრა: არა, მამაო აბრაამ, არამედ, მკვდართაგან თუ ვინმე მივა მათთან, შეინანებენ.

³¹და უთხრა მას: თუ მოსეს და წინასწარმეტყველებს არ უსმენენ, მკვდრეთით თუ ვინმე აღდგება, არც იმისას ირწმუნებენ.