Read ახალი აღთქმა წიგნი ლუკასი 18 Bible Online

წიგნი ლუკასი 18 - ახალი აღთქმა bible

წიგნი ლუკასი 18

¹და ეუბნებოდა მათ იგავს, როგორ მართებთ მათ გამუდმებით ლოცვა და არ დაზარება,

²და უთხრა: ვიღაც მსაჯული იყო რომელიღაც ქალაქში, ღვთისა არ ეშინოდა და ადამიანებისა არ ერიდებოდა.

³და ვიღაც ქვრივი იყო იმავე ქალაქში და მიდიოდა მასთან და ეუბნებოდა: დამიცავი მე ჩემი მეტოქისგან.

⁴და არ ისურვა დრომდე; ხოლო ამის შემდეგ თქვა თავის გულში: თუმცა ღვთისა არ მეშინია, არც ადამიანებისა მერიდება,

⁵იმის გამო, რომ მაწუხებს მე ეს ქვრივი, დავიცავ მას, რომ არ მოდიოდეს და თავს არ მაბეზრებდეს მე.

⁶და უთხრა უფალმა: ისმინეთ, სიცრუის მსაჯული რას ამბობს.

⁷განა ღმერთი არ დაიცავს თავის რჩეულებს, რომლებიც უღაღადებენ მას დღე და ღამე, და სულგრძელი არ იქნება მათ მიმართ?

⁸გეუბნებით თქვენ: დაიცავს მათ მალევე. მაგრამ ძე კაცისა რომ მოვა, იპოვის კი რწმენას ქვეყანაზე?

⁹და უთხრა ზოგიერთებს, რომლებიც დარწმუნებულნი იყვნენ თავის თავში, რომ მართლები არიან და ამცირებდნენ დანარჩენებს, ეს იგავი:

¹⁰ორი კაცი ავიდა ტაძარში სალოცავად: ერთი — ფარისეველი და ერთი — მეზვერე.

¹¹ფარისეველი დადგა და ასე ლოცულობდა თავისთვის: ღმერთო, გმადლობ შენ, რომ არა ვარ, როგორც დანარჩენი ადამიანები, მტაცებელი, ცრუ, მრუში ან როგორც ეს მეზვერე;

¹²ვმარხულობ ორგზის შაბათის განმავლობაში, მეათედს ვიხდი მთელი ჩემი მონაგებიდან.

¹³ხოლო მეზვერე შორს იდგა და თვალების აპყრობაც არ უნდოდა ზეცად, არამედ იცემდა მკერდში და ამბობდა: ღმერთო, მილხინე მე ცოდვილს.

¹⁴გეუბნებით თქვენ: ეს უფრო გამართლებული ჩამოვიდა თავის სახლში, ვიდრე ის ფარისეველი, რადგან ყველა, ვინც აიმაღლებს თავს, დამდაბლდება, ხოლო ვინც დაიმდაბლებს თავს, ამაღლდება.

¹⁵და მიჰყავდათ მასთან ყრმები, რათა შეხებოდა მათ და, როცა დაინახეს მოწაფეებმა, კიცხავდნენ მათ;

¹⁶ხოლო იესომ მოუხმო მათ და უთხრა: აცადეთ ყრმებს ჩემთან მოსვლა და ნუ აბრკოლებთ მაგათ, რადგან ასეთების არის სასუფეველი ღვთისა.

¹⁷ამინ გეუბნებით თქვენ: ვინც არ მიიღებს ღვთის სასუფეველს როგორც ყრმა, ვერ შევა მასში.

¹⁸და ჰკითხა მას ვიღაც მთავარმა: მოძღვარო სახიერო, რა გავაკეთო, რომ საუკუნო ცხოვრება დავიმკვიდრო?

¹⁹უთხრა მას იესომ: რად მეძახი მე სახიერს? არავინ არის სახიერი, არამედ მხოლოდ ღმერთი.

²⁰მცნებები იცი: არ იმრუშო, არ მოკლა, არ მოიპარო, ცილი არ დასწამო და პატივი ეცი შენს მამას და შენს დედას (გამ.20,12-16).

²¹ხოლო მან თქვა: ამ ყველაფერს ვიცავდი ჩემი სიჭაბუკიდან.

²²და როცა გაიგონა ეს იესომ, უთხრა მას: ერთიღა გაკლია შენ; ყველაფერი, რაც გაქვს, გაყიდე და მიეცი გლახაკებს და გექნება საუნჯე ცაში; და მოდი და გამომყევი მე.

²³ხოლო როცა გაიგონა მან ეს, დამწუხრდა, რადგან იყო ძლიერ მდიდარი.

²⁴და როცა ნახა იგი იესომ, რომ დამწუხრდა, თქვა: როგორი ძნელია მათთვის, ვისაც სიმდიდრე აქვს, ღვთის სასუფეველში შესვლა,

²⁵რადგან უფრო ადვილია, აქლემის გასვლა ნემსის ყუნწში, ვიდრე მდიდრის შესვლა ღვთის სასუფეველში.

²⁶და ვინც გაიგონა, უთხრა მას: და ვის შეუძლია ცხონება?

²⁷და მან უთხრა: შეუძლებელი კაცთათვის შესაძლებელია ღვთისათვის.

²⁸და უთხრა მას პეტრემ: აჰა, ჩვენ დავტოვეთ ყველაფერი და გამოგყევით შენ.

²⁹ხოლო იესომ უთხრა მათ: ამინ გეუბნებით თქვენ: არავინ არის, ვინც დატოვა სახლი ან მშობლები, ან ძმები, ან ცოლი, ან შვილები ღვთის სასუფევლისთვის,

³⁰რომ არ მიიღოს ბევრწილად ამ დროში და მომავალ საუკუნეში საუკუნო ცხოვრება.

³¹და წაიყვანა თორმეტნი და უთხრა მათ: აჰა, ავდივართ იერუსალიმში და აღსრულდება ყველაფერი, რაც დაწერილია წინასწარმეტყველთა მიერ ძისა კაცისას შესახებ;

³²რადგან გადასცემენ წარმართებს და დასცინებენ და აგინებენ და აფურთხებენ

³³და გვემენ და მოკლავენ მას და მესამე დღეს აღდგება.

³⁴და ისინი ვერაფერს მიხვდნენ და იყო ეს სიტყვა დაფარული მათთვის და ვერ იგებდნენ ნათქვამს.

³⁵და იყო, როცა მიუახლოვდა იგი იერიქოს, ვიღაც ბრმა იჯდა გზის პირას და ითხოვდა მოწყალებას.

³⁶და გაიგონა, რომ ხალხი მოდიოდა, და ეკითხებოდა: რა არის ეს?

³⁷და აუწყეს მას: იესო ნაზორეველმა უნდა გაიაროს.

³⁸და შეღაღადა და თქვა: იესო ძეო დავითისაო, შემიწყალე მე.

³⁹და ვინც წინ უძღოდა, კიცხავდნენ მას, რათა დადუმებულიყო, ხოლო იგი უფრო მეტად ღაღადებდა: იესო ძეო დავითისაო, შემიწყალე მე.

⁴⁰და შეჩერდა იესო და ბრძანა, მიეყვანათ იგი მასთან, და როცა მიუახლოვდა იგი, ჰკითხა მას:

⁴¹რა გინდა, რომ გაგიკეთო შენ? ხოლო მან უთხრა: უფალო, რომ ამეხილოს თვალები.

⁴²და იესომ უთხრა მას: აგეხილოს! შენმა რწმენამ გიხსნა შენ.

⁴³და მაშინვე აეხილა და გაჰყვა მას და ადიდებდა ღმერთს. და მთელმა ერმა იხილა და აქებდა ღმერთს.