Read ახალი აღთქმა წიგნი ლუკასი 2 Bible Online

წიგნი ლუკასი 2 - ახალი აღთქმა bible

წიგნი ლუკასი 2

¹იყო, იმ დღეებში გამოვიდა ბრძანება ავგუსტუს კეისრისა, რომ აღწერილიყო მთელი ქვეყანა.

²ეს აღწერა პირველი იყო კვირინუსის სირიაში მმართველობისას.

³და მიდიოდა ყველა, რომ აღწერილიყო, თითოეული — თავის ქალაქში.

⁴და ავიდა იოსებიც გალილეიდან, ქალაქ ნაზარეთიდან, ჰურიასტანში, დავითის ქალაქში, რომელსაც ჰქვია ბეთლემი, რადგან იყო იგი დავითის სახლიდან და ტომიდან,

⁵რათა აღწერილიყო მარიამთან, თავის დაწინდულთან, ერთად, რომელიც იყო მუცლადღებული.

⁶და იყო, მათი ყოფნისას იქ, დადგა მისი შობის დღეები.

⁷და შვა ძე თავისი, პირმშო, და შეახვია იგი და ჩააწვინა იგი ბაგაში, რადგან არ იყო მათთვის ადგილი სასტუმროში.

⁸და მწყემსები იყვნენ იმ მხარეში ველად და იცავდნენ ღამის სახმილავზე თავის ფარას.

⁹და, აჰა, ანგელოზი უფლისა დაადგა მათ და დიდება უფლისა გამოუბრწყინდა მათ და შეშინდნენ დიდი შიშით.

¹⁰და უთხრა მათ ანგელოზმა: ნუ გეშინიათ, რადგან, აჰა, გახარებთ თქვენ დიდ სიხარულს, რომელიც იქნება მთელი ერისთვის,

¹¹რადგან იშვა თქვენთვის დღეს მხსნელი, რომელიც არის ქრისტე უფალი, დავითის ქალაქში.

¹²და ეს იქნება თქვენთვის ნიშანი — იპოვით ყრმას, შეხვეულს და მწოლიარეს ბაგაში.

¹³და უეცრად ანგელოზთან გაჩნდა სიმრავლე ზეციურ მხედრობათა, რომლებიც აქებდნენ ღმერთს და ამბობდნენ:

¹⁴დიდება მაღალთა შინა ღმერთს, ქვეყანაზე მშვიდობა და კაცთა შორის სათნოება.

¹⁵და იყო, როდესაც ავიდნენ მათგან ცაში ანგელოზები, მწყემსებმა უთხრეს ერთმანეთს: გავიდეთ ბეთლემამდე და ვიხილოთ ეს სიტყვა, რომელიც აღსრულდა, რომელიც უფალმა გვაუწყა ჩვენ.

¹⁶და მივიდნენ სწრაფად და იპოვეს მარიამი და იოსები და ყრმა, მწოლიარე ბაგაში.

¹⁷და როდესაც იხილეს, გულისხმაყვეს სიტყვა, რომელიც ითქვა მათ მიმართ იმ ყრმის შესახებ.

¹⁸და ყველას, ვისაც ესმოდა, უკვირდა მწყემსების ნათქვამი მათთვის;

¹⁹ხოლო მარიამმა დაიმარხა ეს სიტყვები და ჩაიდო თავის გულში.

²⁰და მიბრუნდნენ მწყემსები, ადიდებდნენ და აქებდნენ ღმერთს ყველაფრის გამო, რაც მოისმინეს და იხილეს, როგორც ითქვა მათთვის.

²¹და როცა შესრულდა რვა დღე, რათა წინადაეცვითათ მისთვის, ეწოდა მისი სახელი, იესო, რომელიც ეწოდა ანგელოზისგან მის მუცლადღებამდე.

²²და როცა შესრულდა მათი განწმენდის დღეები, მოსეს სჯულის მიხედვით აიყვანეს იგი იერუსალიმში, რომ წარედგინათ უფლის წინაშე —

²³როგორც დაწერილია უფლის სჯულში ყოველ წულს, რომელიც გახსნის საშოს, წმიდა უფლისა ეწოდება (გამ.13,2) —

²⁴და რომ მიეცათ შესაწირი, როგორც ნათქვამია უფლის სჯულში, ორი გვრიტი ან მტრედის ორი ხუნდი.

²⁵და, აჰა, იყო კაცი იერუსალიმში, რომლის სახელი იყო სიმეონი; და ეს იყო კაცი მართალი და ღვთისმოშიში და მოელოდა ისრაელის ნუგეშისცემას და სულიწმიდა იყო მასზე;

²⁶და იყო მისთვის უწყებული სულიწმიდისგან, რომ არ იხილავდა სიკვდილს, ვიდრე არ იხილავდა უფლის ცხებულს.

²⁷და მივიდა სულიწმიდით ტაძარში და, როცა შეიყვანეს მშობლებმა ყრმა იესო, როგორც ევალებოდათ მათ სჯულის წესისამებრ მის მიმართ,

²⁸მან აიყვანა იგი თავის ხელში და აკურთხა ღმერთი და თქვა:

²⁹აწ განუტევე მონა შენი, მეუფეო, სიტყვისამებრ შენისა მშვიდობით,

³⁰რადგან იხილეს თვალთა ჩემთა მაცხოვარება შენი,

³¹რომელიც გაამზადე ყოველი ერის წინაშე,

³²ნათელი განსაცხადებლად წარმართთათვის და სადიდებლად ერისა შენისა ისრაელისა.

³³და იყვნენ იოსები და დედა მისი გაკვირვებულნი იმით, რაც ითქვა მასზე.

³⁴და აკურთხა ისინი სიმეონმა და უთხრა მარიამს, მის დედას: აჰა, იგი დგას დასამხობად და აღსადგენად მრავალთა ისრაელში და ნიშნად ცილობისა.

³⁵და თვით შენს სულშიც გაივლის მახვილი, რათა გაცხადდეს ზრახვა მრავალი გულისა.

³⁶და იყო ანა წინასწარმეტყველი, ფანოელის ასული, ასერის ტომიდან; იგი ძლიერ ხანდაზმული იყო და იცხოვრა ქმართან ერთად შვიდი წელი თავისი სიქალწულიდან.

³⁷და იგი იყო ქვრივი, დაახლოებით, ოთხმოცდაოთხი წელი, რომელიც არ შორდებოდა ტაძარს და მარხვით და ვედრებით ემსახურებოდა ღამე და დღე.

³⁸და იგი იმავე დროს წარდგა და მადლობდა უფალს და ეუბნებოდა მის შესახებ ყველას, ვინც მოელოდა გამოხსნას იერუსალიმში.

³⁹და როდესაც აღასრულეს ყველაფერი უფლის სჯულის მიხედვით, დაბრუნდნენ გალილეაში, თავის ქალაქ ნაზარეთში.

⁴⁰ხოლო ყრმა იზრდებოდა და მტკიცდებოდა სულით და ივსებოდა სიბრძნით და მადლი ღვთისა იყო მასზე.

⁴¹და ადიოდნენ მისი მშობლები ყოველწლიურად იერუსალიმში პასექის დღესასწაულზე.

⁴²და როცა იყო იგი თორმეტი წლისა, ავიდნენ ისინი იერუსალიმში, ჩვეულებისამებრ, დღესასწაულზე;

⁴³და აღასრულეს ის დღეები და, როდესაც ბრუნდებოდნენ ისინი, დარჩა ყრმა იესო იერუსალიმში და არ იცოდნენ იოსებმა და მისმა დედამ

⁴⁴და ეგონათ, რომ იგი მგზავრებთან ერთად იყო; და გაიარეს ერთი დღის გზა და ეძებდნენ მას ნათესავებსა და ნაცნობებს შორის

⁴⁵და ვერ იპოვეს და დაბრუნდნენ იერუსალიმში და ეძებდნენ მას.

⁴⁶და იყო, სამი დღის შემდეგ იპოვეს იგი ტაძარში მჯდომი მოძღვართა შორის, უსმენდა მათ და ეკითხებოდა მათ.

⁴⁷და გაოგნებული იყო ყველა მისი მსმენელი მისი გონიერებით და პასუხებით.

⁴⁸და დაინახეს იგი და განცვიფრდნენ და უთხრა მას თავისმა დედამ: შვილო, რა გვიყავი ჩვენ ეს? აჰა, მე და მამაშენი გულმოკლულები გეძებდით შენ.

⁴⁹და უთხრა მათ: და რატომ მეძებდით მე განა არ ცოდით, რომ რაც ჩემი მამისა არის, იქ მმართებს მე ყოფნა?

⁵⁰და მათ ვერ გაიგეს სიტყვა, რომელიც უთხრა მათ.

⁵¹და ჩამოვიდა მათთან ერთად და მივიდა ნაზარეთში და ემორჩილებოდა მათ; ხოლო მისმა დედამ დაიმარხა ყველა ეს სიტყვა თავის გულში.

⁵²და იესო წარემატებოდა სიბრძნით და ასაკით და მადლით ღვთისა და კაცთა წინაშე.