Read ახალი აღთქმა წიგნი ლუკასი 20 Bible Online

წიგნი ლუკასი 20 - ახალი აღთქმა bible

წიგნი ლუკასი 20

¹და იყო, ერთ დღეს, როცა ასწავლიდა იგი ხალხს და ახარებდა ტაძარში, მიადგნენ მღვდელმთავრები და მწიგნობრები უხუცესებთან ერთად

²და უთხრეს მას და თქვეს: გვითხარი ჩვენ: რომელი ხელმწიფებით აკეთებ ამას? ან ვინ არის, ვინც მოგცა შენ ეს ხელმწიფება?

³ხოლო იესომ მიუგო და უთხრა მათ: გკითხავთ მეც თქვენ ერთ სიტყვას და მითხარით მე

⁴ნათლისცემა იოანესი ზეციდან იყო თუ კაცთაგან?

⁵ხოლო ისინი ბჭობდნენ ერთმანეთში და ამბობდნენ: თუ ვიტყვით: ზეციდან, — გვეტყვის: რატომ არ ირწმუნეთ მისი?

⁶ხოლო თუ ვიტყვით: კაცთაგან, მთელი ერი ჩაგვქოლავს ჩვენ, რადგან დარწმუნებულნი არიან, რომ იოანე წინასწარმეტყველია.

⁷და მიუგეს: არ ვიცით, საიდან იყო.

⁸და იესომ უთხრა მათ: არც მე გეტყვით თქვენ, რომელი ხელმწიფებით ვაკეთებ ამას.

⁹და დაიწყო ერთან საუბარი ამ იგავით: ვიღაც კაცმა გააშენა ვენახი და გადასცა იგი მიწათმოქმედებს და წავიდა დიდი ხნით.

¹⁰და თავის დროზე გაგზავნა მიწათმოქმედებთან მონა, რათა ვენახის ნაყოფი მიეცათ მისთვის, ხოლო მიწათმოქმედებმა სცემეს და გაუშვეს იგი ცარიელი.

¹¹და დამატებით გაგზავნა სხვა მონა, ხოლო მათ ისიც სცემეს და შეურაცხყვეს და გაუშვეს ცარიელი.

¹²და დამატებით გაგზავნა მესამე, ხოლო მათ ისიც დაჭრეს და გააგდეს.

¹³და თქვა ვენახის პატრონმა: რა ვქნა? გავგზავნი ჩემს საყვარელ ძეს, იქნებ მისი მოერიდოთ.

¹⁴ხოლო როცა დაინახეს იგი მიწათმოქმედებმა, ბჭობდნენ ერთმანეთში და ამბობდნენ: ეს არის მემკვიდრე; მოდით, მოვკლათ, რომ ჩვენი იყოს მემკვიდრეობა.

¹⁵და გაიყვანეს იგი ვენახის გარეთ და მოკლეს. ახლა რას უზამს მათ ვენახის პატრონი?

¹⁶მივა და ამოწყვეტს იმ მიწათმოქმედებს და მისცემს ვენახს სხვებს. ხოლო მათ გაიგონეს ეს და თქვეს: ნუ იქნება!

¹⁷და მან შეხედა მათ და უთხრა: როგორ არის ეს დაწერილი: ლოდი, რომელიც დაიწუნეს მშენებლებმა, იგი იქცა თავკიდურად (ფს.117,22)?

¹⁸ყველა, ვინც დაეცემა იმ ლოდზე, შეიმუსრება და ვისაც დაეცემა, გასრესს მას.

¹⁹და ეძებდნენ მღვდელმთავრები და მწიგნობრები, რათა დაედოთ მისთვის ხელი იმ დროს, და ეშინოდათ ხალხისა, რადგან იცოდნენ, რომ მათ უთხრა ეს იგავი;

²⁰და უთვალთვალებდნენ და მიუგზავნეს მსტოვრები, რომლებიც აჩვენებდნენ თავს მართლებად, რათა დაეჭირათ იგი სიტყვაში ისე, რომ გადაეცათ იგი მმართველის მთავრობისა და ძალაუფლებისთვის.

²¹და ჰკითხეს მას და უთხრეს: მოძღვარო, ვიცით, რომ სიმართლეს ამბობ და ასწავლი და არ პირმოთნეობ, არამედ ჭეშმარიტად ღვთის გზას ასწავლი.

²²მართებულია ჩვენთვის კეისრისთვის ხარკის მიცემა თუ არა?

²³და როცა მიხვდა მათ მზაკვრობას, უთხრა მათ: რად მცდით მე?

²⁴მაჩვენეთ მე დინარი, ხოლო მათ აჩვენეს. და უთხრა: ვისია ეს სახე და წარწერა? ხოლო მათ მიუგეს და უთხრეს: კეისრისა.

²⁵და იესომ უთხრა მათ: ასე რომ, მიეცით კეისრისა კეისარს და ღვთისა — ღმერთს.

²⁶და ვერ შეძლეს მისი დაჭერა სიტყვაში ერის წინაშე და გაუკვირდათ მისი პასუხი და დადუმდნენ.

²⁷და მივიდნენ ვიღაც სადუკევლები, რომლებიც ამბობდნენ: აღდგომა არ არსებობს, — და ჰკითხეს მას

²⁸და უთხრეს: მოძღვარო, მოსემ დაგვიწერა ჩვენ: თუ ვინმეს ძმა მოუკვდეს და ჰყავდეს ცოლი, და იგი უშვილო იყოს, მოიყვანოს მისმა ძმამ მისი ცოლი და აღუდგინოს თესლი თავის ძმას (2სჯ.25,5).

²⁹შვიდი ძმა იყო ჩვენ შორის; და პირველმა მოიყვანა ცოლი და მოკვდა უშვილო,

³⁰და მეორემაც მოიყვანა ცოლად და ესეც მოკვდა უშვილო,

³¹და მესამემაც მოიყვანა იგი, და ამგვარადვე შვიდივემ და არ დარჩათ შვილები და დაიხოცნენ.

³²ყველაზე ბოლოს დედაკაციც მოკვდა.

³³აღდგომისას დედაკაცი რომელი მათგანის ცოლი იქნება, რადგან შვიდივეს ჰყავდა იგი ცოლად?

³⁴და მიუგო და უთხრა მათ იესომ: ამ სოფლის შვილები ქორწინდებიან და თხოვდებიან,

³⁵ხოლო ვინც ღირსი იქნება, მიაღწიოს იმ საუკუნეს და აღდგომას მკვდრეთით, არც ქორწინდება და არც თხოვდება;

³⁶აღარც სიკვდილი შეუძლიათ, რადგან ანგელოზთა სწორნი არიან და ღვთისა და აღდგომის ძეები არიან.

³⁷ხოლო რომ აღდგებიან მკვდრები, მოსემაც გვაუწყა მაყვლოვანთან, როცა უწოდა უფალს ღმერთი აბრაამისა და ღმერთი ისააკისა და ღმერთი იაკობისა (გამ.3,6) —

³⁸და არ არის ღმერთი მკვდართა, არამედ ცოცხალთა, რადგან ყველა ცოცხალია მის წინაშე.

³⁹მიუგო ზოგიერთმა მწიგნობარმა და უთხრა: მოძღვარო, კარგად თქვი.

⁴⁰და ვეღარ გაბედა ვერავინ, ეკითხა მისთვის.

⁴¹და უთხრა მათ უფალმა: როგორ ამბობენ ქრისტეზე, რომ ძე არის დავითისა?

⁴²ხოლო თვითონ დავითი ამბობს ფსალმუნთა წიგნში: უთხრა უფალმა ჩემს უფალს: დაჯექი ჩემ მარჯვნივ,

⁴³ვიდრე დავცემ შენს მტრებს შენ ფეხთქვეშ (ფს.109,1).

⁴⁴დავითი უფალს უწოდებს მას და როგორ არის მისი ძე?

⁴⁵და როცა ესმოდა ეს მთელ ხალხს, უთხრა თავის მოწაფეებს:

⁴⁶ერიდეთ მწიგნობრებს, რომლებსაც სურთ სიარული შესამოსლებით და უყვართ მისალმება მოედნებზე და წინ დასხდომა შესაკრებლებში და ინახით წინ სხდომა ნადიმებზე,

⁴⁷რომლებიც ჭამენ ქვრივთა სახლებს და მოსაჩვენებლად ხანგრძლივად ლოცულობენ; ისინი მიიღებენ უმეტეს სასჯელს.