Read ახალი აღთქმა წიგნი ლუკასი 21 Bible Online

წიგნი ლუკასი 21 - ახალი აღთქმა bible

წიგნი ლუკასი 21

¹შეხედა და დაინახა, როგორ დებდნენ განძის საცავში თავის შესაწირავს მდიდრები.

²და დაინახა ვიღაც გლახაკი ქვრივი, რომელმაც დადო ორი ლეპტა,

³და თქვა: ჭეშმარიტად გეუბნებით თქვენ, რომ ამ გლახაკმა ქვრივმა ყველაზე მეტი დადო,

⁴რადგან ამათ, ყველამ, თავისი მომეტებულიდან დადეს შესაწირად ღვთისთვის, ხოლო მან თავისი ნაკლულევანებიდან მთელი საცხოვრებელი, რაც ჰქონდა, დადო.

⁵და ზოგიერთებს, რომლებიც ამბობდნენ ტაძარზე, რომ ძვირფასი ქვებით და შემოწირულობებით არის გამშვენებული, უთხრა:

⁶ხედავთ ამას? მოვა დღეები, როცა არ დარჩება ქვა ქვაზე, რომელიც არ დაირღვევა.

⁷ჰკითხეს მას მოწაფეებმა: მოძღვარო, როდის იქნება ეს და რა არის ნიშანი, როცა ეს უნდა მოხდეს?

⁸ხოლო მან უთხრა: გაფრთხილდით, არ ცდუნდეთ, რადგან მრავალნი მოვლენ ჩემი სახელით და იტყვიან: მე ვარ და ჟამი მოახლოებულია, — ნუ გაჰყვებით მათ.

⁹ხოლო როდესაც გაიგებთ ომებსა და ამბოხებებზე, ნუ შეძრწუნდებით, რადგან ჯერ ეს უნდა მოხდეს, მაგრამ მაშინვე არ იქნება აღსასრული.

¹⁰მაშინ ეუბნებოდა მათ: აღდგება ხალხი ხალხის წინააღმდეგ და სამეფო სამეფოს წინააღმდეგ;

¹¹და იქნება დიდი მიწისძვრები ადგილ-ადგილ, შიმშილი და ჭირი; და საშინელებანი და ზეციდან დიდი ნიშნები იქნება.

¹²ხოლო უწინარეს ამ ყველაფრისა დაგადებენ თქვენ ხელს და დევნას დაგიწყებენ და გადაგცემენ შესაკრებლებსა და საპყრობილეებს და მიგიყვანენ მეფეთა და მთავართა წინაშე ჩემი სახელის გამო.

¹³და მოხდება ეს თქვენთვის დასამოწმებლად.

¹⁴ჩაიდეთ ეს თქვენს გულში, წინასწარ ნუ მოემზადებით, რა სიტყვა მიუგოთ,

¹⁵რადგან მე მოგცემთ თქვენ პირს და სიბრძნეს, რომელსაც წინ ვერ აღუდგება, ვერც საწინააღმდეგოს იტყვის ვერავინ, ვინც თქვენ წინააღმდეგ იქნება.

¹⁶და გადაგცემენ მშობლებიც და ძმებიც და ნათესავებიც და მეგობრებიც და დახოცავენ ზოგიერთ თქვენგანს.

¹⁷და იქნებით მოძულებულნი ყველასგან ჩემი სახელის გამო.

¹⁸და თქვენი თავიდან თმაც არ დაიკარგება.

¹⁹თქვენი მოთმინებით მოიპოვეთ თქვენი სული.

²⁰ხოლო როდესაც იხილავთ ჯარით გარშემორტყმულ იერუსალიმს, მაშინ გულისხმაყავით, რომ მოახლოებულია მოოხრება მისი.

²¹მაშინ ვინც ჰურიასტანში იქნება, გაიქცეს მთაში და ვინც იერუსალიმში იქნება, გავიდეს და ვინც სოფლად იქნება, ნუ შევა იქ;

²²რადგან ეს არის შურისგების დღეები, რათა აღსრულდეს ყველაფერი, რაც არის დაწერილი.

²³ხოლო ვაი ორსულებს და ვინც აწოვებს იმ დღეებში, რადგან იქნება მაშინ დიდი უბედურება ქვეყანაზე ამ ერზე. და რისხვა

²⁴და დაეცემიან მახვილის პირით და ტყვედ წაიყვანენ წარმართთა ყველა ერში; და იერუსალიმი გაითელება წარმართთაგან, ვიდრე არ დასრულდება წარმართთა ჟამი.

²⁵და იქნება ნიშნები მზეზე და მთვარეზე და ვარსკვლავებზე; და ქვეყანაზე ხალხთა შეშფოთება ზღვის ხმისა და აზვირთების გაუსაძლისობის გამო;

²⁶და კაცთა სულის განტევება შიშისა და მოლოდინისგან იმისა, რაც ელის ქვეყანას, რადგან ცათა ძალები შეიძვრება.

²⁷და მაშინ იხილავენ ძეს კაცისას, მომავალს ღრუბლებზე ძალითა და დიდებით (დან.7,13-14).

²⁸და როცა დაიწყება ამის აღსრულება, აიხედეთ და ასწიეთ თქვენი თავები, რადგან მოახლოვდა თქვენი გამოხსნა.

²⁹და უთხრა იგავი მათ: იხილეთ ლეღვი და ყველა ხე;

³⁰როცა ფოთოლი გამოვა, შეხედავთ და თავად იცით, რომ უკვე ახლოს არის ზაფხული.

³¹ასევე თქვენც, როცა იხილავთ, რომ ეს ყველაფერი მოხდა, იცოდეთ, რომ ახლოს არის სასუფეველი ღვთისა.

³²ამინ გეუბნებით თქვენ, რომ არ გადავა ეს მოდგმა, ვიდრე ეს ყოველივე არ იქნება.

³³ცა და ქვეყანა გადავა, ხოლო ჩემი სიტყვები არ გადავა.

³⁴და გაუფრთხილდით თქვენს თავს, რომ არ დამძიმდეს თქვენი გულები განცხრომით და სიმთვრალით და ამ სოფლის საზრუნავით და უეცრად არ მოიწიოს თქვენზე ის დღე,

³⁵როგორც მახე, რადგან დაატყდება ყველა მკვიდრს მთელი ქვეყნის პირზე.

³⁶ამიტომ იფხიზლეთ მარადჟამს და ევედრეთ, რომ ღირსი გახდეთ, თავი დააღწიოთ ამ ყველაფერს, რაც უნდა მოხდეს, და რომ დადგეთ წინაშე ძისა კაცისა.

³⁷და დღისით იყო ტაძარში და ასწავლიდა, ხოლო ღამით გადიოდა და რჩებოდა მთაზე, რომელსაც ეწოდება ზეთისხილისა.

³⁸და მთელი ერი დილაადრიან მიდიოდა მასთან ტაძარში, რომ მოესმინათ მისთვის.