Read ახალი აღთქმა წიგნი ლუკასი 24 Bible Online

წიგნი ლუკასი 24 - ახალი აღთქმა bible

წიგნი ლუკასი 24

¹და ერთშაბათს, ცისკარზე ადრიანად მივიდნენ საფლავზე და მიიტანეს გამზადებული სურნელება; და ვიღაც სხვებიც იყვნენ მათთან ერთად.

²და იპოვეს ლოდი გადაგორებული საფლავიდან

³და შევიდნენ და ვერ იპოვეს გვამი უფლისა იესოსი.

⁴და იყვნენ რა ისინი საგონებელში ამის გამო, აჰა, ორი კაცი ზედ დაადგა მათ ელვარე სამოსით;

⁵ხოლო ისინი შეშინებულნი იყვნენ და სახეები მიწისკენ დაეხარათ; და უთხრეს მათ: რად ეძებთ ცოცხალს მკვდრებთან?

⁶არ არის აქ, არამედ აღდგა. გაიხსენეთ, როგორ გეუბნებოდათ თქვენ, ვიდრე იყო გალილეაში,

⁷და გითხრათ: მართებს ძეს კაცისას გადაცემა ცოდვილ კაცთა ხელში და ჯვარცმა და მესამე დღეს აღდგომა;

⁸და გაახსენდათ მისი სიტყვები

⁹და დაბრუნდნენ საფლავიდან და აუწყეს ეს ყოველივე იმ თერთმეტს და ყველა დანარჩენს.

¹⁰და იყვნენ მაგდალელი მარიამი და იოანა და მარიამ იაკობისა და დანარჩენები მათთან ერთად, რომლებიც ეუბნებოდნენ მოციქულებს ამას.

¹¹და გამოჩნდა მათი სიტყვები მათ წინაშე, როგორც სისულელე, და არ ირწმუნეს მათი;

¹²ხოლო პეტრე ადგა და გაიქცა საფლავზე და შეიხედა და დაინახა მხოლოდ ტილოები და წავიდა თავისთან, გაკვირვებული მომხდარით.

¹³და აჰა, ორი მათგანი მიდიოდა იმავე დღეს დაბაში, რომელიც დაშორებულია იერუსალიმიდან სამოც უტევანზე და რომლის სახელია ემაოსი;

¹⁴და ესენი საუბრობდნენ ერთმანეთთან იმ ყველაფერზე, რაც მოხდა.

¹⁵და იყო, მათი საუბრისას და ძიებისას თვით იესო მიუახლოვდა და მიდიოდა მათთან ერთად;

¹⁶ხოლო მათ თვალები აებათ, რომ ვერ ეცნოთ იგი.

¹⁷და უთხრა მათ: რას ნიშნავს ეს სიტყვები, რაზეც ერთმანეთთან საუბრობთ სიარულისას და ხართ მწუხარენი?

¹⁸და მიუგო ერთმა მათგანმა, სახელად კლეოპამ, და უთხრა მას: იერუსალიმში მარტო შენ ხარ მწირი, რომელმაც არ იცი, რა მოხდა იქ ამ დღეებში?

¹⁹და უთხრა მათ: რა? ხოლო მათ უთხრეს მას: იესო ნაზარეველის შესახებ, რომელიც იყო კაცი წინასწარმეტყველი, ძლიერი საქმითა და სიტყვით ღვთისა და მთელი ერის წინაშე,

²⁰როგორ გადასცეს იგი მღვდელმთავრებმა და ჩვენმა მთავრებმა, რომ დაესაჯათ სიკვდილით, და ჯვარს აცვეს იგი,

²¹ხოლო ჩვენ იმედი გვქონდა, რომ ის არის, ვისაც უნდა ეხსნა ისრაელი, და ამ ყველაფერთან ერთად, ეს მესამე დღეა, რაც ეს მოხდა,

²²მაგრამ ზოგიერთმა დედაკაცმა, ჩვენგანმა, გაგვაოგნა ჩვენ, როცა მივიდნენ დილაადრიან საფლავზე

²³და ვერ იპოვეს მისი გვამი, მოვიდნენ და თქვეს, რომ იხილეს ჩვენება ანგელოზთა, რომლებმაც უთხრეს: ცოცხალია იგი.

²⁴და მივიდა ზოგიერთი ჩვენგანი საფლავზე და ნახა ისე, როგორც დედაკაცებმა თქვეს, ხოლო იგი ვერ იხილეს.

²⁵და მან უთხრა მათ: ო, უგუნურნო და გულით მძიმენო, რომ გერწმუნათ ყველაფერი, რასაც ამბობდნენ წინასწარმეტყველნი,

²⁶განა ასე არ უნდა ვნებულიყო ქრისტე და შესულიყო თავის დიდებაში?

²⁷და დაიწყო მოსედან და წინასწარმეტყველთაგან და განუმარტავდა მათ ყველაფერს, დაწერილს, თავის შესახებ.

²⁸და მიუახლოვდნენ დაბას, სადაც მიდიოდნენ, და მან მოიმიზეზა, რომ უფრო შორს უნდა წასულიყო.

²⁹და აიძულებდნენ მას და ეუბნებოდნენ: დარჩი ჩვენთან, რადგან შემწუხრდა და მიწურულია დღე. და შევიდა მათთან დასარჩენად.

³⁰და იყო, ინახით იჯდა რა იგი მათთან, აიღო პური, აკურთხა და გატეხა და აძლევდა მათ;

³¹ხოლო მათ აეხილათ თვალები და იცნეს იგი. და იგი უჩინარი გახდა მათთვის;

³²ხოლო ისინი ეუბნებოდნენ ერთმანეთს: განა ჩვენი გული ანთებული არ იყო, როცა გვეუბნებოდა ჩვენ გზაში, როცა გვიხსნიდა ჩვენ წერილს?

³³და ადგნენ იმავე ჟამს და დაბრუნდნენ იერუსალიმში და ნახეს შეკრებილნი — თერთმეტნი და ვინც მათთან იყვნენ,

³⁴რომლებიც ამბობდნენ: ჭეშმარიტად აღდგა უფალი და ეჩვენა სიმონს.

³⁵და ისინი უამბობდნენ, რაც გზაში მოხდა, და როგორ გამოეცხადა იგი მათ პურის გატეხისას;

³⁶ხოლო როცა ისინი ამას ამბობდნენ, თავად იესო დადგა მათ შორის და უთხრა მათ: მშვიდობა თქვენდა.

³⁷და შეძრწუნდნენ და შეეშინდათ, ეგონათ, რომ სული იხილეს;

³⁸ხოლო მან უთხრა მათ: რად ხართ შეძრწუნებულნი და რატომ აღიძვრებიან გულისსიტყვები თქვენს გულში?

³⁹ნახეთ ჩემი ხელები და ფეხები, რადგან თავად მე ვარ; ხელი შემახეთ მე და ნახეთ, რადგან სულს ხორცი და ძვალი არა აქვს, ხოლო ხედავთ, რომ მე მაქვს.

⁴⁰და ეს თქვა და უჩვენა მათ ხელები და ფეხები.

⁴¹და როცა კიდევ ვერ ირწმუნეს მათ სიხარულისგან და უკვირდათ, უთხრა მათ იესომ: გაქვთ რამე საჭმელი აქ?

⁴²ხოლო მათ მისცეს მას შემწვარი თევზის ნაჭერი და თაფლიანი ფიჭა.

⁴³და ჭამა მათ წინაშე და რაც დარჩა, მისცა მათ

⁴⁴და უთხრა: ეს არის სიტყვები, რომლებსაც გეუბნებოდით თქვენ, ვიდრე ვიყავი თქვენთან: უნდა აღსრულდეს ყოველივე, რაც დაწერილია მოსეს სჯულში და წინასწარმეტყველებებში და ფსალმუნებში ჩემ შესახებ.

⁴⁵მაშინ გაუხსნა მათ გონება, რომ გაეგოთ წერილი,

⁴⁶და უთხრა მათ: ასე უნდა ვნებულიყო ქრისტე და აღმდგარიყო მკვდრეთით მესამე დღეს

⁴⁷და ქადაგებულიყო მისი სახელით სინანული და ცოდვათა მიტევება ყველა წარმართისათვის. დაიწყეთ იერუსალიმიდან,

⁴⁸რადგან თქვენ ხართ მოწმე ამისი.

⁴⁹და, აჰა, მე მოვავლენ აღთქმას ჩემი მამისას თქვენზე, ხოლო თქვენ დასხედით ქალაქ იერუსალიმში, ვიდრე არ შეიმოსებით მაღლიდან ძალით.

⁵⁰და გაიყვანა ისინი ბეთანიამდე და აღაპყრო ხელები და აკურთხა ისინი.

⁵¹და იყო, როცა იგი აკურთხებდა მათ, გაშორდა მათ და ადიოდა ზეცაში.

⁵²და მათ თაყვანი სცეს მას და მიბრუნდნენ იერუსალიმში დიდი სიხარულით

⁵³და იყვნენ მუდამ ტაძარში, აქებდნენ და აკურთხებდნენ ღმერთს.