Read ახალი აღთქმა წიგნი ლუკასი 3 Bible Online

წიგნი ლუკასი 3 - ახალი აღთქმა bible

წიგნი ლუკასი 3

¹ტიბერიუს კეისრის მმართველობის მეთხუთმეტე წელს, პონტოელი პილატეს მმართველობისას ჰურიასტანში, ჰეროდეს ტეტრარქობისას გალილეაში, ხოლო ფილიპეს, მისი ძმის, ტეტრარქობისას იტურიაში და ტრაქონელთა მხარეში და ლისანიუსის ტეტრარქობისას აბილინესში,

²ანასა და კაიაფას მღვდელმთავრობისას, იყო სიტყვა უფლისა იოანეს, ზაქარიას ძის, მიმართ უდაბნოში.

³და მოიარა იორდანის მთელი შემოგარენი და ქადაგებდა ნათლისღებას სინანულისას მოსატევებლად ცოდვათა,

⁴როგორც წერია ესაია წინასწარმეტყველის სიტყვათა წიგნში: ხმა მღაღადებლისა უდაბნოში; გაამზადეთ გზა უფლისა და გამართეთ მისი ბილიკები.

⁵ყოველი ხევი ამოივსება და ყოველი მთა და ბორცვი დადაბლდება და იქცევა მრუდე გამართულად და უსწორმასწორო სწორ გზად;

⁶და იხილავს ყოველი ხორციელი ღვთისაგან ხსნას (ეს.40,3-5).

⁷და ეუბნებოდა მისგან ნათლის მისაღებად მოსულ ხალხს: იქედნეთა ნაშობნო, ვინ გიჩვენათ თქვენ გაქცევა მომავალი რისხვისგან?

⁸გამოიღეთ ნაყოფი, ღირსი სინანულისა, და ნუ ფიქრობთ და ამბობთ თქვენთვის: მამა გვყავს აბრაამი, — რადგან გეუბნებით თქვენ, რომ შეუძლია ღმერთს, ამ ქვათაგან აღუდგინოს შვილები აბრაამს,

⁹რადგან ცული უკვე ხეების ძირთან დევს. ყოველი ხე, რომელიც არ გამოიღებს კეთილ ნაყოფს, მოიჭრება და ცეცხლს მიეცემა.

¹⁰და ეკითხებოდა მას ხალხი და ეუბნებოდა: და რა ვქნათ?

¹¹მიუგო და უთხრა მათ: ვისაც აქვს ორი კვართი, მისცეს, ვისაც არა აქვს, და ვისაც აქვს საჭმელი, მსგავსადვე გააკეთოს.

¹²მივიდნენ მეზვერეებიც ნათლის მისაღებად და უთხრეს მას: მოძღვარო, რა ვქნათ?

¹³ხოლო მან უთხრა მათ: თქვენთვის დაწესებულზე მეტს ნურაფერს აიღებთ.

¹⁴ეკითხებოდნენ მას მეომრად განწესებულნიც: ჩვენ რაღა ვქნათ? და უთხრა მათ: ნურავის დასწამებთ ცილს, ნურც შეავიწროებთ და იკმარეთ თქვენი გასამრჯელო.

¹⁵და როცა ელოდებოდა ერი, ყველა ფიქრობდა თავის გულში იოანეზე: ნუთუ ის არის ქრისტე?

¹⁶მიუგო იოანემ ყველას და უთხრა: მე წყლით ნათელს გცემთ თქვენ, ხოლო მოდის ჩემზე ძლიერი, რომლის ხამლთა თასმების გახსნის ღირსიც არა ვარ. იგი თქვენ ნათელს გცემთ სულიწმიდით და ცეცხლით.

¹⁷მისი ნიჩაბი მის ხელთ არის და გაწმენდს თავის კალოს და შეაგროვებს ხორბალს ბეღელში, ხოლო ბზეს დაწვავს უშრეტი ცეცხლით.

¹⁸და ბევრ სხვა რამესაც სანუგეშოდ ახარებდა ერს.

¹⁹ხოლო ჰეროდე ტეტრარქმა, რომელსაც ამხელდა იგი ჰეროდიას, მისი ძმის ცოლის, გამო და ყოველივე ამის გამო, რა ბოროტებაც ჩაიდინა ჰეროდემ

²⁰ყველაფერს ესეც დაუმატა და დაამწყვდია იოანე საპყრობილეში.

²¹და იყო, როცა ნათელს იღებდა მთელი ერი, იესომაც ნათელი მიიღო და ლოცულობდა; და გაიხსნა ცა

²²და გადმოვიდა სულიწმიდა ხორციელი სახით, როგორც მტრედი, მასზე და ხმა იყო ზეციდან მეტყველი: შენ ხარ ძე ჩემი საყვარელი, შენ სათნო ხარ ჩემთვის.

²³და თავად იესო, როდესაც იწყებდა, იყო დაახლოებით ოცდაათი წლისა, და ეგონათ ძე იოსებისა, ელისა,

²⁴მატთანისა, ლევისა, მელქისა, იანესი, იოსებისა,

²⁵მატათისა, ამოსისა, ნაუმისა, ესლისა, ნაგესი,

²⁶მაათისა, მატათისა, სემისა, იოსებისა, იუდასი,

²⁷იონანისა, რესასი, ზორობაბელისა, სალათიელისა, ნერისა,

²⁸მელქისა, ადისა, კოსამისა, ელმოდადისა, ერისა,

²⁹იოსისა, ელეაზარისა, იორამისა, მატათისა, ლევისა,

³⁰სიმეონისა, იუდასი, იოსებისა, იონანისა, ელიაკიმისა,

³¹მელეასი, მაინანისა, მატათანისა, ნათანისა,

³²დავითისა, იესესი, იობედისა, ბოოსისა, სალმონისა, ნაასონისა,

³³ამინადაბისა, არამისა, ესრომისა, ფარეზისა, იუდასი,

³⁴იაკობისა, ისააკისა, აბრაამისა, თარასი, ნაქორისა,

³⁵სერუქისა, რაგავისა, ფალეგისა, ებერისა, სალასი,

³⁶კაინანისა, არფაქსადისა, სემისა, ნოესი, ლამექისა,

³⁷მათუსალასი, ენოქისა, იარედისა, მალელეილისა, კაინანისა,

³⁸ენოსისა, სეითისა, ადამისა და ღვთისა.