Read ახალი აღთქმა წიგნი ლუკასი 4 Bible Online

წიგნი ლუკასი 4 - ახალი აღთქმა bible

წიგნი ლუკასი 4

¹ხოლო იესო, სავსე სულიწმიდით, დაბრუნდა იორდანიდან და მიჰყავდა სულს უდაბნოში,

²და ორმოცი დღე გამოიცდებოდა ეშმაკისგან. და არაფერი ჭამა იმ დღეებში და, როცა დასრულდა ის დღეები, მოშივდა.

³და უთხრა მას ეშმაკმა: თუ ძე ხარ ღვთისა, უთხარი ამ ქვებს, რომ იქცნენ პურებად.

⁴მიუგო იესომ და უთხრა მას: წერია, რომ არა მხოლოდ პურით ცოცხლობს კაცი, არამედ ღვთის ყოველი სიტყვით (2სჯ.8,3).

⁵და აიყვანა იგი მაღალ მთაზე და უჩვენა მას ქვეყნის ყველა სამეფო უმოკლეს დროში;

⁶და უთხრა მას ეშმაკმა: შენ მოგცემ მთელ ამ ხელმწიფებას და მის დიდებას, რადგან მე მომეცა, და ვისაც მინდა, მივცემ მას.

⁷თუ შენ თაყვანს მცემ მე, შენი იქნება ყველაფერი.

⁸მიუგო იესომ და უთხრა მას: გამშორდი, სატანა! წერია: უფალ ღმერთს შენსას თაყვანი ეცი და მხოლოდ მას ემსახურე (2სჯ.6,13).

⁹და მიიყვანა იგი იერუსალიმში და დააყენა იგი ტაძრის სახურავზე და უთხრა მას: თუ ძე ხარ ღვთისა, გადაიგდე თავი აქედან ქვევით,

¹⁰რადგან წერია, რომ თავის ანგელოზებს უბრძანებს, რომ დაგიცვან შენ;

¹¹და ხელში აგიყვანენ შენ, რომ არსად წამოჰკრა ქვას ფეხი შენი (ფს.90,11-12).

¹²მიუგო იესომ და უთხრა: ნათქვამია: არ გამოსცადო უფალი ღმერთი შენი (2სჯ.6,16).

¹³და როცა დაამთავრა ყველა გამოცდა ეშმაკმა, გაშორდა მას დრომდე.

¹⁴და მობრუნდა იესო სულის ძალით გალილეაში და ამბავი გავრცელდა მთელ შემოგარენში მის შესახებ.

¹⁵და თავად ასწავლიდა მათ შესაკრებლებში და იდიდებოდა ყველასგან.

¹⁶და მივიდა ნაზარეთში, სადაც იყო აღზრდილი, და შევიდა, ჩვეულებისამებრ, შაბათ დღეს შესაკრებელში და ადგა წასაკითხად.

¹⁷და მისცეს მას წიგნი ესაია წინასწარმეტყველისა და გადაშალა წიგნი და იპოვა ადგილი, სადაც იყო დაწერილი:

¹⁸სული უფლისა არის ჩემზე, რომლის გამოც მცხო მე, რათა ვახარო გლახაკებს, რადგან მომავლინა მე, რომ განვკურნო გულით შემუსრვილნი და ვუქადაგო ტყვეებს განთავისუფლება და ბრმებს თვალების ახილვა და შეურვებულებს მიტევებით გაშვება,

¹⁹რომ ვიქადაგო წელიწადი უფლისგან შეწყნარებული (ეს.61,1-2).

²⁰და დახურა წიგნი და მისცა მსახურს და დაჯდა. და შესაკრებელში ყველას თვალები მიპყრობილი იყო მისკენ.

²¹და დაუწყო საუბარი მათ: დღეს აღსრულდა ეს დაწერილი თქვენ ყურადსაღებად.

²²და ყველა ემოწმებოდა მას და უკვირდათ სიტყვები მადლისა, რომლებიც გამოდიოდა მისი პირიდან, და ამბობდნენ: განა ეს არ არის ძე იოსებისა?

²³და უთხრა მათ: უეჭველია, მეტყვით მე ამ ანდაზას: მკურნალო, განიკურნე თავი შენი; რაც გავიგეთ, რომ მოხდა კაპერნაუმში, გააკეთე აქაც, შენს მამულში.

²⁴და უთხრა: ამინ გეუბნებით თქვენ, რომ არც ერთი წინასწარმეტყველი არ არის შეწყნარებული თავის მამულში.

²⁵ჭეშმარიტად გეუბნებით თქვენ: მრავალი ქვრივი იყო ელიას დღეებში ისრაელში, როცა დაიხშო ცა სამი წელი და ექვსი თვე ისე რომ იყო დიდი შიმშილი მთელ ქვეყანაზე,

²⁶და არც ერთ მათგანთან არ გაიგზავნა ელია, გარდა ქვრივი დედაკაცისა სიდონის სარეფთაში;

²⁷და მრავალი კეთროვანი იყო ისრაელში ელისე წინასწარმეტყველის დროს და არც ერთი მათგანი არ განიწმინდა, გარდა ნეემან ასურისა.

²⁸და აივსო ყველა გულისწყრომით, ვინც იყო შესაკრებელში, როცა გაიგონეს ეს;

²⁹და ადგნენ და გააძევეს იგი ქალაქის გარეთ და მიიყვანეს იგი იმ მთის წვერამდე, რომელზეც მათი ქალაქი იყო გაშენებული, რათა გადაეგდოთ იგი;

³⁰ხოლო მან გაიარა მათ შორის და წავიდა.

³¹და ჩავიდა კაპერნაუმში, გალილეის ქალაქში, და ასწავლიდა მათ შაბათს.

³²და განცვიფრებულნი იყვნენ მისი მოძღვრებით, რადგან ხელმწიფებით იყო მისი სიტყვა.

³³და იყო შესაკრებელში კაცი, რომელთანაც იყო არაწმინდა სული, და შეჰღაღადა დიდი ხმით

³⁴და უთხრა: რა გინდა ჩვენგან შენ, იესო ნაზარეველო? მოხვედი ჩვენს წარსაწყმედად, გიცნობ შენ, ვინ ხარ, წმიდა ღვთისა.

³⁵და შერისხა იგი იესომ და უთხრა: გაჩუმდი და გადი მაგისგან. და დასცა იგი ეშმაკმა მათ შორის და გავიდა მისგან და არაფერი ავნო მას.

³⁶და გაოცებული იყო ყველა და ეუბნებოდნენ ერთმანეთს და ამბობდნენ: რა არის ეს სიტყვა, რომ ხელმწიფებით და ძალით უბრძანებს არაწმინდა სულებს და გადიან?

³⁷და გავრცელდა ხმა მის შესახებ გარემოსოფლების ყველა ადგილას.

³⁸და ადგა და შესაკრებლიდან შევიდა სიმონის სახლში. ხოლო სიმონის სიდედრი იყო შეპყრობილი ძლიერი ცხელებით და უთხრეს მას მის შესახებ.

³⁹და დაადგა თავზე და შერისხა ცხელება, და დატოვა იგი მაშინვე. ადგა და ემსახურებოდა მათ.

⁴⁰და მზის ჩასვლისას ყველამ, ვისაც ჰყავდა უძლურნი სხვადასხვა სენით, მიიყვანა ისინი მასთან, ხოლო მან თითოეულ მათგანს დაადო ხელი და განკურნა ისინი.

⁴¹და მრავალთაგან გადიოდნენ ეშმაკებიც და ღაღადებდნენ და ამბობდნენ: შენ ხარ ქრისტე, ძე ღვთისა. და რისხავდა მათ და არ აძლევდა ნებას, ეთქვათ, რომ იცოდნენ, რომ ეს არის ქრისტე.

⁴²და როცა გათენდა, გამოვიდა და წავიდა უდაბურ ადგილას. და ხალხი ეძებდა მას და მივიდნენ მასთან და აჩერებდნენ, რომ არ წასულიყო მათგან;

⁴³ხოლო მან უთხრა მათ: სხვა ქალაქებსაც უნდა ვახაროთ სასუფეველი ღვთისა, რადგან ამისთვის ვარ მოვლენილი.

⁴⁴და ქადაგებდა გალილეის შესაკრებლებში.