Read ახალი აღთქმა წიგნი ლუკასი 5 Bible Online

წიგნი ლუკასი 5 - ახალი აღთქმა bible

წიგნი ლუკასი 5

¹იყო, როდესაც ხალხი აწყდებოდა მას, რომ მოესმინა ღვთის სიტყვა, თვითონ იდგა გენესარეთის ტბის პირას.

²და დაინახა ორი ნავი, ტბის პირას მდგომი, ხოლო მებადურები გადმოვიდნენ იქიდან და რეცხავდნენ ბადეებს.

³და ავიდა ერთ ნავში, რომელიც იყო სიმონისა, და სთხოვა მას, ცოტა მოშორებოდა მიწას; და დაჯდა და ნავიდან ასწავლიდა ხალხს;

⁴ხოლო როგორც კი დაამთავრა საუბარი, უთხრა სიმონს: შედი ღრმად და ჩაუშვით თქვენი ბადეები დასაჭერად.

⁵და მიუგო სიმონმა და უთხრა: მოძღვარო, მთელი ღამე ვშრომობდით და ვერაფერი დავიჭირეთ, მაგრამ შენი სიტყვით ჩავუშვებთ ბადეს.

⁶და ეს რომ გააკეთეს, დაიჭირეს დიდი რაოდენობით თევზი და წყდებოდა მათი ბადეები;

⁷და ანიშნეს ამხანაგებს, რომლებიც იყვნენ სხვა ნავში, რომ მისულიყვნენ და დახმარებოდნენ მათ. და მივიდნენ და აავსეს ორივე ნავი, ისე რომ იძირებოდნენ ისინი.

⁸და როცა იხილა სიმონ-პეტრემ, ჩაუვარდა მუხლებში იესოს და უთხრა: გამშორდი მე, რადგან ცოდვილი კაცი ვარ, უფალო,

⁹რადგან გაოცებამ მოიცვა იგი და ყველა მასთან მყოფი,

¹⁰ასევე იაკობიც და იოანეც, ზებედეს ძეები, რომლებიც იყვნენ სიმონის თანამოზიარენი. და უთხრა სიმონს იესომ: ნუ გეშინია, ამიერიდან იქნები კაცთა მონადირე.

¹¹და გამოიტანეს ნავი მიწაზე და დატოვეს ყველაფერი და გაჰყვნენ მას.

¹²და იყო, როცა შევიდა იგი ერთ ქალაქში, აჰა, იყო კაცი, სრულიად კეთროვანი; და როდესაც დაინახა მან იესო, დავარდა პირქვე, ევედრებოდა მას და ეუბნებოდა: უფალო, თუ გნებავს, შეგიძლია ჩემი განწმენდა.

¹³და გაიწოდა ხელი და შეახო მას და უთხრა: მნებავს, განიწმინდე. და მაშინვე მოშორდა მას კეთრი.

¹⁴და მან უბრძანა მას: არავის უთხრა, არამედ წადი და უჩვენე შენი თავი მღვდელს და შესწირე შენი განწმენდისათვის, როგორც ბრძანა მოსემ მათთვის დასამოწმებლად.

¹⁵და უფრო მეტად გავრცელდა სიტყვა მის შესახებ და იკრიბებოდა დიდძალი ხალხი, რომ მოესმინა და განკურნებულიყო მის მიერ თავისი უძლურებისგან.

¹⁶ხოლო იგი გაერიდა უდაბნოში და ლოცულობდა.

¹⁷და იყო, ერთ დღეს იგი ასწავლიდა, და ისხდნენ ფარისევლები და სჯულისმოძღვრები, რომლებიც მოსულები იყვნენ გალილეის და ჰურიასტანისა და იერუსალიმის ყველა დაბიდან, და ძალა უფლისა იყო მათ განსაკურნავად.

¹⁸და აჰა, კაცებს მოჰყავდათ სარეცლით კაცი, რომელიც იყო დავრდომილი, და ცდილობდნენ, შეეყვანათ იგი და დაედოთ მის წინ;

¹⁹და ხალხის გამო ვერ ნახეს, საიდან შეეყვანათ იგი, და ავიდნენ ერდოზე და სახურავიდან ჩაუშვეს იგი სარეცელთან ერთად შუაში, იესოს წინ.

²⁰და როცა იხილა მათი რწმენა, უთხრა მას: კაცო, მოგეტეოს შენ შენი ცოდვები.

²¹და დაიწყეს ბჭობა მწიგნობრებმა და ფარისევლებმა და ამბობდნენ: ვინ არის ეს, რომელიც მკრეხელობს? ვის შეუძლია ცოდვათა მიტევება, თუ არა მხოლოდ ღმერთს?

²²და გულისხმაყო იესომ მათი ფიქრები და მიუგო და უთხრა მათ: რად ფიქრობთ თქვენს გულში?

²³რა უფრო ადვილია, თქმა: მოგეტეოს შენ შენი ცოდვები, თუ თქმა: ადექი და იარე?

²⁴ხოლო რათა იცოდეთ, რომ ხელმწიფება აქვს ძეს კაცისას ქვეყანაზე ცოდვათა მიტევებისა, უთხრა დავრდომილს: შენ გეუბნები, ადექი და აიღე შენი სარეცელი და წადი შენს სახლში!

²⁵და მაშინვე ადგა მათ თვალწინ, აიღო, რაზეც იწვა, და წავიდა თავის სახლში და ადიდებდა ღმერთს.

²⁶და გაოგნებამ შეიპყრო ყველა და ადიდებდნენ ღმერთს და დაეცათ შიში და ამბობდნენ: საოცრება ვიხილეთ დღეს.

²⁷და ამის შემდეგ გამოვიდა და ნახა მეზვერე, სახელად ლევი, რომელიც იჯდა საზვერეში, და უთხრა მას: გამომყევი მე.

²⁸და დატოვა ყველაფერი, და გაჰყვა მას.

²⁹და გაუმართა ლევიმ დიდი წვეულება მას თავის სახლში და იყო დიდი შეკრება მეზვერეთა და სხვათა, რომლებიც ინახით ისხდნენ მათთან ერთად.

³⁰და დრტვინავდნენ მათი მწიგნობრები და ფარისევლები მის მოწაფეებზე და ეუბნებოდნენ: რატომ ჭამთ და სვამთ მეზვერეებთან და ცოდვილებთან?

³¹და მიუგო იესომ და უთხრა მათ: არ სჭირდებათ ჯანმრთელებს მკურნალი, არამედ ავადმყოფებს;

³²არ მოვედი მოსაწოდებლად მართალთა, არამედ ცოდვილთა სინანულისთვის.

³³ხოლო მათ უთხრეს მას: რატომ მარხულობენ ხშირად და ვედრებას აღავლენენ მოწაფეები იოანესი და ასევე ფარისევლებისა, ხოლო შენები ჭამენ და სვამენ?

³⁴და იესომ უთხრა მათ: განა შეიძლება სიძის ძეები, ვიდრე მათთან არის სიძე, ამარხულო?

³⁵ხოლო მოვა დღეები, როცა ამაღლდება მათგან სიძე, მაშინ იმარხულებენ, იმ დღეებში.

³⁶და ეუბნებოდა მათ იგავითაც: არავინ ადებს საკერებელს ახალი სამოსიდან ძველ სამოსს, თორემ ახალსაც დახევს და ძველსაც არ მოერგება ახლის საკერებელი.

³⁷არავინ ასხამს ახალ ღვინოს ძველ თხიერებში, თორემ გახეთქავს ახალი ღვინო თხიერებს და იგი დაიღვრება და თხიერები უვარგისი გახდება;

³⁸არამედ ახალ ღვინოს ახალ თხიერებში ასხამენ და ორივე შეინახება.

³⁹და არავის, ვინც სვამს ძველს, არ მოუნდება ახალი, რადგან ამბობს: ძველი უფრო ტკბილია.