Read ახალი აღთქმა წიგნი იოანესი 1 Bible Online

წიგნი იოანესი 1 - ახალი აღთქმა bible

წიგნი იოანესი 1

¹დასაბამად იყო სიტყვა და სიტყვა იყო ღმერთთან და ღმერთი იყო სიტყვა.

²იგი იყო დასაბამად ღმერთთან.

³ყოველივე მის მიერ შეიქმნა, და მის გარეშე არაფერი შეიქმნა, რაც შეიქმნა.

⁴მასში ცხოვრება იყო და ცხოვრება იყო ნათელი კაცთა;

⁵და ნათელი ბნელში ჩანს და ბნელმა იგი ვერ მოიცვა.

⁶იყო კაცი, მოვლენილი ღვთის მიერ, და სახელი მისი — იოანე;

⁷იგი მოვიდა დასამოწმებლად, რომ დაამოწმოს ნათლის შესახებ, რათა ყველამ ირწმუნოს მის მიერ.

⁸არ იყო იგი ნათელი, არამედ რათა დაამოწმოს ნათლის შესახებ.

⁹იყო ნათელი ჭეშმარიტი, რომელიც განანათლებს ყოველ კაცს, მომავალს ამ სოფლად.

¹⁰ამ სოფლად იყო და ეს სოფელი მის მიერ შეიქმნა და ამ სოფელმა იგი ვერ შეიცნო.

¹¹თავისიანებთან მოვიდა და თავისიანებმა იგი არ შეიწყნარეს;

¹²ხოლო რომლებმაც შეიწყნარეს იგი, მისცა მათ ხელმწიფება, ყოფილიყვნენ ღვთის შვილები, რომელთაც სწამთ სახელი მისი,

¹³რომლებიც არც სისხლისგან, არც ხორცის წადილისგან, არც მამაკაცის წადილისგან, არამედ ღვთისაგან იშვნენ.

¹⁴და სიტყვა ხორციელ იქმნა და დამკვიდრდა ჩვენ შორის და ვიხილეთ დიდება მისი, დიდება, როგორც მხოლოდშობილისა მამის მიერ, სავსე მადლითა და ჭეშმარიტებით.

¹⁵იოანე მოწმობს მის შესახებ — იღაღადა და თქვა: ეს იყო, რომელზეც ვთქვი: რომელიც ჩემ შემდეგ მოდის, ჩემზე უპირატესია, რადგან ჩემზე წინ იყო.

¹⁶და მისი სისავსისგან ჩვენ ყველამ მივიღეთ, და მადლი — მადლის წილ;

¹⁷რადგან სჯული მოსეს მიერ მოგვეცა, მადლი და ჭეშმარიტება იესო ქრისტეს მიერ იქმნა.

¹⁸ღმერთი არავის არასდროს უხილავს; მხოლოდშობილმა ძემ, რომელიც არის მამის წიაღში, მან გამოთქვა.

¹⁹და ეს არის მოწმობა იოანესი, როცა გაგზავნეს მასთან იუდეველებმა იერუსალიმიდან მღვდლები და ლევიანები, რათა ეკითხათ მისთვის: შენ ვინ ხარ?

²⁰და აღიარა და არ უარყო; აღიარა: მე არა ვარ ქრისტე.

²¹და ჰკითხეს მას: მაშ, ვინ ხარ შენ? ელია ხარ? და თქვა: არა ვარ. წინასწარმეტყველი ხარ შენ? და მიუგო: არა.

²²და უთხრეს მას: გვითხარი ჩვენ, ვინ ხარ შენ, რათა პასუხი გავცეთ, ვინც გამოგვგზავნა ჩვენ: რას იტყვი შენ შესახებ?

²³და თქვა: მე ვარ ხმა მღაღადებლისა უდაბნოში: გამართეთ გზა უფლისა, როგორც თქვა ესაია წინასწარმეტყველმა (ეს.40,3).

²⁴და იყვნენ გამოგზავნილები ფარისეველთაგან

²⁵და ჰკითხეს მას და უთხრეს: რატომ სცემ ნათელს, თუ შენ არა ხარ ქრისტე, არც ელია, არც წინასწარმეტყველი?

²⁶მიუგო მათ იოანემ და უთხრა: მე ნათელს ვცემ წყლით; ხოლო თქვენ შორის დგას, რომელსაც თქვენ არ იცნობთ,

²⁷რომელიც ჩემ შემდეგ მოდის, ჩემზე უპირატესია, რომლის ხამლთა თასმების გახსნის ღირსიც არა ვარ.

²⁸ეს ბეთაბრაში იყო, იორდანის გაღმა, სადაც იყო იოანე და ნათელს სცემდა.

²⁹მომდევნო დღეს დაინახა იოანემ იესო, მომავალი მასთან, და თქვა: აჰა, ტარიგი ღვთისა, რომელმაც აიღო ცოდვები სოფლისა.

³⁰ეს არის, რომელზეც მე ვთქვი: ჩემ შემდეგ მოდის კაცი, რომელიც ჩემზე უპირატესია, რადგან ჩემზე წინ იყო.

³¹და მე არ ვიცნობდი მას, მაგრამ რომ გამოეცხადოს ისრაელს, ამის გამო მოვედი წყლით ნათლის საცემად.

³²და დაამოწმა იოანემ და თქვა: ვიხილე სული, როგორც მტრედი, გადმომავალი ზეციდან, და დაადგა მას.

³³და მე არ ვიცნობდი მას, მაგრამ ვინც მომავლინა მე წყლით ნათლის საცემად, მან მითხრა მე: ვისზეც იხილავ სულს, გადმომავალს და დამდგარს მასზე, ის არის, ვინც ნათელს გცემთ სულიწმიდით.

³⁴და მე ვიხილე და დავამოწმე, რომ ეს არის ძე ღვთისა.

³⁵მომდევნო დღეს კვლავ იდგა იოანე, და მის მოწაფეთაგან ორი.

³⁶და შეხედა იესოს, მომავალს, და თქვა: აჰა, ტარიგი ღვთისა.

³⁷და გაიგონა მისმა ორმა მოწაფემ, როცა ამბობდა ამას, და გაჰყვა იესოს.

³⁸და მობრუნდა იესო და იხილა ისინი, რომ მისდევდნენ მას, და უთხრა მათ: რას ეძებთ? ხოლო მათ უთხრეს მას: რაბი, — რაც თარგმანით ნიშნავს: მოძღვარო, — სად იმყოფები?

³⁹უთხრა მათ: მოდით და იხილეთ. მივიდნენ და იხილეს, სად იმყოფებოდა, და მასთან დარჩნენ იმ დღეს; ჟამი იყო დაახლოებით მეათე.

⁴⁰იყო ანდრია, ძმა სიმონ-პეტრესი, ერთი ორთაგან, რომლებმაც მოისმინეს იოანესგან და გაჰყვნენ მას.

⁴¹და იპოვა ამან პირველად თავისი ძმა, სიმონი, და უთხრა მას: ვიპოვეთ მესია, რაც ითარგმნება: ქრისტე.

⁴²ამან მიიყვანა იგი იესოსთან. შეხედა მას იესომ და უთხრა: შენ ხარ სიმონი, ძე იონასი, შენ გეწოდოს კეფა, რაც ითარგმნება: კლდე.

⁴³მომდევნო დღეს მოინდომა იესომ გასვლა გალილეაში და იპოვა ფილიპე და უთხრა მას იესომ: გამომყევი მე.

⁴⁴და იყო ფილიპე ბეთსაიდიდან, ანდრიას და პეტრეს ქალაქიდან.

⁴⁵იპოვა ფილიპემ ნათანაელი და უთხრა მას: ვისზეც დაწერა მოსემ სჯულში და წინასწარმეტყველებმა, ვიპოვეთ — იესო, ძე იოსებისა, ნაზარეთიდან.

⁴⁶და უთხრა მას ნათანაელმა: ნაზარეთიდან შესაძლებელია რამე კეთილი იყოს? უთხრა მას ფილიპემ: მოდი და იხილე.

⁴⁷დაინახა იესომ ნათანაელი, მისკენ მომავალი, და თქვა მასზე: აჰა, ჭეშმარიტად ისრაელელი, რომელშიც მზაკვრობა არ არის.

⁴⁸უთხრა მას ნათანაელმა: საიდან მიცნობ მე? მიუგო იესომ და უთხრა მას: ვიდრე შენ ფილიპე მოგიხმობდა, როცა იყავი ლეღვის ხის ქვეშ, გიხილე შენ.

⁴⁹მიუგო მას ნათანაელმა და უთხრა: რაბი, შენ ხარ ძე ღვთისა, შენ ხარ მეუფე ისრაელისა!

⁵⁰მიუგო იესომ და უთხრა მას: რადგან გითხარი შენ, რომ გიხილე შენ ლეღვის ხის ქვეშ, და გწამს, ამაზე მეტს იხილავ.

⁵¹და უთხრა მას: ამინ, ამინ გეუბნებით თქვენ: ამიერიდან იხილავთ ცას გახსნილს და ღვთის ანგელოზებს, აღმავალთ და გადმომავალთ ძეზე კაცისა.