Read ახალი აღთქმა წიგნი იოანესი 13 Bible Online

წიგნი იოანესი 13 - ახალი აღთქმა bible

წიგნი იოანესი 13

¹პასექის დღესასწაულამდე იცოდა იესომ, რომ მოვიდა მისი ჟამი, რათა გავიდეს ამ სოფლიდან მამასთან, რადგან შეიყვარა თავისიანები ამ სოფელში და ბოლომდე შეიყვარა ისინი.

²და როდესაც სერობა იყო, ეშმაკს უკვე ჩაედო იუდას, სიმონ ისკარიოტელისას, გულში, რომ გაეცა იგი.

³იცოდა იესომ, რომ ყველაფერი მისცა მას მამამ ხელში და რომ ღვთისაგან გამოვიდა და ღმერთთან მიდის;

⁴და ადგა სერობიდან და დადო თავისი სამოსი და აიღო არდაგი და შემოირტყა,

⁵შემდეგ აიღო წყალი, ჩაასხა საბანელში და დაიწყო თავისი მოწაფეებისთვის ფეხების დაბანა და გამშრალება არდაგით, რომელიც შემორტყმული ჰქონდა;

⁶და მივიდა სიმონ-პეტრესთან. უთხრა მას პეტრემ: უფალო, შენ მბან მე ფეხებს?

⁷მიუგო იესომ და უთხრა მას: რასაც მე ვაკეთებ, არ იცი ახლა, ხოლო ამის შემდეგ გაიგებ.

⁸უთხრა მას პეტრემ: არა, არ დამბან ფეხებს უკუნისამდე. მიუგო მას იესომ: თუ არ დაგბან შენ, არა გაქვს წილი ჩემთან.

⁹უთხრა მას სიმონ-პეტრემ: უფალო, არა მხოლოდ ფეხები, არამედ ხელებიც და თავიც.

¹⁰უთხრა მას იესომ: განბანილს არ სჭირდება დაბანა გარდა ფეხებისა, რადგან წმინდაა მთლიანად; და თქვენც წმინდა ხართ, მაგრამ არა ყველა. —

¹¹რადგან იცოდა თავისი გამცემი, ამიტომ თქვა: ყველა არა ხართ წმინდა.

¹²და როცა დაბანა მათ ფეხები, აიღო თავისი სამოსი და ინახით დაჯდა კვლავ და უთხრა მათ: იცით, რა გაგიკეთეთ თქვენ?

¹³თქვენ მეძახით მე: მოძღვარო და უფალო, — და სწორად ამბობთ, რადგან ვარ.

¹⁴თუ მე დაგბანეთ თქვენ ფეხები, უფალმა და მოძღვარმა, თქვენც გმართებთ ერთმანეთისთვის ფეხების დაბანა;

¹⁵რადგან მაგალითი მოგეცით თქვენ, რომ როგორც მე გაგიკეთეთ თქვენ, თქვენც ისე აკეთოთ.

¹⁶ამინ, ამინ გეუბნებით თქვენ: არ არის მონა თავის ბატონზე დიდი, არც მოციქული — თავის მომავლინებელზე დიდი.

¹⁷ეს თუ იცით, ნეტარნი ხართ, თუ აკეთებთ ამას.

¹⁸არა ყველა თქვენგანზე ვამბობ, რადგან მე ვიცი, ვინ გამოვირჩიე, არამედ რათა წერილი აღსრულებულიყო: რომელიც ჭამდა ჩემთან პურს, აღმართა ჩემზე თავისი ქუსლი (ფს.40,9).

¹⁹ამიერიდან გეუბნებით თქვენ, ვიდრე აღსრულდება, რათა, როცა იქნება, ირწმუნოთ, რომ მე ვარ.

²⁰ამინ, ამინ გეუბნებით თქვენ: ვინც შეიწყნარებს, რომელსაც მე მივავლენ, მე შემიწყნარებს, ხოლო ვინც მე შემიწყნარებს, შეიწყნარებს ჩემს მომავლინებელს.

²¹ეს თქვა იესომ და შეძრწუნდა სულით და დაამოწმა და თქვა: ამინ, ამინ გეუბნებით თქვენ, რომ ერთი თქვენგანი გამცემს მე.

²²უყურებდნენ ერთმანეთს მოწაფეები და ვერ გაეგოთ, ვის შესახებ ამბობდა.

²³და ინახით იჯდა იესოს გვერდით ერთი მისი მოწაფეთაგანი, რომელიც უყვარდა იესოს.

²⁴ანიშნა მას სიმონ-პეტრემ, რომ ეკითხა, ვინ არის, ვის შესახებაც ამბობს.

²⁵და მიეყრდნო იგი იესოს მკერდს და უთხრა მას: უფალო, ვინ არის?

²⁶მიუგო იესომ და უთხრა: ის არის, ვისაც მე ჩავუწობ ლუკმას და მივცემ. და ჩააწო ლუკმა და მისცა იუდას, სიმონ ისკარიოტელისას.

²⁷და ლუკმის მიღების შემდეგ შევიდა მასში სატანა და უთხრა მას იესომ: რასაც აკეთებ, გააკეთე მალე.

²⁸მეინახეთაგან ვერავინ გაიგო, რისთვის უთხრა ეს მას,

²⁹რადგან ზოგიერთს ეგონა, ვინაიდან ყულაბა ჰქონდა იუდას, ამიტომ უთხრა მას იესომ: იყიდე, რაც გვჭირდება დღესასწაულისთვის; ან გლახაკებისთვის რომ რაიმე მიეცა.

³⁰და მიიღო მან ლუკმა და მაშინვე გავიდა; და იყო ღამე.

³¹და როცა გავიდა, თქვა იესომ: ახლა იდიდა ძე კაცისა და ღმერთი იდიდა მასში.

³²თუ ღმერთი იდიდა მასში, ღმერთიც ადიდებს მას თავის თავში, და მყისვე ადიდებს მას.

³³შვილებო, კიდევ ცოტა ხანს თქვენთან ვარ; მომძებნით მე და როგორც ვუთხარი იუდეველებს, რომ, სადაც მე მივდივარ, თქვენ ვერ შეძლებთ მოსვლას, თქვენც გეუბნებით ახლა.

³⁴ახალ მცნებას გაძლევთ თქვენ, რათა გიყვარდეთ ერთმანეთი; როგორც მე შეგიყვარეთ თქვენ, თქვენც ისე გიყვარდეთ ერთმანეთი.

³⁵ამით მიხვდება ყველა, რომ ჩემი მოწაფეები ხართ, თუ გეყვარებათ ერთმანეთი.

³⁶უთხრა მას სიმონ-პეტრემ: უფალო, სად მიდიხარ? მიუგო მას იესომ: სადაც მე მივდივარ, არ შეგიძლია ახლა გამომყვე, ხოლო მერე გამომყვები მე.

³⁷უთხრა მას პეტრემ: უფალო, რატომ არ შემიძლია გამოგყვე შენ ახლა? ჩემს სულს დავდებ შენთვის.

³⁸მიუგო იესომ და უთხრა მას: შენს სულს ჩემთვის დადებ? ამინ, ამინ გეუბნები შენ: არ იყივლებს მამალი, ვიდრე არ უარმყოფ მე სამგზის.