Read ახალი აღთქმა წიგნი იოანესი 14 Bible Online

წიგნი იოანესი 14 - ახალი აღთქმა bible

წიგნი იოანესი 14

¹ნუ შეძრწუნდება თქვენი გული; გწამდეთ ღვთისა და გწამდეთ ჩემი.

²ჩემი მამის სახლში სავანე მრავალია; ასე რომ არა, გეტყოდით თქვენ: მივდივარ, რომ გაგიმზადოთ თქვენ ადგილი.

³და თუ წავალ და გაგიმზადებთ თქვენ ადგილს, კვლავ მოვალ და წაგიყვანთ თქვენ ჩემთან, რათა, სადაც მე ვარ, თქვენც იქ იყოთ.

⁴და სადაც მე მივდივარ, იცით და გზაც იცით.

⁵უთხრა მას თომამ: უფალო, არ ვიცით, სად მიდიხარ, და როგორ შეგვიძლია გზა ვიცოდეთ?

⁶უთხრა მას იესომ: მე ვარ გზა და ჭეშმარიტება და ცხოვრება; ვერავინ მივა მამასთან, თუ არა ჩემ მიერ.

⁷თუ მიცნობთ მე, ჩემს მამასაც იცნობთ. და ამიერიდან იცნობთ მას და გიხილავთ იგი.

⁸უთხრა მას ფილიპემ: უფალო, გვიჩვენე ჩვენ მამა და საკმარისია ჩვენთვის.

⁹უთხრა მას იესომ: ამდენ ხანს თქვენთან ვარ და ვერ შემიცანი მე, ფილიპე? ვინც მიხილა მე, იხილა მამაც; და შენ როგორ ამბობ: გვიჩვენე ჩვენ მამა?

¹⁰არა გწამს, რომ მე მამაში ვარ და მამა ჩემშია? სიტყვებს, რომლებსაც მე გეუბნებით თქვენ, ჩემით არ ვამბობ, არამედ მამა, რომელიც ჩემშია, იგი აკეთებს საქმეს.

¹¹გწამდეთ ჩემი, რომ მე მამაში ვარ და მამა ჩემშია, ხოლო თუ არა, ამ საქმეებით ირწმუნეთ ჩემი.

¹²ამინ, ამინ გეუბნებით თქვენ: ვისაც სწამს ჩემი, საქმეებს, რომელთაც მე ვაკეთებ, ისიც გააკეთებს და ამაზე მეტს გააკეთებს, რადგან მე მამასთან მივდივარ.

¹³და რასაც ითხოვთ ჩემი სახელით, იმას გავაკეთებ, რათა იდიდოს მამა ძის მიერ;

¹⁴რასაც ითხოვთ ჩემი სახელით, გავაკეთებ მე.

¹⁵თუ გიყვარვართ მე, ჩემი მცნებები დაიცავით;

¹⁶და მე ვთხოვ მამას და სხვა ნუგეშისმცემელს მოგივლენთ თქვენ, რათა თქვენთან იყოს უკუნისამდე,

¹⁷სულს ჭეშმარიტებისას, რომლის მიღებაც ამ სოფელს არ ძალუძს, რადგან ვერ ხედავს მას, არც იცნობს, ხოლო თქვენ იცნობთ მას, რადგან თქვენთან არის და თქვენში იქნება.

¹⁸არ დაგტოვებთ თქვენ ობლად, მოვალ თქვენთან.

¹⁹კიდევ ცოტაც და ეს სოფელი ვეღარ მნახავს მე, ხოლო თქვენ მნახავთ მე, რადგან მე ცოცხალი ვარ და თქვენც ცოცხლები იქნებით.

²⁰იმ დღეს შეიცნობთ თქვენ, რომ მე ჩემს მამაში ვარ და თქვენ — ჩემში და მე თქვენში.

²¹ვისაც აქვს ჩემი მცნებები და იცავს მათ, ის არის, ვისაც ვუყვარვარ მე; ხოლო ვისაც ვუყვარვარ მე, მას შეიყვარებს ჩემი მამაც, და მეც შევიყვარებ მას და გამოვუცხადებ მას ჩემს თავს.

²²უთხრა მას იუდამ, არა ისკარიოტელმა: უფალო, რა არის, რომ განიზრახე, ჩვენ გამოგვიცხადო შენი თავი და არა ამ სოფელს?

²³მიუგო იესომ და უთხრა მას: ვისაც ვუყვარვარ მე, ჩემს სიტყვებს დაიცავს და მამა ჩემი შეიყვარებს მას და მივალთ მასთან და მასთან დავივანებთ;

²⁴ვისაც არ ვუყვარვარ მე, ჩემს სიტყვებს არ იცავს; და სიტყვა, რომელიც გესმით, არ არის ჩემი, არამედ ჩემი მომავლინებელი მამისა.

²⁵ეს გითხარით თქვენ, რადგან თქვენთან ვარ.

²⁶ხოლო ნუგეშისმცემელი, სულიწმიდა, რომელსაც მოავლენს მამა ჩემი სახელით, იგი გასწავლით თქვენ ყოველივეს და გაგახსენებთ თქვენ ყოველივეს, რაც გითხარით თქვენ.

²⁷მშვიდობას გიტოვებთ თქვენ, ჩემს მშვიდობას გაძლევთ თქვენ; როგორც ეს სოფელი აძლევს, მე ისე არ გაძლევთ თქვენ. ნუ შეძრწუნდება თქვენი გული, ნურც შეშინდება.

²⁸გაგონილი გაქვთ თქვენ, რომ ვთქვი: მივდივარ და მოვალ თქვენთან. რომ გყვარებოდით მე, გაგიხარდებოდათ, რომ მივდივარ მამასთან, რადგან მამა დიდია ჩემზე.

²⁹და ახლა გითხარით თქვენ, ვიდრე მოხდება, რათა, როცა მოხდება, ირწმუნოთ.

³⁰ბევრს აღარ გეტყვით თქვენ, რადგან მოდის ამ სოფლის მთავარი და ჩემში ვერ იპოვის ვერაფერს,

³¹არამედ რათა გაიგოს ამ სოფელმა, რომ მიყვარს მამა, როგორც მამცნო მე მამამ, ისე ვაკეთებ. ადექით, წავიდეთ აქედან.