Read ახალი აღთქმა წიგნი იოანესი 15 Bible Online

წიგნი იოანესი 15 - ახალი აღთქმა bible

წიგნი იოანესი 15

¹მე ვარ ვაზი ჭეშმარიტი და მამა ჩემი მიწათმოქმედია.

²ყოველ რტოს, რომელიც არის ჩემთან და არ გამოიღებს ნაყოფს, მოჰკვეთს მას; და ყოველს, რომელიც გამოიღებს ნაყოფს, გაწმენდს მას, რათა უფრო მეტი ნაყოფი გამოიღოს.

³ხოლო თქვენ უკვე გაწმენდილნი ხართ სიტყვით, რომელსაც გეუბნებოდით თქვენ;

⁴იყავით ჩემთან და მე — თქვენთან. როგორც რტოს არ შეუძლია ნაყოფის გამოღება თავისით, თუ არ არის ვაზზე, ასევე არც თქვენ — თუ არ იქნებით ჩემთან.

⁵მე ვარ ვაზი და თქვენ — რტოები ვინც იქნება ჩემთან და მე — მასთან, ის გამოიღებს მრავალ ნაყოფს, რადგან ჩემ გარეშე არ შეგიძლიათ არაფრის კეთება.

⁶ვინც არ იქნება ჩემთან, გადაყრიან გარეთ, როგორც ნასხლევს, და გახმება და შეაგროვებენ მათ და ცეცხლში ჩაყრიან და დაიწვება.

⁷თუ იქნებით ჩემთან და ჩემი სიტყვები თქვენში იქნება, რაც გინდათ ითხოვეთ, და გექნებათ თქვენ.

⁸ამით იდიდება მამა ჩემი, რომ მრავალ ნაყოფს გამოიღებთ და იქნებით ჩემი მოწაფეები.

⁹როგორც შემიყვარა მე მამამ, მეც შეგიყვარეთ თქვენ; იყავით ჩემს სიყვარულში.

¹⁰თუ ჩემს მცნებებს დაიცავთ, იქნებით ჩემს სიყვარულში, როგორც მე ჩემი მამის მცნებები დავიცავი და ვარ მის სიყვარულში.

¹¹ეს გითხარით თქვენ, რათა ჩემი სიხარული თქვენში იყოს და თქვენი სიხარული სრული იყოს.

¹²ეს არის ჩემი მცნება, რომ გიყვარდეთ ერთმანეთი, როგორც მე შეგიყვარეთ თქვენ.

¹³ამაზე დიდი სიყვარული არავის აქვს, რომ თავისი სული დადოს თავისი მეგობრებისთვის.

¹⁴თქვენ ჩემი მეგობრები ხართ, თუ აკეთებთ, რასაც გამცნებთ თქვენ.

¹⁵აღარ გიწოდებთ თქვენ მონებს, რადგან მონამ არ იცის, რას აკეთებს მისი ბატონი; ხოლო თქვენ გიწოდეთ მეგობრები, რადგან ყოველივე, რაც გავიგე ჩემი მამისგან, გაუწყეთ თქვენ.

¹⁶არა თქვენ გამომირჩიეთ მე, არამედ მე გამოგირჩიეთ თქვენ და დაგადგინეთ თქვენ, რათა თქვენ წახვიდეთ და ნაყოფი გამოიღოთ და თქვენი ნაყოფი იყოს ის, რომ, რასაც სთხოვთ მამას ჩემი სახელით, მოგცეთ თქვენ.

¹⁷ამას გამცნებთ თქვენ, რომ გიყვარდეთ ერთმანეთი.

¹⁸თუ ამ სოფელს სძულხართ თქვენ, იცოდეთ, რომ ჯერ მე შემიძულა.

¹⁹ამ სოფლისაგანნი რომ ყოფილიყავით, სოფელი თავისიანებს შეიყვარებდა; ხოლო რადგან ამ სოფლისაგანნი არა ხართ, არამედ მე გამოგირჩიეთ თქვენ ამ სოფლიდან, ამის გამო სძულხართ თქვენ ამ სოფელს.

²⁰გაიხსენეთ სიტყვა, რომელიც მე გითხარით თქვენ: არ არის მონა თავის ბატონზე დიდი. თუ მე მდევნეს, თქვენც დაგიწყებენ დევნას; თუ ჩემი სიტყვა დაიცვეს, თქვენსასაც დაიცავენ.

²¹მაგრამ ამ ყველაფერს გაგიკეთებენ თქვენ ჩემი სახელის გამო, რადგან არ იციან მომავლინებელი ჩემი.

²²რომ არ მოვსულიყავი და არ მეთქვა მათთვის, ცოდვა არ ექნებოდათ; ხოლო ახლა გამართლება არა აქვთ თავისი ცოდვებისა.

²³ვისაც მე ვძულვარ, ჩემი მამაც სძულს.

²⁴რომ არ გამეკეთებინა საქმეები მათ შორის, რომელიც სხვამ ვერავინ გააკეთა, ცოდვა არ ექნებოდათ; ხოლო ახლა მიხილეს და შემიძულეს მეც და ჩემი მამაც;

²⁵რათა აღსრულებულიყო სიტყვა, რომელიც მათ სჯულშია დაწერილი: შემიძულეს მე უმიზეზოდ (ფს.34,19).

²⁶ხოლო როცა მოვა ნუგეშისმცემელი, რომელსაც მე მოგივლენთ თქვენ ჩემი მამისგან, სული ჭეშმარიტებისა, რომელიც მამისგან გამოდის, იგი დაამოწმებს ჩემზე;

²⁷და თქვენც მოწმობთ, რადგან თავიდანვე ჩემთან ხართ.