Read ახალი აღთქმა წიგნი იოანესი 16 Bible Online

წიგნი იოანესი 16 - ახალი აღთქმა bible

წიგნი იოანესი 16

¹ეს გითხარით თქვენ, რათა არ დაბრკოლდეთ.

²შესაკრებლიდან განგკვეთენ თქვენ, მაგრამ მოდის ჟამი, როცა ყოველს, რომელიც დაგხოცავთ თქვენ, ეგონება, რომ მსხვერპლი შესწირა ღმერთს.

³და ამას გაგიკეთებენ, რადგან არ იცნობენ მამას, არც მე;

⁴არამედ ეს გითხარით თქვენ, რათა, როცა მოვა ჟამი, გაიხსენოთ, რომ მე გითხარით თქვენ. ეს თავიდანვე არ გითხარით თქვენ, რადგან თქვენთან ვიყავი,

⁵ხოლო ახლა მივდივარ ჩემს მომავლინებელთან და თქვენგან არავინ მეკითხება მე: სად მიდიხარ?

⁶არამედ ეს რომ გითხარით თქვენ, მწუხარებამ აავსო თქვენი გული;

⁷მაგრამ მე ჭეშმარიტებას გეუბნებით თქვენ: უმჯობესია თქვენთვის, რომ მე წავიდე, რადგან, თუ მე არ წავალ, ნუგეშისმცემელი არ მოვა თქვენთან; ხოლო თუ მე წავალ, მოგივლენთ თქვენ მას.

⁸და მოვა იგი და ამხელს ამ სოფელს ცოდვის გამო და სიმართლის გამო და სამსჯავროს გამო;

⁹ცოდვის გამო, რადგან არა სწამთ ჩემი;

¹⁰და სიმართლის გამო, რადგან მამასთან მივდივარ და ვეღარ მნახავთ მე;

¹¹და სამსჯავროს გამო, რადგან მთავარი ამ სოფლისა დასჯილია.

¹²კიდევ ბევრი მაქვს თქვენთვის სათქმელი, მაგრამ ახლა არ შეგიძლიათ დატევა;

¹³ხოლო როცა მოვა იგი, სული ჭეშმარიტებისა, წაგიძღვებათ თქვენ ყოველ ჭეშმარიტებაში, რადგან არ იტყვის თავისით, არამედ რასაც ისმენს, იტყვის და მომავალს გაუწყებთ თქვენ.

¹⁴იგი მე მადიდებს, რადგან ჩემგან მიიღებს და გაუწყებთ თქვენ.

¹⁵ყოველივე, რაც აქვს მამას, ჩემია; ამის გამო გითხარით თქვენ, რომ ჩემგან მიიღებს და გაუწყებთ თქვენ.

¹⁶ცოტაც და ვეღარ მნახავთ მე და კიდევ ცოტაც და მიხილავთ მე, რადგან მე მივდივარ მამასთან.

¹⁷უთხრეს მისმა მოწაფეებმა ერთმანეთს: რა არის ეს, რასაც გვეუბნება ჩვენ: ცოტაც და ვეღარ მნახავთ მე და კიდევ ცოტაც და მიხილავთ მე? და: რადგან მე მივდივარ მამასთან? —

¹⁸და ამბობდნენ: რა არის ეს ცოტაც? არ ვიცით, რას ამბობს.

¹⁹გულისხმაყო იესომ, რომ უნდოდათ მისთვის ეკითხათ, და უთხრა მათ: ამის გამო იძიებთ ერთმანეთში, რომ ვთქვი: ცოტაც და ვეღარ მნახავთ მე და კიდევ ცოტაც და მიხილავთ მე?

²⁰ამინ, ამინ გეუბნებით თქვენ: იტირებთ და გოდებას დაიწყებთ თქვენ, ხოლო ეს სოფელი გაიხარებს; თქვენ დამწუხრდებით, მაგრამ თქვენი მწუხარება სიხარულად გადაიქცევა.

²¹დედაკაცი, როცა შობს, მწუხარეა, რადგან მოვიდა მისი ჟამი; ხოლო როცა შობს ყრმას, აღარ ახსოვს გასაჭირი სიხარულის გამო, რადგან იშვა ადამიანი ამ სოფლად.

²²და თქვენ ახლა მწუხარე ხართ და კვლავ გიხილავთ თქვენ და გაუხარდება თქვენს გულს და თქვენს სიხარულს ვერავინ წაგართმევთ თქვენ.

²³და იმ დღეს მე არაფერს მკითხავთ. ამინ, ამინ გეუბნებით თქვენ: რასაც სთხოვთ მამას ჩემი სახელით, მოგცემთ თქვენ.

²⁴აქამდე არაფერი გითხოვიათ ჩემი სახელით; ითხოვეთ და მიიღებთ, რათა თქვენი სიხარული სრული იყოს.

²⁵ეს იგავით გითხარით თქვენ, ხოლო მოდის ჟამი, როცა იგავით აღარ გეტყვით თქვენ, არამედ მამის შესახებ ცხადად გაუწყებთ თქვენ.

²⁶იმ დღეს ითხოვთ ჩემი სახელით და არ გეუბნებით თქვენ, რომ მე ვთხოვ მამას თქვენთვის,

²⁷რადგან თვითონ მამას უყვარხართ თქვენ, ვინაიდან თქვენ მე შემიყვარეთ და ირწმუნეთ, რომ მე ღვთისაგან გამოვედი;

²⁸გამოვედი მამისაგან და მოვედი ამ სოფლად; კვლავ ვტოვებ ამ სოფელს და მივდივარ მამასთან.

²⁹უთხრეს მას თავისმა მოწაფეებმა: აჰა, ახლა ცხადად გვეუბნები და არავითარ იგავს არ ამბობ.

³⁰ახლა ვიცით, რომ იცი ყველაფერი და არ გჭირდება, რომ ვინმემ გკითხოს შენ; ამის გამო გვწამს, რომ ღვთისაგან გამოხვედი.

³¹მიუგო მათ იესომ: ახლა გწამთ?

³²აჰა, მოდის ჟამი და უკვე მოსულია, რათა გაიფანტოთ თითოეული ცალ-ცალკე და მე მარტო დამტოვოთ; და არა ვარ მარტო, რადგან მამა ჩემთან არის.

³³ეს გითხარით თქვენ, რათა ჩემ მიერ მშვიდობა გქონდეთ; ამ სოფელში გასაჭირი გაქვთ, მაგრამ გამხნევდით, რადგან მე ვძლიე ამ სოფელს.