Read ახალი აღთქმა წიგნი იოანესი 19 Bible Online

წიგნი იოანესი 19 - ახალი აღთქმა bible

წიგნი იოანესი 19

¹მაშინ წაიყვანა პილატემ იესო და შოლტით სცემა.

²და ჯარისკაცებმა დაწნეს გვირგვინი ეკლისგან და დაადგეს მას თავზე და ძოწეულის სამოსით შემოსეს იგი.

³და მიდიოდნენ მასთან და ეუბნებოდნენ: გიხაროდეს, მეფეო იუდეველთა! — და ურტყამდნენ მას ყვრიმალში.

⁴და კვლავ გამოვიდა გარეთ პილატე და უთხრა მათ: აჰა, გამომყავს იგი თქვენთან გარეთ, რათა იცოდეთ, რომ ვერავითარ ბრალს ვერ ვპოულობ მასში.

⁵გამოვიდა იესო გარეთ ეკლის გვირგვინით და ძოწეულის სამოსით. და უთხრა მათ პილატემ: აჰა, კაცი.

⁶და როცა იხილეს იგი მღვდელმთავრებმა და მსახურებმა, აყვირდნენ და თქვეს: ჯვარს აცვი, ჯვარს აცვი იგი! უთხრა მათ პილატემ: წაიყვანეთ იგი თქვენ და ჯვარს აცვით, რადგან მე ვერ ვპოულობ მასში ბრალს.

⁷მიუგეს მას იუდეველებმა: ჩვენ სჯული გვაქვს და ჩვენი სჯულისამებრ უნდა მოკვდეს, რადგან თავი ძედ ღვთისად გამოაცხადა.

⁸როცა გაიგონა პილატემ ეს სიტყვა, უფრო შეეშინდა;

⁹და შევიდა კვლავ პრეტორიუმში და უთხრა იესოს: საიდან ხარ შენ? ხოლო იესომ პასუხი არ გასცა მას.

¹⁰უთხრა მას პილატემ: მე არაფერს მეუბნები? არ იცი, რომ ხელმწიფება მაქვს, ჯვარს გაცვა შენ და ხელმწიფება მაქვს, გაგიშვა შენ?

¹¹მიუგო მას იესომ: არ გექნებოდა ჩემზე არავითარი ხელმწიფება, რომ არ ყოფილიყო შენთვის მოცემული ზეგარდამო; ამის გამო ჩემს გამცემს შენზე უფრო დიდი ცოდვა აქვს.

¹²ამის შემდეგ პილატე ცდილობდა გაეშვა იგი, ხოლო იუდეველები ყვიროდნენ და ამბობდნენ: თუ მაგას გაუშვებ, არა ხარ მეგობარი კეისრისა, რადგან ყოველი, რომელიც მეფედ აცხადებს თავს, ეწინააღმდეგება კეისარს.

¹³ხოლო პილატემ, როცა გაიგონა ეს სიტყვა, გამოიყვანა გარეთ იესო და დაჯდა მსაჯულის ტახტზე, ადგილზე, რომელსაც ეწოდება ქვაფენილი, ხოლო ებრაულად — გაბბათა.

¹⁴და იყო პარასკევი პასექისა, ჟამი იყო დაახლოებით მეექვსე. და უთხრა პილატემ იუდეველებს: აჰა, თქვენი მეფე.

¹⁵ხოლო ისინი ყვიროდნენ და ამბობდნენ: წაიყვანე, წაიყვანე და ჯვარს აცვი იგი! უთხრა მათ პილატემ: თქვენი მეფე ჯვარს ვაცვა? მიუგეს მღვდელმთავრებმა: არა გვყავს მეფე გარდა კეისრისა.

¹⁶მაშინ გადასცა იგი მათ, რათა ჯვარცმულიყო, და წაიყვანეს იესო.

¹⁷და იტვირთა თვითონ თავისი ჯვარი და გავიდა თხემის ადგილზე, რომელსაც ეწოდება ებრაულად გოლგოთა,

¹⁸სადაც ჯვარს აცვეს იგი, და მასთან ერთად სხვა ორი, აქეთ და იქით, ხოლო შუაში — იესო.

¹⁹და დაწერა პილატემ წარწერა და დადო ჯვარზე; და იყო დაწერილი: იესო ნაზორეველი, მეფე იუდეველთა.

²⁰ეს წარწერა მრავალმა იუდეველმა ამოიკითხა, რადგან ახლოს იყო ქალაქთან ის ადგილი, სადაც ჯვარს ეცვა იესო; და იყო დაწერილი ებრაულად, რომაულად, ბერძნულად.

²¹და ეუბნებოდნენ პილატეს იუდეველთა მღვდელმთავრები: ნუ დაწერ: მეფე იუდეველთა; არამედ როგორც მან თქვა: მეფე ვარ იუდეველთა.

²²მიუგო პილატემ: რაც დავწერე, დავწერე.

²³და ჯარისკაცებმა, როცა ჯვარს აცვეს იესო, აიღეს მისი სამოსი და გაიყვეს ოთხ ნაწილად, თითოეული ჯარისკაცისთვის ნაწილი — და კვართი; ხოლო კვართი იყო უნაკერო, ზემოდან ნაქსოვი მთლიანად.

²⁴და უთხრეს ერთმანეთს: არ გავხიოთ იგი, არამედ წილი ვყაროთ მასზე, ვისი იქნება, — რათა აღსრულებულიყო წერილი: გაიყვეს სამოსი ჩემი ერთმანეთში და ჩემს კვართზე იყარეს წილი (ფს.21,19), — და ჯარისკაცებმა აღასრულეს ეს.

²⁵ხოლო იდგნენ იესოს ჯვართან მისი დედა და მისი დედის და, მარიამ კლეოპასი, და მარიამ მაგდალელი.

²⁶და იესომ, როცა დაინახა თავისი დედა და მოწაფე, რომელიც უყვარდა, წინ მდგომნი, უთხრა თავის დედას: დედაკაცო, აჰა, ძე შენი.

²⁷შემდეგ უთხრა მოწაფეს: აჰა, დედა შენი. და იმ დროიდან წაიყვანა იგი მოწაფემ თავისთან.

²⁸ამის შემდეგ იხილა იესომ, რომ უკვე ყველაფერი აღსრულდა; და რათა აღსრულებულიყო წერილი, თქვა: მწყურია.

²⁹იდგა ჭურჭელი ძმრით სავსე; და მათ აავსეს ღრუბელი ძმრით და დააგეს უსუპზე და მიუტანეს მას პირთან (ფს.68,22).

³⁰და როცა მიიღო ძმარი იესომ, თქვა: აღსრულდა; და დახარა თავი და განუტევა სული.

³¹ხოლო იუდეველებმა, რადგან პარასკევი იყო, რომ არ დარჩენილიყო ჯვარზე გვამები შაბათს — რადგან დიდი დღე იყო ის შაბათი — სთხოვეს პილატეს, რომ გადაემტვრიათ მათთვის წვივები და გადმოეხსნათ.

³²მივიდნენ ჯარისკაცები და პირველსაც გადაუმტვრიეს წვივები და მეორესაც, მასთან ერთად ჯვარცმულებს;

³³ხოლო როცა მივიდნენ იესოსთან და ნახეს, რომ იგი უკვე მკვდარი იყო, არ გადაუმტვრიეს მას წვივები,

³⁴არამედ ერთმა ჯარისკაცთაგანმა შუბი უგმირა მას გვერდში და მყისვე გადმოვიდა სისხლი და წყალი.

³⁵და რომელმაც იხილა, დაამოწმა და ჭეშმარიტია მისი მოწმობა და მან იცის, რომ ჭეშმარიტს ამბობს, რათა თქვენც ირწმუნოთ;

³⁶რადგან ეს მოხდა, რათა აღსრულებულიყო წერილი: მისი ძვალი არ დაიმტვრევა (გამ.12,45).

³⁷და კიდევ სხვა წერილი ამბობს: იხილავენ, ვისაც უგმირეს (ზაქ.12,10).

³⁸ამის შემდეგ სთხოვა პილატეს იოსებმა, რომელიც იყო არიმათიიდან — რადგან იყო იესოს მოწაფე ფარულად იუდეველთა შიშის გამო — რათა წაეღო გვამი იესოსი; და ნება დართო პილატემ; მივიდა და წაიღო მისი გვამი,

³⁹და მოვიდა ნიკოდიმოსიც, რომელიც ადრე მისული იყო იესოსთან ღამით, და მოიტანა შერეული მური და ალოე, დაახლოებით ასი ლიტრა.

⁴⁰და აიღეს იესოს გვამი და გაახვიეს იგი ტილოებში ნელსაცხებლებით, როგორც არის ჩვეულება იუდეველთა დასაფლავებისა.

⁴¹და იყო იმ ადგილას, სადაც ჯვარს ეცვა, ბაღი და ბაღში ახალი საფლავი, რომელშიც ჯერ არავინ იყო დასვენებული.

⁴²იქ დაასვენეს იესო იუდეველთა პარასკევის გამო, რადგან ახლოს იყო ის საფლავი.